საქართველოს პრეზიდენტი სალომე ზურაბიშვილი ეროვნული ბანკის მოვალეობის შემსრულებლის, ნათია თურნავას კანდიდატად წარდგენის გამო ბოდიშს იხდის და მას გადადგომისკენ მოუწოდებს. მისივე თქმით, ბათილად უნდა გამოცხადდეს თურნავას ერთპიროვნული გადაწყვეტილება ყოფილი გენპროკურორის, აშშ-ს მიერ სანქცირებული ოთარ ფარცხალაძისთვის ანგარიშებზე წვდომის აღდგენის შესახებ. სალომე ზურაბიშვილი ხაზს უსვამს, რომ პრინციპი, რომელსაც ეფუძნება ეროვნული ბანკის საქმიანობა, მისი დამოუკიდებლობაა.
“სრულიად მიუღებელი იყო ირაკლი კობახიძის საჯარო გამოსვლა ანუ ღია მიუქარა, რომელიც გაჟღერდა გუშინ სებ-ის პრეზიდენტობის მოვალეობის შემსრულებლის მიმართ, კიდევ უფრო მიუღებელი იყო ის ფაქტი, რომ ნათია თურნავა დაემორჩილა ამ მუქარას და მისი დამოუკიდებლობის ხელშეხებას. ეს მიმაჩნია ერთდროულად მიუღებელ ნაბიჯად და უღირს საქციელად.
ეს იყო ასევე ერთპიროვნული გადაწყვეტილება, საბჭოს ყველა წევრის, ვიცეპრეზიდენტების და წევრების გვერდის ავლით, არც კონსულტაცია ჩატარებულა არც წინასწარ გაუფრთხილებიათ, ამას ადასტურებს გადადგომების მთელი რიგი.” – განაცხადა ზურაბიშვილმა.
მისი განმარტებით, ამ მოვლენების შედეგად გარკვეული რეპუტაციული ზიანი უკვე მიყენებულია სებ-ის და “მაშასადამე ქვეყნის მიმართ”, რადგან, პრეზიდენტის თქმით, სწორედ მათ მიაყენეს ქვეყანას ზიანი, “ვისაც ევალებოდათ ბანკის დამოუკიდებლობასა” და ქვეყნის რეპუტაციაზე ზრუნვა:
“მე მინდა მივმართო საზოგადოებას, რათა ამ უღირსი ქცევების მიუხედავად, არ მიეცეს რაღაც პანიკური რეაქციების შედეგი, რამაც შეიძლება კიდევ უფრო დააზარალოს სისტემა – რეალურად არსებობს გამოსავალი ამ ხელოვნურად შექმნილი კრიზისის გადასალახად.”
როგორც პრეზიდენტი ამბობს, დროა, საბჭომ აიღოს პასუხისმგებლობა და განახორციელოს საკუთარი ზედამხედველობის ფუნქცია – საბჭოს კოლექტიური გადაწყვეტილებით შესაძლებელია და აუცილებელია, რომ ბათილად გამოცხადდეს ერთპიროვნული გადაწყვეტილება და ეს იქნება პირველი ამ საბჭოს რეალური ქმედება იმისთვის, რომ შენარჩუნდეს ეროვნული ბანკის დამოუკიდებლობა. ზურაბიშვილის თქმით, ეს შესაძლებელია სამივე ვიცეპრეზიდენტის გადადგომის მიუხედავად, რადგან მათ კიდევ ორი თვის ვადა აქვთ უფლებამოსილების შეწყვეტამდე – ანუ გადადგომის ვადა არის ორი თვის შემდეგ.
“ეს არის ნაბიჯები, რაც სასწრაფოდ გადასადგმელია, რათა უფრო სერიოზული რეპუტაციული ზიანი არ მიადგეს ქვეყანას და ასევე, საერთაშორისო რეაქციები, რაც არის მოსალოდნელი. ეს არის სწორი გზა, რომელიც დაიცავს იმ მიღწევებს, რასაც ჰქვია საქართველოს ეკონომიკური და ფინანსური მდგრადობა და საერთაშორისო რეპუტაცია ამ დარგში. არავის არ აქვს უფლება, ვიწრო ინტერესების გამო, პერსონალური თუ არაპერსონალური, მაგრამ არაქვეყნის ინტერესების გამო, რომ მიიღოს ასეთი გადაწყვეტილება.” – ამბობს საქართველოს პრეზიდენტი.
საქართველოს ყოფილ გენერალურ პროკურორს, ოთარ ფარცხალაძეს ამერიკის შეერთებულმა შტატებმა სანქციები 14 სექტემბერს დაუწესა. ამერიკული მხარე აცხადებს, რომ სანქციების დაწესება ფარცხალაძის ბ რუსულ “ეფესბესთან” თანამშრომლობას და მის ბიზნესსაქმიანობას უკავშირდება. ამერიკულ მედიაში ფარცხალაძე მოხსენიებული იყო როგორც “ქართველი-რუსი ოლიგარქი”.
თავდაპირველად, ფარცხალაძის დასანქცირების შემდეგ, ეროვნულმა ბანკმა, სანქციების წესიდან გამომდინარე, ფარცხალაძეს პირად ანგარიშებზე წვდომა შეუზღუდა, თუმცა სებ-ის ამ გადაწყვეტილებას “ქართული ოცნების” ლიდერებმა ანტიკონსტიტუციური უწოდეს და მწვავედ გააკრიტიკეს. ამის შემდეგ სებ-მა კვლავ შეცვალა თავისი პოზიცია და ფარცხალაძეს ანგარიშებზე წვდომა აღუდგინა.
ქართველი პოლიტიკოსები და ექსპერტები მიიჩნევენ, რომ სებ-ის ქმედებების უკან ქვეყნის არაფორმალური მმართველი, ბიძინა ივანიშვილი დგას. ისინი ამბობენ, რომ საერთაშორისო სანქციების უგულებელყოფა და ასევე ეროვნულ ბანკზე პოლიტიკური ზეწოლა ქვეყნის პოლიტიკური და ეკონომიკური სტაბილურობისთვის დიდ რისკებს შეიცავს.
