ელჩების კონფერენცია: საქართველოს პრეზიდენტს ადგილი არ დაუთმეს. რა თქვა თავის გამოსვლაში პრემიერმა
საქართველოს პრეზიდენტს ელჩების კონფერენციაზე ადგილი არ დაუთმეს
საქართველოს პრეზიდენტის ადმინისტრაციის განცხადებით, სალომე ზურაბიშვილი ელჩების კონფერენციას არ დაესწრო, რადგან მას პროტოკოლით განკუთვნილი ადგილი არ დაუთმეს.
საქართველოს ელჩების კონფერენცია დღეს, 26 დეკემბერს გაიხსნა. ღონისძიებაზე სიტყვით გამოვიდნენ საგარეო საქმეთა მინისტრი, ილია დარჩიაშვილი, პრემიერმინისტრი ირაკლი ღარიბაშვილი და პარლამენტის თავმჯდომარე, შალვა პაპუაშვილი.
“ყველას სუვერენიტეტს პატივს ვცემთ, მაგრამ ყველაზე მეტად ჩვენი ქვეყანა გვიყვარს”, – განაცხადა ირაკლი ღარიბაშვილმა.
მისივე თქმით, საქართველოს ხელისუფლებისთვის არ იყო სასიამოვნო იმ განცხადებების მოსმენა, რომელსაც “ვისმენთ უკრაინის ხელისუფლების” წარმომადგენლების მხრიდან, თუმცა პრემიერმა აქვე აღნიშნა, რომ ვინაიდან ქვეყანა და მათი მთავრობა არის ომში, ამიტომ ამ თემაზე ხელისუფლებას არ სურს ზედმეტი განცხადებების გაკეთება.
პრემიერმინისტრ ირაკლი ღარიბაშვილის თქმით, საქართველოს მთავრობამ ევროკავშირის წევრობის კანდიდატის სტატუსის მისაღებად ევროკომისიის მიერ განსაზღვრული 12 რეკომენდაცია “სწორად და ეფექტიანად” შეასრულა.
“პარლამენტში შექმნილი იყო სამუშაო ჯგუფები, სამწუხაროდ, მინდა აღვნიშნო, რომ ამ პროცესში არ იყვნენ სრულყოფილად ჩართულნი ოპოზიციური პარტიების წარმომადგენლები, თუმცა ბოლოს გარკვეულმა ნაწილმა მიიღო მონაწილეობა. მინდა ყველას გადავუხადო მადლობა, ვინაიდან, ეს იყო მართლაც შრომატევადი საქმე. ჩვენ ზედმიწევნით შევასრულეთ ყველა ის პირობა, რომელიც განგვესაზღვრა. დანარჩენი პროცესი მიმდინარეობს. მოგეხსენებათ, რომ გარკვეული კანონპროექტები ჩვენ გავაგზავნეთ ვენეციის კომისიაში, ახლა ველოდებით მათ დასკვნებს და ამის შესაბამისად მოვახდენთ ადაპტირებას”. – განაცხადა ღარიბაშვილმა ელჩების კონფერენციის გახსნაზე.
ირაკლი ღარიბაშვილმა კიდევ ერთხელ გაუსვა ხაზი, რომ 2022 წლის ზაფხულში უკრაინასა და მოლდოვისთვის კანდიდატის სტატუსის მინიჭება პოლიტიკური გადაწყვეტილება იყო და საქართველო მათზე “ორჯერ, სამჯერ წინაა”. მისივე თქმით, ღიად ითქვა, რომ უკრაინას მიენიჭა კანდიდატის სტატუსი, იმიტომ, რომ ომში იმყოფება, ასევე მოლდოვა ომთან გათანაბრებულ მდგომარეობად შეაფასეს:
“ასე რომ, ჩვენ კარგად გვესმის ეს მოტივაცია, თუმცა ჩვენ მხოლოდ წარმატებას ვუსურვებთ ჩვენს მეგობარ სახელმწიფოებს, მოლდოვასა და უკრაინას. გვინდა, რომ ამ ქვეყნებში იყოს მშვიდობა და კეთილდღეობა.”
საგარეო საქმეთა მინისტრმა, ილია დარჩიაშვილმა ელჩების კონფერენციაზე სიტყვით გამოსვლისას განაცხადა, რომ საქართველომ ღარიბაშვილის ლიდერობით, გარე საფრთხეებთან წარმატებით გამკლავება შეძლო.
“სხვა სიტყვებით რომ ვთქვა, 2022 წელს საქართველომ დაამტკიცა, რომ ქვეყნის სახელმწიფო ინსტიტუტებს შესწევს უნარი, გამოწვევებს ეფექტურად გაუმკლავდეს, რაც მდგრადი და წარმატებული სახელმწიფოს ნიშანია.” – თქვა დარჩიაშვილმა.
● “დემოკრატიული ლპობის საფუძველი ბიძინა ივანიშვილია” – დებატები ევროპარლამენტში საქართველოზე
● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს
● სენატორი ჯინ შაჰინი: საქართველოში უკუსვლაა – შესაძლოა გადავხედოთ სტრატეგიას დახმარებასთან დაკავშირებით
14 დეკემბერს ევროპარლამენტმა ევროკავშირთან საქართველოს ასოცირების შეთანხმების შესრულების შესახებ ყოველწლიური რეზოლუცია მიიღო. ევროპარლამენტმა საბოლოო რეზოლუციის მიღებამდე კენჭი უყარა ცალკეულ შესწორებებსაც, რომელთა უმეტესობასაც დეპუტატებმა მხარი დაუჭირეს.
აღნიშნულ დოკუმენტში შეტანილია ნოემბერში მიღებული კომპრომისული ცვლილებებიც, რომლის თანახმადაც ევროპარლამენტი რეკომენდაციას გასცემს, ქვეყანაში ბიძინა ივანიშვილის გადაჭარბებული გავლენები აღმოიფხვრას.
რეზოლუციაში შესული ერთ-ერთი ახალი შესწორების თანახმად, ივანიშვილის გადაჭარბებული გავლენების კონტექსტში, ევროპარლამენტარები მოუწოდებენ საბჭოსა და დემოკრატიულ პარტნიორებს, „მიიღონ შესაბამისი ზომები, მათ შორის, პირადი სანქციების დაწესება ივანიშვილზე და ყველა იმ პირზე, რომლებიც პასუხისმგებელი არიან დემოკრატიული პოლიტიკური პროცესის გაუარესებაზე“.
აღსანიშნავია, რომ ევროპარლამენტი კიდევ ერთხელ მოუწოდებს ხელისუფლებას, გაათავისუფლოს ექსპრეზიდენტი მიხეილ სააკაშვილი და შესაძლებელი გახადოს მისი საზღვარგარეთ მკურნალობა ჰუმანიტარულ საფუძველზე, როგორც პოლიტიკური პოლარიზაციის შემცირების საშუალება.
ამასთან, 14 დეკემბრის რეზოლუციით ევროპარლამენტი მოუწოდებს ხელისუფლებას, შეწყვიტოს პოლიტიკურად მოტივირებული სისხლის სამართლის საქმეები და გადახედოს საქმეებს მედიის თანამშრომლების, ხელისუფლების მიმართ კრიტიკული მედიების მფლობელების და მათი ოჯახის წევრების წინააღმდეგ. რეზოლუციაში პირდაპირაა ნახსენები “მთავარი არხის” დამფუძნებლის, ნიკა გვარამიას საქმე.
