სკანდალური სასამართლო სარჩელები აზერბაიჯანში მაღალჩინოსნების წინააღმდეგ

აზერბაიჯანში, ფაქტობრივად ერთდროულად გავრცელდა ინფორმაცია სამი სკანდალური სასამართლო სარჩელის შესახებ. რეალურად, ყველა მათგანს ერთი საერთო საწყისი წერტილი აქვს – გასულ წელს, ბაქოში გამართული აზერბაიჯანის პრეზიდენტის ადმინისტრაციის მაშინდელი ხელმძღვანელის შვილიშვილის ქორწილი.

• აზერბაიჯანში, საქორწილო სუფრის გამო, ყოფილი და მოქმედი მაღალჩინოსნები დააკავეს
• ქორწილები აკრძალულია – რას ნიშნავს ეს აზერბაიჯანში

ვრცელდება ინფორმაცია მმართველი პარტიის „ახალი აზერბაიჯანის“ ერთ-ერთი ფუნქციონერის, სავუშ ნოვრუზოვის სარჩელის შესახებ შინაგან საქმეთა სამინისტროს წინააღმდეგ, პრეზიდენტის ადმინისტრაციის ყოფილი უფროსის და ამჟამად აზერბაიჯანის მეცნიერებათა ეროვნული აკადემიის პრეზიდენტის, რამიზ მეხტიევის სარჩელზე 15 დეპუტატის წინააღმდეგ და ერთ-ერთი სამეცნიერო ინსტიტუტის დირექტორის სარჩელზე, იმავე რამიზ მეხტიევის წინააღმდეგ.

ქორწილი და ცხოვრება მის შემდეგ

პირველი ორი სარჩელი პირდაპირ დაკავშირებულია რამიზ მეხტიევის შვილიშვილის ქორწილთან, რომელიც მრავალი წლის განმავლობაში, აზერბაიჯანში, „რუხ კარდინალად“ მიიჩნეოდა. იმ დროს, როდესაც კორონავირუსის პანდემიის გამო მთელ ქვეყანაში აკრძალული იყო მასობრივი ღონისძიებებისა და ცერემონიების ჩატარება – მათ შორის ქორწილების – აზერბაიჯანის პრეზიდენტის ადმინისტრაციის მოქმედმა ხელმძღვანელმა, რამიზ მეხტიევმა შვილიშვილის ქორწილი გადაიხადა.

სკანდალი მას შემდეგ აგორდა, რაც ქორწილის ამსახველი ფოტო და ვიდეომასალა სოციალურ ქსელებში გავრცელდა. პატარძლის მამას – რამიზ მეხტიევის სიძეს და კიდევ რამდენიმე ადამიანს 15 დღით ადმინისტრაციული პატიმრობა შეეფარდათ, მრავალი სტუმარი კი დაჯარიმდა.

ამ ინციდენტის შემდეგ, რამიზ მეხტიევმა დაკარგა თავისი ისედაც „მორყეული“ სავარძელი, მაგრამ ფაქტობრივად მაშინვე აირჩიეს აზერბაიჯანის მეცნიერებათა ეროვნული აკადემიის პრეზიდენტის პოსტზე. ახალ თანამდებობაზე მუშაობა სულ რამდენიმე დღის დაწყებული ჰქონდა, როდესაც მეხტიევმა აკადემიის ოფიციალურ ვებგვერდზე სტატია დაწერა და სასამართლო გარჩევით დაემუქრა აზერბაიჯანის პარლამენტის 16 დეპუტატს, რომლებმაც მისი მისამართით ცილისმწამებლური და შეურაცხმყოფელი განცხადებები გააკეთეს.

რამიზ მეხტიევი დეპუტატების წინააღმდეგ

მოკლე დროში ეს სტატია აკადემიის ვებგვერდიდან გაქრა, ასევე სასწრაფოდ წაშალეს ის თავიანთი გვერდებიდან მასმედიის საშუალებებმა.

