საქართველოში, შესაძლოა, უცხოელთა დასაქმების და ბინადრობის წესები გამკაცრდეს

ამასთან, კანონპროექტის მიხედვით, მკაცრდება მუდმივი ცხოვრების ნებართვისა და საინვესტიციო ბინადრობის ნებართვის გაცემის წესი. ასევე, საერთოდ უქმდება მოკლევადიანი ბინადრობის ინსტიტუტი.

ახალი ცვლილებების თანახმად, მუდმივი ცხოვრების ნებართვის გასაცემად არ იქნება საკმარისი ქვეყანაში ექვსწლიანი ცხოვრების სტაჟი.

„დამატებითი მოთხოვნის სახით ემატება სახელმწიფო ენის ცოდნა ელემენტარულ დონეზე, საქართველოში განხორციელებული ინვესტიცია ან საკუთრება მინიმუმ 200 ათასი აშშ დოლარის ექვივალენტი ლარში”, – წერია კანონპროექტში. 

დღევანდელი კანონმდებლობით, ბიზნესმენს, რომელიც ქვეყანაში 300 ათასი ლარის ინვესტიციას ჩადებს, განუსაზღვრელი ვადით ბინადრობის უფლება ენიჭება. კანონპროექტის ავტორები ამ წესის შეცვლასაც ითხოვენ – ცვლილებების თანახმად, საინვესტიციო ვიზას არა მუდმივი ბინადრობის უფლებას, არამედ მხოლოდ ხუთი წლამდე  დროებითი ცხოვრების შესაძლებლობას უნდა იძლეოდეს.

ამასთანავე, კანონპროექტის თანახმად, უნდა შეიცვალოს საინვესტიციო ვიზის გაცემის წესიც. ახალი წესით, საინვესტიციო ვიზის მისაღებად აღარ იქნება საკმარისი 300 ათასი ლარის ინვესტიციის ჩადება.

საინვესტიციო ვიზას მიიღებს მხოლოდ ის ინვესტორი, რომელიც “შეიძენს საქართველოს სახელმწიფოს მიერ გამოცემულ არანაკლებ 400 000 აშშ დოლარის ღირებულების ექვივალენტ ლარში ხუთწლიანი ვადის მქონე სახაზინო ფასიან ქაღალდს და განახორციელებს 100 ათასი აშშ დოლარის ექვივალენტ ლარში ინვესტიციას ან თუ ინვესტორი განახორციელებს არანაკლებ 300 ათასი აშშ დოლარის ექვივალენტ ლარში ინვესტიციას (ეს არ უნდა იყოს საცხოვრებელი სახლის შეძენა) და მუდმივ სამუშაოზე დაასაქმებს საქართველოს არანაკლებ 8 მოქალაქეს,“ -აღნიშნულია კანონპროექტის განმარტებით ბარათში.