"მხარს ვუჭერთ ანგარიშის შინაარსს" - სახდეპი ღარიბაშვილის განცხადებას ეხმაურება

სახელმწიფო დეპარტამენტი ირაკლი ღარიბაშვილის ბრალდებებს ეხმაურება

ამერიკის შეერთებული შტატების სახელმწიფო დეპარტამენტი პრემიერმინისტრ ირაკლი ღარიბაშვილის ბრალდებებს ეხმაურება და აცხადებს, რომ ადამიანის უფლებათა შესახებ ყოველწლიური ანგარიშის შინაარს მხარს უჭერენ. ამის შესახებ თეთრმა სახლმა ტელეკომპანია “ფორმულას” კითხვების საპასუხოდ განაცხადა.

21 მარტს ირაკლი ღარიბაშვილმა თქვა, რომ აშშ-ის სახელმწიფო დეპარტამენტის ანგარიში მათთვის საინტერესო არ არის. პრემიერის მტკიცებით, “ანგარიში მომზადდა ე.წ. ელიტური არასამთავრობო ორგანიზაციების” მიერ მიწოდებული ინფორმაციებით.

“თქვენ მიერ ნახსენები ფაქტები [5 ივლისი, აფგან მუხთარლის საქმე] არ შეესაბამება სიმართლეს, ეს არის მხოლოდ სპეკულაციები და ცალკეული პოლიტიკურად ანგაჟირებული, მიკერძოებული ადამიანების მიერ მოყვანილი ცრუ, მოგონილ ინფორმაციებზე დაყრდნობილი დასკვნები და ანგარიში, ეს ჩვენთვის არ არის საინტერესო. 10 წლის წინ და უფრო ადრეც, როცა მაგალითად ქვეყანაში იყო სისტემური კორუფცია, სისტემური დანაშაული, ხდებოდა ადამიანების წამება, გაუპატიურება, მკვლელობა, ბიზნესის წართმევა, მედიათავისუფლება საერთოდ არ არსებობდა, არც ერთი თავისუფალი ტელეარხი არ არსებობდა, მე არ მახსენდება ის ფაქტები, რომელიც მაგალითად სახელმწიფო დეპარტამენტის ანგარიშში არის მოყვანილი, რაც სამწუხაროა.” – თქვა ღარიბაშვილმა.

ამერიკის შეერთებული შტატების სახელმწიფო დეპარტამენტმა 2022 წელს საქართველოში ადამიანის უფლებების მდგომარეობის შესახებ ანგარიში 20 მარტს გამოაქვეყნა. დოკუმენტში პოლიტიკური პატიმრების შესახებ სახდეპი ტელეკომპანია “მთავარის” დირექტორზე, ნიკა გვარამიაზე საუბრობს. ამასთან, აშშ-ს სახელმწიფო დეპარტამენტის ანგარიში მოიცავს წამების ან არაადამიანური, სასტიკი და დამამცირებელი მოპყრობის შესახებ ფაქტებს და ამავე ქვეთავში ექსპრეზიდენტ მიხეილ სააკაშვილის მიმართ ხელისუფლების მოპყრობაზეა საუბარი.

თეთრი სახლის მტკიცებით, “მთავრობის მარცხმა, დაესაჯა 5 ივლისის ორგანიზატორები”, ძალადობის დაუსჯელობა გამოიწვია. დოკუმენტში სერიოზულ პრობლემადაა მოხსენიებული საქართველოში სასამართლო სისტემის დამოუკიდებლობა პრობლემურ გამოძიებებთან და პოლიტიკურად მოტივირებულ დევნასთან ერთად. 

როგორც თეთრი სახლის პრესსამსახურში აცხადებენ, ცნობები, რომლებიც შეშფოთებას იწვევდა, ეხებოდა კანონის უზენაესობას, მათ შორის დევნას, რომელსაც ბევრი პოლიტიკურად მოტივირებულს უწოდებს. გარდა ამისა, თეთრ სახლში განმარტავენ, რომ გააგრძელებენ ქართველ ხალხთან პარტნიორობას და ხელისუფლებას აუცილებელი რეფორმების გატარებისკენ მოუწოდებენ. 

