საზოგადოებრივი ტრანსპორტის პრობლემა აზერბაიჯანში: როდის ამუშავდება მეტრო
2020 წლის ოქტომბრიდან მოყოლებული, ბაქოს მეტრო მგზავრებისთვის დაკეტილია. ამის მიზეზი კორონავირუსის პანდემიაა. ამას ემატება ისიც, რომ შაბათ-კვირასა და სადღესასწაულო დღეებში არ მუშაობს არც ავტობუსები. რამდენ ხანს გაგრძელდება ასეთი სიტუაცია? რას ფიქრობენ ამის შესახებ სატრანსპორტო სფეროს მუშაკები? კიდევ რა პრობლემებს შეეჯახნენ ისინი?
მეტროპოლიტენის თანამშრომლები ხელფასს სრულად ვერ იღებენ
JAMnews-ის კორესპონდენტის რესპონდენტი – ბაქოს მეტროპოლიტენის მემანქანე, სახელად ჰიქმეთი, იმაზე ჩივის, რომ გასული წლის ოქტომბრიდან მოყოლებული, ხელფასს სრული მოცულობით ვერ იღებს.
„ხელფასი 30 პროცენტით შეგვიმცირეს. თუკი ნორმალური რეჟიმის შემთხვევაში, თვეში 1000 მანათს (588.2$) ვიღებ, ახლა თანხა 700 მანათამდეა (411.8$)“, – აღნიშნა მემანქანემ.
მისი თქმით, ასეთი შემცირების მიზეზი „ღამის საათების“ დაკარგვაა: „როდესაც ღამით და დასვენების დღეებში ვმუშაობთ, გაორმაგებულ ხელფასს ვიღებთ. კარანტინის გამო მეტრო არ მუშაობს, შესაბამისად, დანამატებიც არ არის“.
„როგორც გინდა, ისე მოდი“
ცოტა ხანია, ბაქოს მეტროპოლიტენში, პროფილაქტიკური სამუშაოები ხორციელდება, სახელწოდებით – ინფრასტრუქტურის მონიტორინგი. მეტროს ხელმძღვანელობის განცხადების თანახმად, ეს აღჭურვილობის მუშა მდგომარეობაში შენარჩუნებისა და მგზავრების მიღებისთვის სრული მზადყოფნის უზრუნველყოფისთვის ხდება.
ჩვენი თანამოსაუბრის განცხადების თანახმად, ეს პროცესიც დამატებით პრობლემებს უქმნის მემანქანეებს:
„რატომღაც, პროფილაქტიკური სამუშაოები შაბათ-კვირას მიმდინარეობს. როგორც ცნობილია, ამ დღეებში, ავტობუსები არ მუშაობს. სხვა სიტყვებით რომ ვთქვათ, გვეუბნებიან, როგორც გინდათ, ისე მოდით, მაგრამ სამსახურში იყავითო“.
ჰიქმეთი მეტროში პროფილაქტიკური სამუშაოების მნიშვნელობის შესახებ გვიყვება: როდესაც მატარებელი არ დადის, რელსებს ჟანგი შეიძლება გაუჩნდეთ. მეტროს მატარებლები კი სიგნალს უშუალოდ რელსიდან იღებენ. ე.ი. გამართული სამუხრუჭო სიგნალის მიწოდებისთვის, რელსები მოწესრიგებულ მდგომარეობაში უნდა იყოს. ეს ძალიან მნიშვნელოვანია. მაგალითად, თუკი მემანქანე მატარებლის მოძრაობაზე კონტროლს სრულად დაკარგავს, მატარებელი ავტომატურად გაჩერდება შუქნიშნის წითელ ნიშანზე და ამით მოხერხდება შესაძლო ავარიის თავიდან აცილება“.
როდის ამუშავდება მეტრო?
ამ კითხვაზე პასუხი მეტროპოლიტენის თანამშრომლებსაც კი არ აქვთ. ჰიქმეთის თქმით, ისინიც მოუთმენლად ელიან მიწისქვეშა ტრანსპორტის გახსნას:
„კარანტინი ივნისამდე გახანგრძლივდა. ვვარაუდობთ, რომ მანამდე მეტრო არ იქნება. რა თქმა უნდა, ჩვენ თვითონ, ისევე როგორც ყველა, მუშაობის დაწყებას ველოდებით. მარტივი არ არის ყოველთვიურად ხელფასის 30 პროცენტის დაკარგვა“.
ავტობუსის მძღოლების მსგავსი პრობლემები
ჰასანი კომპანია BakuBus-ის ავტობუსის მძღოლად მუშაობს. ბაქოში მოქმედ ამ ავტობუსებში უნაღდო ანგარიშსწორებაა, მაგრამ არც აქ შეუძლიათ მძღოლებს გამომუშავებული ხელფასის სრული მოცულობით აღება.
„ყოველდღიურად, მარშრუტზე გასვლის წინ, „საგზურს“ გვაძლევენ. ხელფასი სწორედ ამ „საგზურების“ მიხედვით ირიცხება. თუკი, კვირაში ორჯერ არ გავდივართ სამუშაოდ, ბუნებრივია, ეს ხელფასზე აისახება. იმის გამო, რომ ავტობუსები შაბათ-კვირას არ მუშაობს, ყოველთვიურად, მისაღები თანხის 25-30 პროცენტს ვკარგავ“, – ამბობს ჰასანი.
აზერბაიჯანში, ნოვრუზის დღესასწაულის დღეებში – 20-დან 29 მარტამდე, არ მუშაობს არცერთი სახის საზოგადოებრივი ტრანსპორტი. სხვა სიტყვებით რომ ვთქვათ, მარტში, ავტობუსის მძღოლები ამ 10 დღის ფულს ვერ მიიღებენ.
JAMnews-ის კორესპონდენტთან საუბრისას, ჰასანმა ვერ უპასუხა კითხვას, როდის დასრულდება ასეთი ვითარება: „თქვენ მსგავსად, ჩვენც ოფიციალურ შეტყობინებებს ვუყურებთ. ველით, როდის დასრულდება კარანტინი, რათა მუშაობის ნორმალურ რეჟიმს დავუბრუნდეთ“.
კომენტარები
სადღესასწაულო დღეებში საზოგადოებრივი ტრანსპორტის მუშაობის აკრძალვას არაერთგვაროვანი გამოხმაურება მოჰყვა სოციალური ქსელების აზერბაიჯანულ სეგმენტში. აი, რამდენიმე სახასიათო კომენტარი:
„აი, ჩვენი სოციალური სახელმწიფო. თუკი ტაქსის ფული გაქვს, შეგიძლია გაერთო, დღესასწაული ისე გაატარო, როგორც მოგინდება. მაგრამ თუკი ფული არ გაქვს, იძულებული ხარ, მთელი 10 დღე სახლში გაატარო“.
„საინტერესოა, კაფე-რესტორნები მუშაობს, ავტობუსები კი არ დადის. ვინმე, რაიმე ლოგიკას ხედავს ამ გადაწყვეტილებაში?“.
„სადღესასწაულო დღეებში, იძულებული ვარ, სამსახურში ვიარო. მაგრამ არ არის არც ავტობუსები, არც მეტრო. მე რა, ხელფასის ნახევარი იმაზე უნდა დავხარჯო, რომ პურის ფული ვიშოვო?“.
