"იქმნება შთაბეჭდილება, ვიღაცას სურს ჩაახშოს საქართველო-უკრაინის ურთიერთობები" - უკრაინის საქმეთა დროებითი რწმუნებული
საქართველო-უკრაინის ურთიერთობები
უკრაინის საქმეთა დროებითი რწმუნებული საქართველოში, მიხაილო ხარიშინი “ინტერპრესნიუსთან” ამბობს, რომ იქმნება შთაბეჭდილება, ვიღაცას სურს ჩაახშოს საქართველო-უკრაინის ურთიერთობები.
ხარიშინი უკრაინის მიერ საქართველოდან ელჩის გაწვევის მიზეზებზეც საუბრობს და განმარტავს, რომ, როდესაც უკვე მზადდებოდა უკრაინის პრეზიდენტის ბრძანებულება ელჩის დანიშვნის შესახებ, საქართველოს მთავრობის მაშინდელი მეთაურის მხრიდან გაუგებარი რიტორიკა წამოვიდა, რომელიც მისი თქმით, დაემთხვა ანტიუკრაინული და პრორუსული ძალების მიერ საქართველოში, საელჩოს შენობასთან გამართულ “პერფორმანსს” – შეურაცხმყოფელი პლაკატებითა და ლოზუნგებით უკრაინასთან მიმართებაში.
“სამწუხაროდ, მალე ასეთ რიტორიკას მიმართეს ზოგმა სხვა პოლიტიკოსებმა, ქართველმა, მათ შორის სამთავრობო სტრუქტურებისა და საპარლამენტო კორპუსის წარმომადგენლებმა. იქმნება შთაბეჭდილება, რომ ვიღაცას უნდა ჩაახშოს საქართველოსა და უკრაინას შორის ოდესღაც, გადაჭარბების გარეშე, სამაგალითო ურთიერთობები. რა თქმა უნდა, ასეთ ფონზე, როგორც სახელმწიფო, რომელიც პატივს სცემს საკუთარ თავს და პატივს სცემს სხვა სახელმწიფოებს, ისევე როგორც ნებისმიერი სხვა ნორმალური სახელმწიფო, უკრაინა ვერ დატოვებდა ამ ფაქტებს ყურადღების მიღმა”. – ამბობს ხარიშინი ინტერვიუში.
2022 წლის პირველ მარტს უკრაინაში მოხალისედ წასვლის მსურველებისთვის ჩარტერული რეისის გაუქმებისა და სანქციებზე “ამორალური პოზიციის” გამო პრეზიდენტმა, ვოლოდიმირ ზელენსკიმ საქართველოში უკრაინის ელჩი კონსულტაციებისთვის გაიწვია.
იმავე წლის 31 მარტს კი, ზელენსკიმ საქართველოდან და მაროკოდან ელჩების გაწვევის განკარგულებას ხელი მოაწერა.
მისივე თქმით, უკრაინა არაა წინააღმდეგი, რომ საქართველო-უკრაინის დიპლომატიური ურთიერთობები ელჩების დონეზე მიმდინარეობდეს, თუმცა იგი ამბობს, რომ ამისთვის უარყოფითი ფაქტორებისა და ტენდენციების თავიდან აცილებაა საჭირო:
“უკრაინაში ყოველთვის ყოველთვის ხაზს ვუსვამთ და ვიცავთ ამ წესს, რომ სამოქალაქო საზოგადოება უნდა იყოს მონაწილე და მთავარი ძალა ქვეყანაში არსებული ყველა მნიშვნელოვანი საზოგადოებრივი საკითხების გადაწყვეტისას. საზოგადოების, მოხალისეების გარეშე ძალიან გაგვიჭირდებოდა სრულმასშტაბიანი შემოჭრის დასაწყისში, მაშინ მთელი საზოგადოება გაერთიანდა.”
