"ქართულმა ოცნებამ" კვლავ შეუშალა ხელი მოსამართლეების კორუფციის საკითხზე საგამოძიებო კომისიის შექმნას
გაზიარება
გაზიარება
საგამოძიებო კომისიის შექმნა
მმართველმა პარტიამ, “ქართულმა ოცნებამ” დღეს კვლავ არ გაიარა რეგისტრაცია პარლამენტის სხდომაზე, შესაბამისად კვორუმის არარსებობის გამო, კვლავ ვერ მოხერხდა სასამართლო სისტემაში კორუფციის გამოძიებისთვის დროებითი საგამოძიებო კომისიის შექმნა
საჭირო იყო 76 დეპუტატის რეგისტრაცია, თუმცა მხოლოდ 52-მა გაიარა.
სასამართლო სისტემაში არსებული კორუფციული ფაქტების გამოსაძიებლად სპეციალური საგამოძიებო კომისიის შექმნა ოპოზიციის ინიციატივაა. ხელისუფლების ოპონენტებმა მას შემდეგ დააყენეს, რაც 5 აპრილს, შეერთებულმა შტატებმა სანქციები დაუწესა ოთხ მოსამართლეს – სამ მოქმედსა და ერთს ყოფილ მოსამართლეს. სანქციების მიზეზად სწორედ კორუფციაში ