კონფლიქტის ახალი მონაკვეთი აზერბაიჯანისა და სომხეთის საზღვარზე
ერევანმა აზერბაიჯანი თავისი სამხრეთ საზღვრების დაბომბვაში დაადანაშაულა, ბაქოში ეს უარყვეს, მაგრამ სომხური მხრიდან ირანის საზღვართან მდებარე რაიონში პროვოკაციების შესახებ განაცხადეს.
ყარაბაღის კონფლიქტის ზონაში ბრძოლები 27 სექტემბრიდან მიმდინარეობს. ორივე მხრიდან უკვე რამდენიმე ათასი სამხედრო და მშვიდობიანი მოსახლე დაიღუპა. ამ დროის განმავლობაში, სამჯერ გამოცხადდა ზავი – 10, 18 და 26 ოქტომბერს, მაგრამ ყოველთვის მაშინვე დაირღვა. მხარეები ერთმანეთს ადანაშაულებენ ზავის დარღვევაში.
27 ოქტომბრის დილით, სომხეთის თავდაცვის სამინისტრო განცხადებით გამოვიდა აზერბაიჯანის შეიარაღებული ძალების მიერ ქვეყნის სამხრეთ საზღვრის დაბომბვის შესახებ.
ბაქოში ეს განცხადება უარყვეს, მაგრამ უკვე რამდენიმე წუთის შემდეგ, მხარეებმა ერთმანეთი დაადანაშაულეს საზღვრის ამ მონაკვეთზე პროვოკაციებში.
ინფორმაცია ორი არმიის შეტაკებების შესახებ უკვე არა ყარაბაღის კონფლიქტის ზონაში, არამედ ორი ქვეყნის საზღვარზე მას შემდეგ დაიწყო, რაც აზერბაიჯანმა განაცხადა, რომ კონტროლი დაამყარა ირან-აზერბაიჯანის საზღვრის მონაკვეთზე (ყარაბაღის კონფლიქტის ზონაში).
• სომხეთის პრემიერ-მინისტრის მეუღლე ყარაბაღში ფრონტზე გაემგზავრება
სომხეთის თავდაცვის სამინისტროს ინფორმაცია
27 ოქტომბრის დილას, სომხეთის თავდაცვის სამინისტროს პრესმდივანმა, შუშან სტეფანიანმა განაცხადა, რომ აზერბაიჯანულმა მხარემ კიდევ ერთხელ დაარღვია ცეცხლის შეწყვეტის შეთანხმება და უპილოტო თვითმფრინავი გამოიყენა (ერთ-ერთი მათგანი სომხეთის ტერიტორიაზე ჩამოვარდა).
„აზერბაიჯანმა საარტილერიო დანადგარებით დაბომბა სომხეთის სამხრეთით, ირანთან საზღვარზე არსებული სასაზღვრო პუნქტი“.
გარკვეული დროის შემდეგ, სომხეთის თავდაცვის სამინისტრომ განაცხადა, რომ „მოწინააღმდეგე აგრძელებს სომხეთის რესპუბლიკის საზღვრის სამხრეთ მიმართულებით დაბომბვას – არიან დაჭრილები“.
სომხეთის თავდაცვის სამინისტრომ მოწინააღმდეგე გააფრთხილა, რომ „მას აზერბაიჯანის წინააღმდეგ საპასუხო ზომების მიღება მოუწევს“.
აზერბაიჯანის თავდაცვის სამინისტროს ინფორმაცია
„სომხეთის მიერ გავრცელებული ინფორმაცია, თითქოს, სომხეთის ტერიტორია უპილოტო საფრენი აპარატებისა და სარაკეტო-საარტილერიო სისტემების გამოყენებით დაიბომბა, სიცრუეა და პროვოკაციულ ხასიათს ატარებს“, – განაცხადეს ფაქტობრივად მაშინვე აზერბაიჯანის თავდაცვის სამინისტროში.
შემდეგ, აზერბაიჯანის თავდაცვის სამინისტრო და სასაზღვრო სამსახური ერთობლივი განცხადებით გამოვიდნენ, რომ „სომხეთი მიზანმიმართულად ახდენს სიტუაციის ესკალაციას ფრონტის სხვადასხვა მიმართულებაზე, განსაკუთრებით, სახელმწიფო საზღვრის აღდგენილ მონაკვეთებზე“.
„სომხეთის ხელმძღვანელობა უნდა შეეგუოს იმას, რომ აღდგენილი სახელმწიფო საზღვრები არ არის კონფლიქტის ზონა, არამედ წარმოადგენს საერთაშორისო თანამეგობრობის მიერ აღიარებულ სახელმწიფო საზღვარს, რომლითაც განისაზღვრება აზერბაიჯანის სუვერენული ტერიტორიები. (…)
ამ მიმართულებით ნებისმიერი პროვოკაცია ფასდება, როგორც აგრესიის ფაქტი. აზერბაიჯანს უფლება აქვს, გაანადგუროს ნებისმიერი ლეგიტიმური სამხედრო ობიექტი, რომელიც მის ტერიტორიას ემუქრება, მისი ადგილმდებარეობის მიუხედავად“, – ნათქვამია განცხადებაში.
თურქეთის შეჭრა სომხეთში?
ზოგიერთი წყარო, პირველ რიგში, Telegram-არხები თურქული სპეცრაზმის სომხეთში შესაჭრელად მზადების შესახებ იუწყება.
ერთ-ერთი ასეთი შეტყობინება:
„არსებობს ინფორმაცია, რომ სირიაში ერდოღანის დაჯგუფებებზე რუსეთის მასობრივი დარტყმების შემდეგ (ეს გუშინ მოხდა), თურქეთის სულთანმა მაშინვე გადაწყვიტა რევანშის აღება და სომხეთის ცალკეულ რეგიონებზე შეტევა ქვეყნის სამხრეთით. ამრიგად, ომი გადადის ახალ, უფრო მასშტაბურ ფაზაში“.
ოფიციალურ წყაროებს არც ერთ მხარეს, ამ ინფორმაციაზე კომენტარი არ გაუკეთებიათ.
