საქართველოს ათობით მოქალაქე კვლავ სუდანში, საბრძოლო ზონაში რჩება

საქართველოს ათობით მოქალაქე კვლავ სუდანში რჩება

საქართველოს საგარეო საქმეთა სამინისტრომ ჯერჯერობით ვერ შეძლო საქართველოს 30-ზე მეტი მოქალაქისთვის უსაფრთხო დერეფნის უზრუნველყოფა, რათა მათ დატოვონ სუდანი, სადაც რამდენიმე დღის წინ სამხედრო კონფლიქტი დაიწყო.

დიპლომატიური წარმომადგენლობა ცდილობს დაეხმაროს საქართველოს მოქალაქეებს საერთაშორისო პარტნიორების მეშვეობით, თუმცა ამ დრომდე საშიშ ზონაში ჩარჩენილი ადამიანების გამოყვანა ვერ ხერხდება.

სუდანში ჩარჩენილი ქართველების დიდი ნაწილი ავიაკომპანიების Geosky-ის და MyWay Airline-ის თანამშრომლები არიან, ისინი ხართუმში სამსახურიდან მივლინებით იყვნენ ჩასული.

სუდანში, დედაქალაქ ხართუმში ჩარჩენილი ერთ-ერთი ქართველი მფრინავის ახლობელი გვიყვება, რომ ამ ეტაპზე აქვს კონტაქტი ოჯახის წევრთან. მისი თქმით, იგი სახლშია, იმ ზონასთან ძალიან ახლოს, სადაც სროლები და აფეთქებები მიმდინარეობს. როგორც მასთან საუბარში ამბობენ, ჯერჯერობით იქ მყოფებს აქვთ საკვები და სუფთა სასმელი წყალი. თუმცა საერთაშორისო მედიაში ვრცელდება ინფორმაცია, რომ საჭმლისა და წყლის მარაგები ქალაქში იწურება. ხართუმში ელექტრომომარაგების პრობლემაა, მობილურების დატენვას იქ მყოფი ქართველები ხანდახან გენერატორებით ახერხებენ.

როგორც ტვიტერზე ვრცელდება ინფორმაცია, ამერიკის სახელმწიფო მდივანთან ენტონი ბლინკეთან საუბრის შემდეგ ორივე დაპირისპირებული მხარე შესაძლოა დათანხმდეს 24 საათით ცეცხლის შეწყვეტაზე, რა დროსაც არის შანსი დაიგეგმოს ჰუმანიტარულ დერეფანი და მოხდეს ევაკუაცია.

“თუმცა, ეს ინფორმაცია ჯერ დაზუსტებული არ არის და არ ვიცით, მოხერხდება, თუ არა, ამ დერეფნით ქართველების გამოყვანა. 2 დღის წინ 3 საათიანი ჰუმანიტარული დერეფნის დროს მხოლოდ დაჭრილები გამოიყვანეს. როგორც ვიცი, პირველი ღამე იყო წუხელ, როდესაც სროლები შედარებით ნაკლები იყო,” – ამბობს სუდანში დარჩენილი ქართველის ოჯახის წევრი JAMnews-თან საუბარში.

ორივე ავიაკომპანიის წარმომადგენლები აცხადებენ, რომ სუდანში არის კომპანიის კუთვნილი თვითმფრინავები და მათ შეუძლიათ ამ თვითმფრინავებით უზრუნველყონ ევაკუაცია.

● ჰოთ-დოგების გაყიდვიდან ბახმუტთან ბრძოლებამდე – პუტინის “მზარეულის”, ევგენი პრიგოჟინის პორტრეტი
• მოსაზრება: „დაივიწყეთ, რომ პუტინი ლიბერალი არ არის. გაიხსენეთ მისი ომები“• რუსეთი სირიაში ბიზნესსაქმიანობას სამხრეთ ოსეთის გავლით აწარმოებს

შეიარაღებული კონფლიქტი სუდანში 16 აპრილს, გასამხედროებულ დაჯგუფება “სწრაფი რეაგირების ძალებსა” და ქვეყნის რეგულარულ არმიას შორის დაიწყო. სუდანის არმიამ დედაქალაქის მიმდებარედ, ომდურმანში, საჰაერო დარტყმები განახორციელა “სწრაფი რეაგირების ძალების” ბაზებზე.

დაღუპულია 100 მეტი ადამიანი.

დედაქალაქ ხართუმში აფეთქებები მოხდა, რის შედეგადაც ძირითადი ინფრასტრუქტურა დაზიანდა. ხარტუმის აეროპორტში სროლის დროს გაეროს ჰუმანიტარული საჰაერო სამსახურის თვითმფრინავი დაზიანდა. სუდანში დიპლომატიური მისიები უცხოელ მოქალაქეებს მოუწოდებენ, არ დატოვონ თავიანთი სახლები.

სუდანი მსოფლიოს ერთ-ერთი ყველაზე ღარიბი ქვეყანაა, მაგრამ მისი ბუნებრივი რესურსები, ისევე როგორც მისი სტრატეგიული მდებარეობა წითელ ზღვაზე, მსოფლიოს ყურადღებას იპყრობს, აღნიშნავს BBC News.

ვიდრე ეს ქვეყანა სუდანად და სამხრეთ სუდანად გაიყოფოდა, ის ტერიტიორიით აფრიკის უდიდესი ქვეყანა იყო. დღეს ის აფრიკის სიდიდით მესამე ქვეყანაა კონგოსა და ალჟირის შემდეგ. აქ 40 მილიონამდე ადამიანი ცხოვრობს.