სომხეთის პრემიერ-მინისტრის მეუღლე ყარაბაღში ფრონტზე გაემგზავრება
სომხეთის პრემიერ-მინისტრის, ნიკოლ ფაშინიანის მეუღლემ, ანა აკოპიანი 26 ოქტომბერს განაცხადა, რომ იგი “სამხედრო წვრთნებს გაივლის და ფრონტზე გაემგზავრება სამშობლოს დასაცავად”.
5 ოქტომბერს მისი ვაჟი აშოტ ფაშინიანი ყარაბაღის ფრონტზე მოხალისედ წავიდა. იგი 2000 წელს დაიბადა და მხოლოდ ახლახანს დაბრუნდა სამხედრო სამსახურიდან.
”ხვალიდან, 13 ქალისგან შემდგარი რაზმი, მათ შორის მე, წვრთნებს დავიწყებთ. რამდენიმე დღეში ჩვენი სამშობლოს საზღვრების დასაცავად გავემგზავრებით. ვერც ჩვენს სამშობლოს და ვერც ჩვენს ღირსებას მტერს ვერ დავუთმობთ”, – წერს 42 წლის ანა აკოპიანი ფეისბუქის საკუთარ გვერდზე.
2020 წლის 27 სექტემბრიდან, როდესაც ყარაბაღის კონფლიქტის ზონაში ესკალაცია დაიწყო, ორივე მხრიდან დაიღუპა რამდენიმე ათასი სამხედრო მოსამსახურე და მშვიდობიანი მოსახლე. ამ დროის განმავლობაში, სამჯერ გამოცხადდა ზავი – 10, 18 და 26 ოქტომბერს. სამივე მათგანი მალევე დაირღვა. მხარეები ერთმანეთს ადანაშაულებენ.
ანა აკოპიანი გაზეთ “ჰაიკაკან ჟამანაკის” მთავარი რედაქტორია. მან ასევე დააფუძნა საქველმოქმედო ფონდი “ჩემი ნაბიჯი” და წამოიწყო მოძრაობა “ქალები მშვიდობისათვის”.
• ინტერვიუ ნიკოლ ფაშინიანის მეუღლესთან, ანა აკოპიანთან
• როგორ გამოიყურება ომი სანგრებიდან. ვიდეო მთიანი ყარაბაღიდან
21 ოქტომბერს ანა აკოპიანმა წერილი გაუგზავნა აშშ-ს, საფრანგეთის, კანადის, ბრაზილიის, ლიბანის, სინგაპურის, ლიეტვუის, არგენტინისა და ვიეტნამის პირველ ქალბატონებს, რომელშიც მოუწოდა ”აღიარონ მთიანი ყარაბაღის დამოუკიდებლობა, რომლის მშვიდობიან მოსახლეობას აზერბაიჯანი თავს დაესხა”.
იგი ასევე წერს, რომ მისთვის ძნელია ჩახედოს თვალებში დედებს, რომელთა ვაჟებიც მათთან არ არიან.
ანა აკოპიანმა 2020 წლის სექტემბერში ერთკვირიანი საბრძოლო მომზადების კურსი მთიანი ყარაბაღის ერთ-ერთ სამხედრო ნაწილში გაიარა.
საბრძოლო მოქმედებების დაწყების პირველ დღეს – 27 სექტემბერს, პარლამენტში სიტყვით გამოსვლისას, პრემიერ-მინისტრმა განაცხადა, რომ იგი მზად არის “სამშობლოსათვის ახლავე მოკვდეს”. მოგვიანებით მან ეს გაიმეორა ფეისბუქის ერთ-ერთი პირდაპირი ეთერის დროს და თქვა, რომ ”ის არ მიდის ფრონტის ხაზზე, რადგან თავისი საქმე უნდა შეასრულოს”.
ნიკოლ პაშინიანი და ანა აკოპიანი ერევანში. 2018 წლის 8 მაისი. REUTERS / ჰაიკ ბაღდასარიანი
ყარაბაღის ომი – ამ სახელწოდებით არის ცნობილი შეიარაღებული კონფლიქტი სომხეთსა და აზერბაიჯანს შორის 1991-1994 წლებში, რომელიც აზერბაიჯანის ყოფილი ავტონომიური მხარის მთიანი ყარაბაღის ტერიტორიაზე და მის მიმდებარე რაიონებში მიმდინარეობდა. ომი დასრულდა ხელმოწერილი ზავით, თუმცა ორმხრივი სროლები პერიოდულად მაინც არის.
სომხებით დასახლებული მთიანი ყარაბაღის რესპუბლიკა არსებობს, როგორც დე ფაქტო დამოუკიდებელი რესპუბლიკა, რომელიც არცერთ სახელმწიფოს არ უღიარებია, მათ შორის არც სომხეთს. აზერბაიჯანი მიიჩნევს, რომ ყარაბაღი და მის გარშემო ტერიტორია ომის პირობებშია ოკუპირებული და ითხოვს დაბრუნებას.
კონფლიქტის დარეგულირების შესახებ მოლაპარაკებებმა საერთაშორისო დონეზე ამ დრომდე შედეგი ვერ გამოიღო. სრულმასშტაბიანი საბრძოლო მოქმედებებისა ბოლო გაელვება ე.წ. “აპრილის ომის”, იგივე “ოთხდღიანი ომის” დროს მოხდა 2016 წლის აპრილში. შედეგად ორივე მხრიდან ათობით ადამიანი დაიღუპა.