განცხადებაში აღნიშნულია, რომ ეს არის ადამიანის უფლებათა შესახებ 47-ე ანგარიში, რომელიც სახელმწიფო დეპარტამენტმა წარუდგინა კონგრესს და ადამიანის უფლებათა ყველა წინა ანგარიში საჯაროდ არის ხელმისაწვდომი ონლაინ:

“ჩვენ მოვუწოდებთ მათ, ვინც დაინტერესებულია წინა ანგარიშების შინაარსით, გადახედონ. თითოეული ანგარიში შეიცავს სქოლიოს, თუ არსებობს კითხვები კონკრეტულად ინფორმაციის წყაროებთან დაკავშირებით, რაზეც დაფუძნებულია ანგარიში.”

დეპარტამენტი განცხადებაში ასევე ხაზს უსვამს, რომ შეშფოთების სარწმუნო ცნობები ეხებოდა კანონის უზენაესობას, მათ შორის სასამართლოს დამოუკიდებლობასთან დაკავშირებულ სერიოზულ პრობლემებს, დევნას, რომელსაც ბევრი პოლიტიკურად მოტივირებულად მიიჩნევს, და გამოხატვის თავისუფლებასთან – მაგალითად, ნიკა გვარამიას სასამართლო დევნა, გასამართლება და პატიმრობა – ბევრი პოლიტიკურად მოტივირებულად მიიჩნევს.

თეთრი სახლის განმარტებით, კანონის უზენაესობის კუთხით კიდევ ერთი პრობლემა ეხება “ხელისუფლების უუნარობას ჩაატაროს სარწმუნო გამოძიება და პასუხისგებაში მისცეს 2021 წლის ღირსების მარშის წინ ძალადობის ორგანიზატორები”, რამაც გამოიწვია დაუსჯელობა ამ ძალადობისთვის.

● ევროკავშირის საგარეო მინისტრები საქართველო-მოლდოვაში პრორუსი ოლიგარქების სანქცირებას ითხოვენ – POLITICO
● “რისკია”, “რეკომენდაციები გათვალისწინებული არაა” – ვენეციის კომისიის დასკვნა დეოლიგარქიზაციაზე და სასამართლოზე
● სახელმწიფო დეპარტამენტი: 5 ივლისის საქმეზე არც ერთი ორგანიზატორი არ დასჯილა

“ბოლო 30 წლის განმავლობაში ჩვენ ერთად ვმუშაობდით საქართველოს შესახებ ჩვენი საერთო ხედვისკენ, რომელიც სრულად არის ინტეგრირებული ევროატლანტიკურ ოჯახში და არის ერთიანი, თავისუფალი და მშვიდობიანი ევროპის ნაწილი. ჩვენ გავაგრძელებთ პარტნიორობას ქართველ ხალხთან, რადგან ისინი ისწრაფვიან დემოკრატიული, აყვავებული და ევროატლანტიკური მომავლისკენ. ჩვენ კვლავ მოვუწოდებთ საქართველოს ხელისუფლებას გაატაროს აუცილებელი რეფორმები, რათა მოიპოვოს ევროკავშირის კანდიდატი ქვეყნის სტატუსი და ეს გააკეთოს გამჭვირვალედ, ისე, რომ მოიცავდეს ყველა დაინტერესებულ მხარეს.

უკრაინის წინააღმდეგ რუსეთის არაპროვოცირებული ომი ხაზს უსვამს საქართველოსა და უკრაინის სოლიდარობისთვის ერთად დგომის აუცილებლობას. ქართველმა ხალხმა ძალიან კარგად იცის, რუსული აგრესიული ქმედებები, მათ შორის დეზინფორმაცია, ე.წ. ბორდერიზაცია და მასობრივი გადასახლება, როგორ იწვევს უთვალავ პრობლემასა და ნგრევას”, – აღნიშნულია სახელმწიფო დეპარტამენტის პასუხში.