ԱԳՆ. մեր համբերությունը սահման ունի

Ռուսաստանի Դաշնության ներքին գործերի փոխնախարար Գրիգորի Կարասինը կարծում է, որ Վրաստանում սրվում է հակառուսական հռետորաբանությունը, հատկապես՝ պաշտոնական մակարդակում:

«Երկու երկրների հարաբերությունները պետք է բարելավել, այլընտրանքը վերադարձն է դեպի առճակատում», — հայտարարեց նա վրացի լրագրողներին Պրահայում ՌԴ հետ հարաբերությունների կարգավորման հարցերով Վրաստանի վարչապետի հատուկ ներկայացուցիչ Զուրաբ Աբաշիձեի հետ հերթական հանդիպումից առաջ:

«Վրաստանի պաշտպանության նախարար Թինաթին Խիդաշելին նույնիսկ կոչ է անում ամբողջ աշխարհին միավորվել ընդդեմ Ռուսաստանի: Նորմալ հասարակությունում, որպես կանոն, ոչ ոք չի ներում նման հայտարարությունները: Մենք դեռևս ձեռնպահ ենք մնում, սակայն վախենում եմ, որ մեր համբերությունը հատի», — նշեց Կարասինը:

«Այժմ գլխավոր վտանգը Վրաստանում գալիք խորհրդարանական ընտրություններն ու հակառուսական սադրիչ հռետորաբանության աճն է, որը լսվում է միջազգային հարթակներում հասարակական անձանցից: Ամենավիրավորականն այն է, որ այդ հռետորաբանությունը հնչում է Վրաստանի պաշտոնական դեմքերից, քաղաքական գործիչներից, նախարարներից և նույնիսկ՝ նախագահից: Ինչ խոսք, մենք դրան ուշադրություն դարձնում ենք, փորձում ենք ամեն ինչին չպատասխանել, սակայն մեզ համար եզրակացություններ ենք անում: Եվ այժմ իրավիճակը հետևյալն է. կամ մենք վերադառնում ենք դեպի առճակատում՝ աշխատելով գտնել այն թեմաները, որոնք կրկին կտանեն վիճաբանության, կամ  կարգավորում ենք նորմալ և հարգալից հարաբերությունները», — հայտարարել է Կարասինը:

Փոխնախարարը տվյալ փուլում բացառեց Ռուսաստանի ու Վրաստանի առաջին դեմքերի հանդիպումը, որի հնարավորության մասին նախկինում հայտարարվել էր: Նրա խոսքով, հանդիպումն անհնար է, երբ Վրաստանի պաշտոնական դեմքերը հակառուսական հայտարարություններ են անում:

«Ինչպե՞ս կարող է հանդիպում լինել, երբ Վրաստանի քաղաքական գործիչների մեծ մասը Ռուսաստանին մեղադրում է բոլոր հնարավոր մեղքերի համար: Այս փուլում ինչպե՞ս կարելի է խոսել հանդիպման մասին: Դա ծիծաղելի է: Նման հանդիպումները պետք է նախապատրաստել, այն չի կարող իրականանալ Վրաստանի կողմից պահպանվող լարվածության պայմաններում», — հայտարարել է Կարասինը:

Նա նշել է նաև, որ ռուսական կողմը որոշում է կայացրել ընդլայնել այն մարդկանց շրջանակն, ովքեր կարող են Վրաստանի քաղաքացիներին հրավիրել ՌԴ, սակայն վիզային ռեժիմի չեղարկման մասին խոսք գնալ չի կարող:

«Վրաստանը չեղարկել է (ՌԴ քաղաքացիների համար վիզային ռեժիմը), և դա իր իրավունքն է: Մենք նման բան անել չենք կարող մի շարք նկատառումներով, այդ թվում նաև՝ անվտանգության… Պետք է քայլ անել այդ ուղղությամբ (վիզային ռեժիմի չեղարկման), սակայն այժմ դրա մասին խոսք անգամ լինել չի կարող»:

Թբիլիսիում Գրիգորի Կարասինի հայտարարությունը գնահատում են որպես «բացարձակ ոչ դիվանագիտական», «ագրեսիվ» և «Վրաստանի ներքին գործերին միջամտելու փորձ»: Հենց նմանատիպ մեկնաբանություններ հնչեցին վրացական խորհրդարանականների կողմից:

Վրաստանի վարչապետ Գիորգի Կվիրիկաշվիլիի կարծիքով, Ռուսաստանն ավելի լավ կանի՝ ուշադրություն դարձնի «սեփական մոտեցումներին»:

«Երբ ռուս քաղաքական գործիչները խոսում են Վրաստանում տիրող տրամադրությունների մասին, նրանք պետք է ուշադրություն դարձնեն սեփական մոտեցումներին: Տարածքային աամբողջականության և ինքնավարության վրա հիմնված հարաբերությունները հենց այն է, ինչից հետո հնարավոր կլինի հարաբերությունների ամբողջական կարգավորումը: Մենք պետք է առավելագույնս ձգտենք, իհարկե ոչ մեր արտաքին քաղաքական ուղղվածության և տարածքային ամբողջականության հաշվին, որպեսզի լարվածությունը թուլանա և մենք անցում կատարենք դեպի այն ռեժիմը, որը թույլ է տալիս խոսել խնդիրների լուծման մասին», — հայտարարել է Կվիրիկաշվիլին:

• Ներկա պահին ռուսաստանցիները կարող են այցելել Վրաստան առանց վիզայի, սակայն Վրաստանի քաղաքացիները պետք է վիզա ստանան Ռուսաստան մուտք գործելու համար:
• 2015թ. դեկտեմբերին ռուսական արտաքին քաղաքական գերատեսչությունը հայտարարել էր, որ Ռուսաստանը դեկտեմբերի 23-ից հեշտացնում է վիզային ռեժիմը Վրաստանի քաղաքացիների համար և ապագայում չի բացառում առանց վիզայի ռեժիմ մտցնելու հնարավորությունը:
• Վրաստանը Ռուսաստանի հետ հարաբերությունները խզեց ի պատասխան 2008թ. օգոստոսին Ռուսաստանի կողմից Աբխազիայի և Հարավային Օսիայի անկախության ճանաչմանը: Վրաստանի նոր կառավարության ներկայացուցիչներն, ովքեր իշխանության եկան 2012թ-ի հոկտեմբերի ընտրությունների արդյունքում, արտաքին քաղաքականության գլխավոր առաջնահերթություն հայտարարեցին ՌԴ հետ հարաբերությունների կարգավորումը:
• Տվյալ պահին Ռուսաստանի և Վրաստանի միջև երկխոսությունն ընթանում է ժնևյան քննարկումների և Պրահայում անցակցվող Աբաշիձե-Կարասին սիստեմատիկ հանդիպումների տեսքով: Հանդիպումների անցկացման ձևաչափը չի ենթադրում քաղաքական հարցերի քննարկում, դրանց շրջանակում լուծվում են առևտրի, տրանսպորտային հաղորդակցության, մշակութային-հումանիտար համագործակցության հստակ խնդիրներ: Վերջին հանդիպումը կայացել է Պրահայում անցյալ տարվա նոյեմբերին: