სოხუმმა "ეკონომიკურ საქმეებზე" რუსეთთან სასამართლო რატიფიცირება მოახდინა
რუსეთ-აფხაზური შეთანხმება
აფხაზეთის პარლამენტმა რატიფიცირება მოახდინა რუსეთ-აფხაზური შეთანხმების “ეკონომიკურ საქმეებზე სასამართლო გადაწყვეტილებების ურთიერთაღიარების შესახებ“. ეს იყო ერთ-ერთი პირობა, რომელსაც კრემლი აყენებდა სერიოზულ კრიზისში მყოფი რუსეთ-აფხაზური ურთიერთობების გასაუმჯობესებლად.
რუსეთში ეს შეთანხმება რატიფიცირებულია 2023 წლის დასაწყისიდან, თუმცა აფხაზეთი აქამდე არ ჩქარობდა “პასუხს”. პარლამენტმა საკითხის განხილვა გადადო, რადგან ექსპერტულ წრეებში გაბატონებული იყო მოსაზრება, რომ შეთანხმება არასახარბიელოა აფხაზეთისთვის, რადგან ადგილობრივ ბიზნესს პრობლემებს შეუქმნის.
თუმცა, ხანგრძლივი დისკუსიების, მათ შორის კულისებში განხილვების შემდეგ, პარლამენტმა მაინც მოახდინა შეთანხმების რატიფიცირება ხმათა უმრავლესობით.
შეთანხმება მიზნად ისახავს სასამართლო და კომერციული საარბიტრაჟო გადაწყვეტილებების ურთიერთაღიარებასა და აღსრულებას, რომლებიც კანონიერ ძალაში შევიდა სამეწარმეო და სხვა ეკონომიკური საქმიანობის დროს წარმოშობილ დავებს შორის. შეთანხმების დებულებები ასევე ვრცელდება სასამართლოსა და საარბიტრაჟო გადაწყვეტილებებზე.
“რატიფიკაცია ხელს შეუწყობს სახელმწიფოთაშორისი ურთიერთობების განვითარებას, ბიზნეს და სხვა ეკონომიკურ საქმიანობაში მონაწილეთა უფლებებისა და კანონიერი ინტერესების უზრუნველყოფას“, – აღნიშნულია კანონპროექტის განმარტებით ბარათში.
შეთანხმება შეიცავს სასამართლო გადაწყვეტილებების აღსრულებაზე უარის თქმის შვიდ საფუძველს, რომელთაგან ერთ-ერთი არის სიტუაცია, როდესაც სასამართლოს გადაწყვეტილებამ შეიძლება ზიანი მიაყენოს სუვერენიტეტს, საფრთხე შეუქმნას უსაფრთხოებას ან ეწინააღმდეგებოდეს ერთ-ერთი მხარის საჯარო პოლიტიკას.
- რეპეტიტორობა და ნათესავები სოფელში: მასწავლებლების „გადარჩენის საიდუმლოებები“ აფხაზეთში
- “აფხაზეთის მუზეუმში შამილ ბასაევის პორტრეტის გამოფენა მიუღებელია” – მოსკოვის აღშფოთების გამო ბასაევის პორტრეტი ჩამოხსნეს
აფხაზეთის იუსტიციის მინისტრი ანრი ბარციცი მიიჩნევს, რომ ხელშეკრულების რატიფიცირება ახალ შესაძლებლობებს გაუხსნის აფხაზ მეწარმეებს. მინისტრის თქმით, დოკუმენტი ითვალისწინებს სასამართლო გადაწყვეტილებების აღიარების საერთაშორისო პრინციპების განხორციელებას, რომელიც გათვალისწინებულია ნიუ-იორკის კონვენციაში და გამოიყენება 160-ზე მეტ ქვეყანაში.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
