"საიდუმლო ფაილები“: აფხაზეთში სამთავრობო კომპლექსის შტურმის დროს აღებულ დოკუმენტებს სწავლობენ
კომპრომატები აფხაზეთის ხელისუფლებაზე
15 ნოემბერს აფხაზეთში, რუსეთ-აფხაზური საინვესტიციო შეთანხმების რატიფიკაციის წინააღმდეგ მომიტინგეების მასა შეიჭრა სამთავრობო შენობების კომპლექსში – ე.წ. მინისტრთა კაბინეტში და ასლან ბჟანიას ადმინისტრაციაში (რომელიც რამდენიმე დღის შემდეგ გაათავისუფლეს).
თავისთავად, შეიძლება ითქვას, რომ ასეთი შეჭრები უკვე ჩვეულებრივი მოვლენა გახდა აფხაზეთისთვის: ეს უკვე მოხდა 2004, 2014 და 2020 წლებში. მაგრამ წელს პირველად, დემონსტრანტებმა ოფიციალური პირების ოფისებიდან აიღეს კომპიუტერები, დოკუმენტები, წერილები, ჩანაწერები, ბლოკნოტები და მყარი დისკებიც კი. როგორც ჩანს, ოპოზიცია ასლან ბჟანიას ხელისუფლებაზე კომპრომანტს ეძებს და პოულობს კიდეც.
დოკუმენტები სოციალურ ქსელებში თავდასხმის პირველივე დღესვე გამოჩნდა.
ფაილებშია ფულის გაცემის განკარგულება “ამცახარას” წევრებისთვის. ასევე განკარგულებები იარაღის მინიჭების შესახებ სხვადასხვა პერსონებისთვის. პრიორიტეტული ამოცანების ჩამონათვალი, რომლებიც აფხაზეთმა უნდა შეასრულოს კრემლის დავალებით. ასლან ბაჟანიას წერილი რუსეთის პრეზიდენტს, ვლადიმირ პუტინს, რომელშიც მოსკოვის ირგვლივ სპეციალური სიგნალებით, მისივე მანქანით მოგზაურობას გულისხმობს.
ამ და ბევრ სხვა დოკუმენტს ახლა ოპოზიციის ადვოკატები გულდასმით სწავლობენ. მათი თქმით, ამ დოკუმენტებიდან ზოგიერთი შესაძლოა გახდეს ბჟანიას ხელისუფლების წინააღმდეგ სისხლის სამართლის საქმის აღძვრის საფუძველი.
თვითმხილველების თქმით, პირველი, რაც გააკეთა ვიცე-პრემიერმა და ეკონომიკის მინისტრმა კრისტინა ოზგანმა სამთავრობო კომპლექსის შტურმის წინ ოფისიდან გასვლამდე, საბუთების გატანა იყო, რადგან აფხაზურ-რუსული პროექტების უმეტესობა ოზგანის მეშვეობით ხდებოდა.
- დე ფაქტო აფხაზეთს საპრეზიდენტო არჩევნებამდე სასწრაფო რეფორმების გატარებას სთავაზობენ
- კოალიციური მთავრობა და რეფორმები, ახალი საპრეზიდენტო არჩევნები – გამოსავალი პოლიტიკური ჩიხიდან აფხაზეთში?
თუმცა, როგორც ოპოზიციის წარმომადგენლები აცხადებენ, საბუთების დიდი ნაწილი მინისტრს თავად წაართვეს.
თავდასხმის ერთ-ერთი თვითმხილველი ამბობს, რომ როდესაც მომიტინგეები შენობებში შეიჭრნენ, ბევრმა მათგანმა სხვადასხვა ძვირფასი ნივთი – მედლები, მონეტები და იარაღიც კი წაიღო. მაგრამ ორგანიზატორებმა სწრაფად მოახდინეს რეაგირება და ძვირფასი ნივთები დააბრუნეს.
შეუსრულებელი დაპირებები
დოკუმენტი სახელწოდებით “პრიორიტეტული ამოცანების სია (აფხაზეთის რესპუბლიკა)“ – რომელშიც არსებითად არის ბჟანიას კრემლის წინაშე ვალდებულებების ჩამონათვალი – შეიცავს რამდენიმე პუნქტს. არცერთი მათგანი არ განხორციელებულა ოპოზიციისა და სამოქალაქო საზოგადოების წინააღმდეგობის გამო.