უკრაინის საქმეთა რწმუნებულის განმარტებით, ამ კონტექსტში უკრაინის საგარეო საქმეთა სამინისტრომ აპრილში, როდესაც საქართველოში “ცნობილი მოვლენები მიმდინარეობდა” (რუსული კანონის საწინააღმდეგო აქციები), მკაფიოდ განაცხადა, სხვა უფლებების გარდა, რომლებიც უნდა დაიცვან ამა თუ იმ ქვეყნებმა, რომლებიც თავს ევროპულად მიიჩნევენ, შედიან ევროპულ სტრუქტურებში, ქვეყნის მოქალაქეებს აქვთ მშვიდობიანი პროტესტის უფლება.
აქედან გამომდინარე, უკრაინა ვერ დაუჭერს მხარს უცხო ქვეყნის აგენტების კანონს იმ ფორმით, როგორითაც ის არის. ეს კანონი, როგორც მინიმუმ, უნდა გადაიხედოს, ანდა საერთოდ გაუქმდეს, როგორც ამას გთავაზობთ ევროპული ქვეყნების უმრავლესობა.
დავამატებ, რომ უკრაინამ უკვე გადაიტანა მსგავსი ეპიზოდი თავის ისტორიაში. ეს მოხდა 2013-2014 წლების ზღვარზე, უმაღლესმა რადამ იმ დროინდელი შემადგენლობით, მაშინ სამთავრობო პარტია „რეგიონები“ დომინირებდა, მიიღო კანონები, რომლებიც ზღუდავდნენ უკრაინელების თავისუფლებას, ეგრეთწოდებული დრაკონული კანონები.
ამან გამოიწვია მთელი უკრაინელი საზოგადოების გადატვირთვა. პარტია „რეგიონები“ სამუდამოდ გაქრა და მასთან ერთად სამარცხვინოდ გაიქცა უკრაინის მაშინდელი მეთაური ვიქტორ იანუკოვიჩი.
ასე რომ, ასეთია ჩვენი მიდგომები ამასთან დაკავშირებით”. – პასუხობს ხარიშინი ჟურნალისტის კითხვას იმის შესახებ, გადაუხვია თუ არა საქართველომ ევროატლანტიკურ კურსს.
საქართველოში უკრაინის საქმეთა დროებითმა რწმუნებულმა ისაუბრა მიხეილ სააკაშვილის პატიმრობაზეც და განაცხადა, რომ „ბატონი სააკაშვილის ფაქტორი“ საქართველოსთან ურთიერთობების განვითარებისთვის მნიშვნელოვანია. მისივე თქმით, “რაც შეეხება დიდ შეთქმულებაზე“ გაუგებარ განცხადებებს, ის ვერ იქნება ყოფილი მაღალჩინოსნების ექსტრადიციის საფუძველი.
როგორც მან აღნიშნა, 2022 წლის აპრილიდან უკრაინა ელის პასუხს საქართველოს იუსტიციის სამინისტროსადმი მოთხოვნაზე მიხეილ სააკაშვილის უკრაინაში გადაყვანის საკითხის განსახილველად საჭირო დოკუმენტების მიწოდების თხოვნით.
„საქართველოს მთავრობის ცალკეული წარმომადგენლების მხრიდან ჟღერს გაუგებარი განცხადებები, ბოდიშს ვიხდი ნატურალიზმისთვის, მაგალითად „დიდ შეთქმულებასთან“, „გლობალურ პარტიებთან“ და „მასონთა სამეფოსთან“ დაკავშირებით, ანუ გაუგებარი განცხადებებია, რომლებიც უფრო პოლიტიკური ხასიათისაა და ობიექტურად ვერ იქნება ამა თუ იმ პირთა პასუხისგებაში მიცემისა და ერთი ქვეყნიდან მეორეში შესაძლო ექსტრადიციის საკითხის განხილვის საფუძველი.
ეს არა მხოლოდ უკრაინას ეხება. მსგავსი განცხადებები ევროპის მთელი რიგი ქვეყნების მიმართაც ჟღერს, ისინი ერთი და იგივე პირებს ეხება, რომლებიც უკრაინასთან მიმართებაშიც ჟღერს ანუ რომ განვიხილოთ ესა თუ ის საკითხი, უნდა იყოს ნათლად გამოკვეთილი სამართლებრივი საფუძვლები.“ – განაცხადა მიხაილო ხარიშინიმ.
