საქსტატი: საქართველოში უმუშევრობა გაიზარდა

2020 წლის მეორე კვარტალში საქართველოში უმუშევრობა წინა წლის შესაბამის პერიოდთან შედარებით თითქმის ერთი პროცენტით ( 0,9 %) გაიზარდა.

ჯამში საქართველოში უმუშევრობა 12,3 პროცენტს შეადგენს – ანუ სულ 455 100 ადამიანია უმუშევარი.

ამავე პერიოდში, კორონავირუსის პანდემიის გამო დაკარგული სამუშაოს კომპენსაციისთვის მთავრობის მიერ გამოყოფილი 200-ლარიანი დახმარებით 114 600-მა ადამიანმა ისარგებლა. 

• რამდენს კარგავს საქართველო კორონავირუსის გამო? საგარეო ვაჭრობა პანდემიის დროს – ციფრები

უმუშევრობის დონე უფრო ქალაქშია გაზრდილი (2.3 %), რაც ლოგიკურია, რადსგან სამუშაო ადგილები ქალაქში უფრო მეტია.

საქართველოში დასაქმებულად ითვლება თვითდასაქმებული ადამიანიც – მაგალითად, ის, ვინც სოფლად ცხოვრობს და საკუთარი მეურნეობა აქვს, ან აქვს რაიმე მცირე საწარმო, საიდანაც გარკვეულ შემოსავალს იღებს. 

შრომის საერთაშორისო ორგანიზაციის მეთოდოლოგიით, იმისთვის, რომ ადამიანი ჩაითვალოს დასაქმებულად, არ არის აუცილებელი რომ მას  ხანგრძლივვადიანი შრომითი ხელშეკრულება ჰქონდეს, ან დაქირავებით მუშაობდეს. 

დასაქმებულად ითვლებიან ის პირებიც, რომლებსაც აქვთ სამუშაო, მაგრამ სხვადასხვა მიზეზის გამო დროებით არ მუშაობენ. ასევე, პირები, რომლებიც საკუთარ ოჯახურ საწარმოში ყოველგვარი ანაზღაურების გარეშე (უსასყიდლოდ) მუშაობენ.