საკონსტიტუციო სასამართლოს დასკვნა: პრეზიდენტმა კონსტიტუცია დაარღვია
პრეზიდენტმა კონსტიტუცია დაარღვია
საქართველოს საკონსტიტუციო სასამართლო მიიჩნევს, რომ საქართველოს პრეზიდენტმა, სალომე ზურაბიშვილმა ქვეყნის კონსტიტუცია დაარღვია, როდესაც ევროკავშირის ქვეყნებში, მთავრობის თანხმობის გარეშე იმოგზაურა.
დასკვნა დღეს, 16 ოქტომბერს საქკონსტიტუციო სასამართლოს პლენუმმა გამოაცხადა.
სასამართლოს ცხრა წევრიდან განსხვავებული პოზიცია 3-მა დააფიქსირა – ირინე იმერლიშვილმა, გიორგი კვერენჩხილაძემ და თეიმურაზ ტუღუშმა.
რას ნიშნავს ეს გადაწყვეტილება:
ეს ნიშნავს იმას, რომ პროცესი ახლა პარლამენტში გადავა. პარლამენტმა კენჭი უნდა უყაროს სალომე ზურაბიშვილის იმპიჩმენტს.
პრეზიდენტის გადაყენებას 100 ხმა სჭირდება.
საკონსტიტუციო სასამართლოს მხრიდან თანამდებობის პირის მიერ კონსტიტუციის დარღვევის დადასტურების შემთხვევაში, პარლამენტი სასამართლოს დასკვნის მიღებიდან ორი კვირის ვადაში პლენარულ სხდომაზე განიხილავს და კენჭს უყრის თანამდებობის პირის იმპიჩმენტის წესით გადაყენების საკითხს. პარლამენტის გადაწყვეტილებით, ეს პლენარული სხდომა შეიძლება დახურულად გამოცხადდეს.
დეტალები:
საკონსტიტუციო სასამართლომ პრეზიდენტის იმპიჩმენტის წარდგინების განხილვა 5 ოქტომბერს დაასრულა. პლენუმი სამი დღის განმავლობაში უსმენდა მხარეებს.
სხდომებს არ დასწრებია პრეზიდენტი სალომე ზურაბიშვილი. მის ინტერესებს სასამართლოზე იცავდნენ თამარ ჩუგოშვილი – პარლამენტის ყოფილი ვიცე-სპიკერი და ქართული ოცნების ყოფილი წევრი, და მაია კოპალეიშვილი – საკონსტიტუციო სასამართლოს ყოფილი მოსამართლე.
ბეგრაუნდი:
პირველ სექტემბერს მმართველმა პარტიამ „ქართულმა ოცნებამ“ იმპიჩმენტის პროცესი დაიწყო და განაცხადა, რომ პრეზიდენტმა უხეშად დაარღვია კონსტიტუცია, როდესაც მთავრობის თანხმობის გარეშე უცხო ქვეყნებში რამდენიმე ვიზიტი განახორციელა.
კერძო, საუბარია სამ სამუშაო ვიზიტზე: 2023 წლის 31 აგვისტოს გერმანიის ფედერაციული რესპუბლიკის პრეზიდენტთან, 2023 წლის 1 სექტემბერს ევროპული საბჭოს პრეზიდენტთან და 2023 წლის 6 სექტემბერს საფრანგეთის პრეზიდენტთან.
ზურაბიშვილის თქმით, უცხოურ ვიზიტებში ის საკუთარი სახსრებით დადის და საზღვარგარეთ საქართველოსთვის ევროკავშირის კანდიდატის სტატუსის მინიჭებას ლობირებს.
კონტექსტი:
ოქტომბერში საქართველო ელოდება მნიშვნელოვან გადაწყვეტილებას ევროკავშირის წევრობის კანდიდატის სტატუსის მონიჭებასთან დაკავშირებით. პროევროპულად განწყობილი პრეზიდენტის წინააღმდეგ იმპიჩმენტის პროცედურის დაწყება შემაშფოტებელი სიგნალი იქნება საქართველოს ევროპელი პარტნიორებისთვის, ფიქრობენ პოლიტიკური მიმომხილველები.
პროგნოზი:
პრეზიდენტის იმპიჩმენტს 100 დეპუტატის ხმა სჭირდება. “ქართულ ოცნებას” ხმების აღნიშნული რაოდენბობა არ აქვს. ოპოზიციის შიგნითვე არ გამორიცხავენ, რომ “ქართულმა ოცნებამ” შესაძლოა მოახერხოს ოპოზიციის ზოგიერთი წარმომადგენლის გადაბირება და იმპიჩმენტისთვის საჭირო 100 ხმის მოგროვება. ოპოზიციური პარტიების წარმომადგენლები ერთმანეთისკენ იშვერენ ხელს, თუმცა კეთდება ზოგადი განცხადებები და კონკრეტულად თუ ვინ შეიძლება გადაიბიროს ოცნებამ, არავინ ასახელებს.