გამოხმაურება
ელჩის ინეტრვიუს გამოეხმაურა საქართველოს პრემიერმინისტრი ირაკლი კობახიძე. მისი თქმით, საქართველო დარჩება ცალმხრივი მეგობრობის რეჟიმში, რადგან “ეს უკრაინელ ხალხს” სჭირდება.
,,ელჩი უკრაინის ხელისუფლებამ საქართველოდან გაიწვია 2022 წლის 1 მარტს ანუ ომის დაწყებიდან მეხუთე დღეს და ამისათვის დასახელდა 2 საბაბი. ერთი იყო რუსეთისთვის სანქციების არ დაწესება და დღეს ოპოზიცია აცხადებს ღიად, რომ რუსეთისთვის სანქციების დაწესება არ იქნებოდა სწორი, ჩვენს გზავნილებს იმეორებენ ახლა, ორი წლის თავზე. მეორე საბაბი იყო ის, რომ ჩვენ არ გავგზავნეთ უკრაინაში მთავრობის ოფიციალური თანხმობით მებრძოლი მოხალისეები ჩვენი თვითმფრინავებით.
ამ ორი საბაბით და არა მიზეზით უკრაინის ხელისუფლებამ გაიწვია საქართველოს ელჩი, შესაბამისად, აშკარაა რა იყო მოტივი ამ ყველაფრის უკან, რაზეც ღიად საუბრობდნენ მოგვიანებით უკრაინის ხელისუფლების წარმომადგენლები, გახსოვთ, [მიხაილო] პოდოლიაკი, [ოლექსი] დანილოვი ღიად მოგვიწოდებდნენ მეორე ფრონტის გახსნას. […] აქედან გამომდინარე, თუ ვინმეს რამე აქვს გადასახედი, ეს არის სწორედ უკრაინის ხელისუფლება, რომელმაც უნდა გადახედოს საკუთარ გადაწყვეტილებას ელჩის გაწვევის თაობაზე, რაც იყო უკიდურესად არამეგობრული გადაწყვეტილება.” – თქვა კობახიძემ.
„ხალხის ძალის“ დეპუტატმა, გურამ მაჭარაშვილმა ჟურნალისტებთან აღნიშნა, რომ “სამწუხარო მოცემულობა” იყო ის, რომ უკრაინის ხელისუფლებამ აბსოლუტურად უსაფუძვლოდ გაიწვია ელჩი და შეწყვიტა ურთიერთობები ელჩის დონეზე.
მისივე თქმით, უკრაინის ხელისუფლების მხრიდან ცალმხრივად იყო უსაფუძვლო და ანტიქართული გადაწყვეტილებები.
არავის ვადანაშაულებ ტყუილში, საერთოდ არ მაინტერესებს ეგ რწმუნებული რას ამბობს. ვამბობთ, რომ უკრაინასთან დაკავშირებით ჩვენ აბსოლუტურად ყველა მხარდაჭერა აღმოვუჩინეთ მას, გარდა ერთისა, რომ ქალებისა და ბავშვების ხოცვაში ვერ შევეშველეთ, რასაც ითხოვდნენ.
ამაში ვერ დავეხმარეთ. დანარჩენი ჩვენ ყველაფერი გავაკეთეთ და უკრაინის ხელისუფლებას ყველა დახმარება აღმოვუჩინეთ. 400-მდე საერთაშორისო აქტში მივიღეთ მონაწილეობა.
სამწუხაროდ, უკრაინის ხელისუფლების მხრიდან ცალმხრივად იყო უსაფუძვლო და ანტიქართული გადაწყვეტილებები. თუ ეს სიტუაცია შეიცვლება, ამ შემთხვევაში ჩვენ მაშინაც ვიყავით უკრაინის სახელმწიფოს მომხრე, ახლაც ვართ, მაგრამ ის გაუგებარი, არასწორი და ანტიქართული გადაწყვეტილებები, რა თქმა უნდა, მიუღებელი რჩება.“ – განაცხადა მაჭარაშვილმა.
