პრეზიდენტის მიმართვა დამოუკიდებლობის დღეზე: საზოგადოება არ დათმობს ევროპულ არჩევანს. კიდევ რა თქვა ზურაბიშვილმა

სალომე ზურაბიშვილის მიმართვა დამოუკიდებლობის დღეზე

საქართველოს პრეზიდენტმა სალომე ზურაბიშვილმა 26 მაისისადმი მიძღვნილ ღონისძიებაზე სიტყვით გამოსვლისას განაცხადა, რომ საზოგადოება არ დათმობს ევროპულ არჩევანს და “დროა”, მთავრობამ შეასრულოს პირობა.

კიდევ რა თქვა საქართველოს პრეზიდენტმა:

●  ჩვენს უკრაინელ მეგობრებს, მინდა ვუსურვო ქვეყნის გამარჯვება და გამთლიანება. ამ ახალი მსოფლიო წესრიგის მოლოდინში დღეს ჩვენი საზოგადოება, როგორც ხელისუფლება გზაგასაყარზეა. საზოგადოებამ თავისი სიტყვა თქვა და გამოხატა თავისი ნება – საქართველომ უნდა გააგრძელოს დამოუკიდებლობის გამყარების და გამთლიანების, ევროპული დემოკრატიის ჩამოყალიბების და ევროპულ ოჯახთან შეერთების გზა.

● ნათელია, რომ საზოგადოება არ დათმობს საკუთარი შვილების მომავალს, არ დათმობს თავის ევროპულ არჩევანს. დემოკრატიის პირველი წესია, რომ უნდა შეასრულო ის, რისთვისაც ხალხმა აგირჩია. ქართველ ხალხს ყველა ხელისუფლება ამ პირობას აძლევდა, დღევანდელმა ხელისუფლებამაც ქართველ ხალხს ეს პირობა მისცა, კონსტიტუციით გაამყარა ევროინტეგრაციის გზა.

● დღეს, როცა ქართველი ხალხი ისევ ამ გზაზეა და ითხოვს მისი ნების აღსრულებას ხელისუფლება სადაა? ხელისუფლებისთვის დრო აღარ ითმენს, რომ დაუბრუნდეს საკუთარ სიტყვას, გამოცხადებულ მიზანს და შეასრულოს ხალხისთვის მიცემული პირობა. ხელისუფლებამ ამ დარჩენილ დროში უნდა იფიქროს იმაზე, თუ რისი შესრულება შეუძლია, არა იმიტომ, რომ ვინმე გვკარნახობს, არამედ იმიტომ, რომ ეს ქვეყნის სამშვიდობოზე გაყვანის გზაა და ამას ალტერნატივა არ გააჩნია.

● ჩვენმა წინაპრებმა, დიპლომატია, დაბალანსებული პოლიტიკა და სიფრთხილეც კარგად იცოდნენ, თუმცა ეს ღირსებას და პრინციპულობას მოკლებული არასოდეს ყოფილა. არ არსებობს ხალხი, რომელსაც ომის არ ეშინია. ომის სისასტიკე ჩვენსავით, ცოტამ თუ იცის და ცოტას თუ ესმის, მაგრამ საკუთარ საზოგადოებაში შიშის გაღვივება, რაც ადვილია იმ ქვეყანაში, რომელსაც უამრავი შემოსევა და დაპყრობა ახსოვს ან ამით მანიპულირება ვერ გახდება წარმატებული მართვის ფორმულა.

● გაუგებარი და შეურაცხმყოფელია, როცა დღეს ვითვლით, თუ რამდენ მილიონს მოგვიტანს “ფრენების საჩუქარი”. ნუთუ ჩვენი ღირსება 200 თუ 300 მილიონად იყიდება?! და ახლა ამ ტრიბუნიდან მინდა მივმართო გიორგი ანწუხელიძის და გიგა ოთხოზორიას ოჯახებს. მე, როგორც ამ ქვეყნის უმაღლესი მთავარსარდალი ბოდიშს გიხდით იმ შეურაცხყოფისთვის, რომელიც არა მხოლოდ თქვენი, არამედ მთელი ქვეყნის შეურაცხყოფაა!

● გაუგებარი გახდა ჩვენი საგარეო პოლიტიკა. კონსტიტუციაში კი ევროპაა ჩაწერილი – ყოველდღიური განცხადებები კი ევროპისგან გვაშორებს და იზოლაციისკენ მივყავართ. ისმის კითხვა სად გაქრა სიტყვები “ევროპა ჩვენი ცივილიზაციური არჩევანია”.

● ჩვენ ვექიშპებით და ვლანძღავთ ჩვენს მეგობარ და პარტნიორ ქვეყნებს, ქვეყნებს, რომლებმაც 30 წლის განმავლობაში დახმარების ხელი გამოგვიწოდეს – დაგვეხმარნენ სახელმწიფოს მშენებლობაში და ჩამოყალიბებაში, სამაგიეროდ კი მათ, ვინც ჩვენი ტერიტორიების ოკუპაციას ახდენს დღემდე ვეგებებით და ვუფრთხილდებით.

● გაუგებარია, როცა ევროპას და ამერიკას ყველაფერს აბრალებ, მეორე ფრონტის გახსნის მცდელობას, ქართველობის წართმევას, გარყვნილებას და მაინც, საკუთარ შვილებს ევროპასა და ამერიკაში უშვებ, საქართველოში კი ახალ თაობას ევროპულ მომავალს უსპობ.