პირველი პუნქტი რუსებისთვის აფხაზეთში საცხოვრებლების შეძენის უფლების მინიჭებაა. ეს უნდა გაკეთებულიყო 2022 წლის 31 დეკემბრამდე.
ამავე თარიღისთვის, აფხაზურ მხარეს ენერგეტიკის სექტორში რუსული ინვესტიციების შეზღუდვა უნდა მოეხსნა.
და სწორედ იმ საინვესტიციო ხელშეკრულების ხელმოწერა, რომელმაც საბოლოოდ დაასრულა ასლან ბჟანიას ზეობა, 2022 წლის სექტემბერში უნდა მომხდარიყო.
სიაში ასევე მითითებულია თურქეთიდან და ახლო აღმოსავლეთიდან რეპატრიანტებისთვის აფხაზეთის მოქალაქეობის მინიჭების პრაქტიკის გამკაცრება. ალბათ, ამ ვალდებულების შეუსრულებლობამ გამოიწვია აფხაზეთზე თურქული გავლენის შესახებ ბრალდებების აურზაური, რომელიც ბოლო დროს იღვრება ანონიმური ტელეგრამის არხებიდან და ფეისბუქის ანგარიშებიდან.
იდუმალი აბრევიატურა
ასლან ბჟანიას მაგიდაზე ხელნაწერი იპოვეს: შემდეგი აბრევიატურით: M.V.
რას ნიშნავს “M.V” ჯერ კიდევ გაურკვეველია. სხვადასხვა ვერსიით, ეს შეიძლება იყოს “მაისის შეჭრა“, “ახალგაზრდობის აჯანყება“, “საერთაშორისო გავლენა“ და ა.შ.
„მნიშვნელოვანია არა ეს, არამედ ის, თუ როგორ მოემზადა პრეზიდენტი მოვლენების ასეთი განვითარებისთვის. ის მზად იყო დაეკავებინა ოპონენტების ახლობლები“, – ამბობს თავდასხმის ერთ-ერთი მონაწილე.
ბანკეტი მინისტრებისთვის, მოციმციმე სიგნალები პრეზიდენტისთვის
მაგრამ ხალხზე განსაკუთრებული შთაბეჭდილება მოახდინა ბანკეტზე გაჟონილმა ხარჯებმა, რომელიც, როგორც ჩანს, მიმდინარე წლის მაისში მინისტრთა კაბინეტში შედგა. საჭმელზე 72 ათას რუბლზე მეტი დაიხარჯა [დაახლოებით $690], ხოლო მინისტრთა კაბინეტმა ალკოჰოლი 142 ათას რუბლად [1365 დოლარად] იყიდა. ეს ობიექტურად საკმაოდ დიდი თანხებია, აფხაზეთის სტანდარტებით კი უზარმაზარი.
ასევე, სოციალური ქსელის მომხმარებლები აქტიურად აკეთებენ კომენტარს ბჟანიას პუტინისადმი მიწერილ წერილზე, სადაც ის მოსკოვის გარშემო მოციმციმე შუქებით მოძრაობის უფლებას ითხოვს.
მათ ასევე განათავსეს ონლაინ ინფორმაცია პრეზიდენტის საინფორმაციო ცენტრის შესახებ: პერსონალი, თანამშრომელთა ხელფასები და ჰონორარი ექსპერტებისთვის, რომლებსაც საინფორმაციო ცენტრი პერიოდულად იწვევს გარკვეული მოვლენების შესახებ კომენტარისთვის.
იურისტები ამბობენ, რომ მოპოვებული ყველა დოკუმენტის გამოქვეყნებას არა მხოლოდ აზრი არ აქვს, არამედ შეიძლება უარყოფითი შედეგები მოჰყვეს, რადგან ბევრი მათგანი ნამდვილად საიდუმლოა. მაგრამ თითოეული ნაშრომი ყურადღებით უნდა იყოს შესწავლილი და იურიდიული შეფასება უნდა მიეცეს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