მიუხედავად იმისა, რომ მეხტიევი თავის წერილში 16 დეპუტატს დაემუქრა, სასამართლო სარჩელში, როგორც წყარო ამტკიცებს, დასახელებულია 15 დეპუტატის სახელი. ჯერჯერობით მეცნიერებათა ეროვნული აკადემიის პრეზიდენტს ეს ინფორმაცია არ დაუდასტურებია.

მეხტიევის მიერ დადანაშაულებულმა ერთ-ერთმა დეპუტატმა, პროსახელისუფლებო პარტია „სამშობლოს“ ხელმძღვანელმა, ფაზაილ აღამალიმ აღნიშნა, რომ ვერც დაადასტურებს და ვერც უარყოფს ამ ინფორმაციას: „ჯერჯერობით შეტყობინება არ მიმიღია. მზად ვარ მონაწილეობა მივიღო რამიზ მეხტიევის სარჩელის სასამართლო განხილვაში. ვნახოთ, რას ითხოვს, რა სურს“.

დეპუტატი მინისტრის წინააღმდეგ

სავუშ ნოვრუზოვის მიერ შინაგან საქმეთა სამინისტროს წინააღმდეგ შეტანილი სარჩელიც ასევე პირდაპირ არის დაკავშირებული მეხტიევის შვილიშვილის ქორწილთან. საქმე ისაა, რომ ცერემონიაში მონაწილეობისთვის დაჯარიმებულთა შორის იყო თავად დეპუტატი ნოვრუზოვი და მისი მეუღლე – ომბუდსმენი საბინა ალიევა.

ნოვრუზოვს მიაჩნია, რომ შსს-მ საკუთარი ჯარიმით მისი სადეპუტატო ხელშეუხებლობა დაარღვია. დეპუტატის აზრით, კანონმდებლობა კარანტინის დროს პარლამენტის წევრის დასჯას არ ითვალისწინებს და მას შეუძლია იქ წავიდეს, სადაც მოისურვებს.

„ამ საკითხში უკან არ დავიხევ და კომპრომისზე არ წავალ. ევროპის სასამართლომდე მივალ. არ მივცემ უფლებას, რომ ასე მომექცნენ. ისინი, ვინც კანონი დაარღვია, კანონის წინაშე აგებენ პასუხს. კომპენსაციის სახით 400 ათას მანათს (დაახლოებით, 235 300 დოლარს) ვითხოვ და შემდეგ ამ ფულს ყარაბაღის ომში დაღუპულთა ოჯახებს დავურიგებ“, – აღნიშნა ნოვრუზოვმა.

მაგრამ, როგორც კი მისი ეს განცხადება მედიასაშუალებებში გავრცელდა, ნოვრუზოვმა სასწრაფოდ მისი უარყოფა სცადა. დეპუტატმა განაცხადა, რომ თავისი მოთხოვნა უკან მიაქვს. შემდეგ კი საერთოდ ჟურნალისტებს სთხოვა, „პოლიტიკაში ნუ გარევდნენ“.

ინსტიტუტის დირექტორი რამიზ მეხტიევის წინააღმდეგ

მეცნიერებათა აკადემიის პრეზიდენტად არჩევის შემდეგ, რამიზ მეხტიევმა თანამდებობიდან გაათავისუფლა აზერბაიჯანის მეცნიერებათა ეროვნულ აკადემიასთან არსებული მიწათმოქმედებისა და აგროქიმიის ინსტიტუტის დირექტორი, ალოვსატ ჰულიევი. მის ნაცვლად, ინსტიტუტის ხელმძღვანელის პოსტზე გარიბ მამედოვი დაინიშნა – მიწისა და კარტოგრაფიის სახელმწიფო კომიტეტის ყოფილი უფროსი.

თავის სარჩელში, ა. გულიევი ამტკიცებს, რომ ის თანამდებობიდან იმ დროს გაათავისუფლეს, როდესაც ბიულეტენზე იმყოფებოდა.