● ჩვენი ხალხისთვის გაუგებარი და შეურაცხმყოფელია, როცა ხელისუფლება საკუთარი მოქალაქეების პატივისცემასა და ღირსებაზე არ ფიქრობს. გაუგებარი და შეურაცხმყოფელია, როცა ჩვენს პოლიციას შეუძლებელ ამოცანას ვუსახავთ და გამოწვევის წინაშე ვაყენებთ. ყველას კარგად გვესმის, რომ ქვეყანა, რომელსაც ოკუპირებული ტერიტორიები გააჩნია და მის ტერიტორიაზე რუსის ჯარია, განსაკუთრებულად უნდა იცავდეს სტაბილურობას.

● როგორ დავიჯეროთ, რუსეთის პოლიტიკა საკუთარი ინტერესის გარდა რამეზეა დამოკიდებული? ვინც ფიქრობს, რომ რუსეთი ტერიტორიებს დაგვიბრუნებს ჩვენი დათმობების სანაცვლოდ, მას ჩვენი ისტორიიდან არაფერი უსწავლია. ან კიდევ, როგორ დავიჯეროთ, რომ ოკუპანტი შეიძლება ჩვენი თანამემამულეების კეთილდღეობაზე ზრუნავდეს? ნუთუ, გვავიწყდება ჩვენს მოქალაქეებს აფხაზეთში, ცხინვალში ვინ ავიწროებს და ვინ იტაცებს?

● კარგად ვხედავთ, დღეს ვინ ცდილობს უკრაინის ოკუპაციას და იმასაც ვხედავთ რომ მსოფლიო იცვლება, რუსეთის უძლეველობის მითი დამსხვრეულია და ხვალინდელ გეოპოლიტიკურ სივრცეში აღარ უნდა არსებობდეს ოკუპირებული ტერიტორიები.

● გაუგებარია, რატომ არანაირი ზომა და სამართლიანი რეგულაციები არაა მიღებული რუსეთიდან მასიურად შემოსულებისთვის და მათი საქმიანობისთვის, განსაკუთრებით კი ისეთ სფეროებში, როგორიცაა ჯანდაცვა და განათლება, თუნდაც უძრავ ქონების შეძენა და დაწესებული გადასახადების გადაუხდელობა.

● პრეზიდენტი “მილიონ ქართველზე”: ოცნების წევრები ტყუილად აპელირებენ რაღაც ფსევდოპატრიოტულ გრძნობებზე
● “განხილულ უნდა იქნას სამთვიანი ვიზების დაწესება” – საქართველოს პრეზიდენტი უსაფრთხოების საბჭოს შეკრებას ითხოვს
● სენატორები შაჰინი და რიში: საქართველოს მთავრობის უკუსვლა გვაიძულებს ადმინისტრაციას ზომების მიღება ვთხოვოთ

შეფასებები

პრემიერმინისტრ ირაკლი ღარიბაშვილის თქმით, “დღევანდელ ურთულეს გეოპოლიტიკურ ვითარებაში” საქართველოს ხელისუფლება და ქართველი ხალხი ევროპისაგან “ველით ერთადერთ სწორ” და სამართლიან გადაწყვეტილებას, საქართველოს საუკუნოვანი მისწრაფების, ხელისუფლებისა და ხალხის ერთიანი ძალისხმევის აღიარებას:

“ევროკავშირის კანდიდატის სტატუსის მონიჭებას. ევროპის მხრიდან ჩვენი დამსახურების სამართლიანი აღიარება იქნება ისტორიული ნაბიჯი, რომელიც ხელს შეუწყობს ქვეყანაში პოლარიზაციის დასრულებას, მშვიდობისა და სტაბილურობის განმტკიცებას, ჩვენი ქვეყნის შემდგომ წინსვლას.” 

“ქართული ოცნების” დეპუტატმა, მაკა ბოჭორიშვილმა საქართველოს დამოუკიდებლობის დღეზე პრეზიდენტ სალომე ზურაბიშვილის გამოსვლა შეაფასა და განაცხადა, რომ მისი გზავნილები საზოგადოების მეტი გაყოფისკენ იყო მიმართული.

“ეს ნამდვილად არ არის ის ფორმატი და დღე, როდესაც, შეიძლება, საქართველოს პრეზიდენტმა მსგავსი გზავნილები გააჟღეროს. ეს არის დღესასწაული, რომელსაც საქართველოს თითოეული მოქალაქე ზეიმობს, ეს არის საქართველოს დღე და ჩვენი, ყველას ვალია, მათ შორის, პრეზიდენტისაც, რომ ეს სადღესასწაულო განწყობა და ეს სურვილი, რაც საქართველოს აქვს, რომ იყოს თავისუფალი, დამოუკიდებელი, ევროპაში ინტეგრირებული – ჩვენი საერთო მიზანი იყოს და არა გამყოფი გზავნილები ჟღერდებოდეს საქართველოს ხელისუფლების წარმომადგენლების მხრიდან. სამწუხაროდ, დღეს პრეზიდენტის გზავნილები მიმართული იყო არა საზოგადოების კონსოლიდაციისკენ, არამედ, მეტი გაყოფისკენ.” – განაცხადა ბოჭორიშვილმა.

მმართველი პარტიის კიდევ ერთმა დეპუტატმა, ირაკლი ქადაგიშვილმა განაცხადა, რომ პრეზიდენტის სიტყვა არ შეეფერებოდა საქართველოს დამოუკიდებლობას:

“გავაპროტესტე იმიტომ, რომ მისი სიტყვა არ შეეფერებოდა საქართველოს დამოუკიდებლობას, დღევანდელ ფიცის დადებას და არ შეეფერება საქართველოს.”