საქართველო და თურქეთი ეკონომიკის, კულტურისა და კიბერუსაფრთხოების საკითხებში თანამშრომლობაზე შეთანხმდნენ

საქართველოს პრემიერ-მინისტრი გიორგი კვირიკაშვილი 23 მაისს თურქ კოლეგას ბინალი ილდირიმს შეხვდა. მოგვიანებით კი საქართველო-თურქეთის მაღალი დონის სტრატეგიული თანამშრომლობის საბჭოს შეხვედრაც გაიმართა, რომელსაც ორივე ქვეყნის მინისტრთა კაბინეტის წევრები ესწრებოდნენ.

მხარეებმა ხელი მოაწერეს 4 დოკუმენტს ორი ქვეყნის ურთიერთობის გაღრმავებაზე ეკონომიკის, კულტურის, იუსტიციისა და კიბერუსაფრთხოების საკითხებში.

გიორგი კვირიკაშვილის თქმით, განსაკუთრებით დაინტერესებულnი არიან თავისუფალი ვაჭრობის შესახებ შეთანხმების გაფართოებით. კვირიკაშვილის განცხადებით, ახალი შეთანხმება საშუალებას მისცემს ქართულ პროდუქციას, უფრო ფართოდ გავიდეს თურქეთის ბაზარზე.

ხელი მოეწერა შემდეგ დოკუმენტებს:

„საქართველოს იუსტიციის სამინისტროსა და თურქეთის რესპუბლიკის იუსტიციის სამინისტროს შორის თანამშრომლობის შესახებ ერთობლივ განცხადებას“;

დეკლარაციას „საქართველოსა და თურქეთის რესპუბლიკას შორის ერთობლივი ეკონომიკური და სავაჭრო კომისიის (JETCO) დაფუძნების შესახებ“;

„საქართველოს მთავრობასა და თურქეთის რესპუბლიკის მთავრობას შორის კულტურის სფეროში თანამშრომლობის პროგრამას”

„საქართველოს იუსტიციის სამინისტროსა და თურქეთის რესპუბლიკის ტრანსპორტის, ზღვაოსნობისა და კომუნიკაციის სამინისტროს შორის კიბერუსაფრთხოების სფეროში თანამშრომლობის შესახებ მემორანდუმს“.

შეთანხმების მიხედვით, საქართველოსა და თურქეთის რესპუბლიკას შორის შეიქმნება ერთობლივი ეკონომიკური და სავაჭრო კომისია, რომელიც მომავალი თანამშრომლობის ახალ ჩარჩოებს განსაზღვრავს.

საქართველოს მთავრობის მეთაურის თქმით, მსოფლიოს წინაშე არსებული გამოწვევების ფონზე, რეგიონული არასტაბილურობის პირობებში, კიდევ უფრო დიდ ღირებულებას იძენს საქართველოსა და თურქეთს შორის არსებული სტრატეგიული თანამშრომლობა და მაღალი დონის პოლიტიკური დიალოგი.

“საქართველოსა და თურქეთს თანამშრომლობის წარმატებული გამოცდილება და მნიშვნელოვანი პერსპექტივები აქვთ მსხვილ სატრანსპორტო-ენერგეტიკულ პროექტებში. არ შეიძლება არ აღინიშნოს ბაქო-თბილისი-ყარსის რკინიგზის პროექტი, რომლის პირველი განშტოების დასრულებაც 2017 წლის ზაფხულისთვის არის დაგეგმილი. ეს პროექტი, სამხრეთის ენერგეტიკული დერეფნის პროექტთან ერთად, მნიშვნელოვნად უწყობს ხელს სატრანსპორტო მარშრუტების დივერსიფიკაციას და უკეთ წარმოაჩენს პროექტის მონაწილე საქართველოსა და აზერბაიჯანის რესპუბლიკის ეკონომიკურ მნიშვნელობას და ასევე ჩვენი სამმხრივი თანამშრომლობის მნიშვნელობას. ეს კორიდორი არის ერთ-ერთი მნიშვნელოვანი სეგმენტი „აბრეშუმის გზის“ აღორძინების დიდი პროექტის, რასაც კიდევ ერთხელ გაესვა ხაზი სულ რამდენიმე დღის წინ ჩინეთში გამართული სამიტის დროს,” – განაცხადა კვირიკაშვილმა.

თურქეთის პრემიერ-მინისტრმა კი, თავის მხრივ, ხაზი გაუსვა საქართველოს ტერიტორიულ მთლიანობას.

“არავის არ აქვს უფლება დაარღვიოს საქართველოს ტერიტორიული მთლიანობა და სუვერენული უფლებები. ნებისმიერი პრობლემა, თუ რაიმე შეიძლება წარმოიშვას მომავალში, მოგვარდება ურთიერთანამშრომლობის თვალსაზრისით, განსაკუთრებით პრობლემები აფხაზეთის და ცხინვალის რეგიონთან დაკავშირებით, ასევე უნდა იყოს გათვალისწინებული გამომდინარე ზემოთხსენებული ორი პრინციპიდან“, – აღნიშნა ბინალი ილდირიმმა.

მან თურქეთში სამხედრო გადატრიალების მცდელობიდან რამდენიმე დღეში გიორგი კვირიკაშვილის ანკარაში ვიზიტი გაიხსენა და აღნიშნა, რომ თურქეთის მთავრობა და თურქი ხალხი ამ სოლიდარობას აფასებს.

ბინალი ილდირიმი თურქეთის მინისტრთა კაბინეტთან ერთად საქართველოს 22 მაისს ეწვია. თურქეთი საქართველოს ყველაზე მსხვილი ეკონომიკური პარტნიორია.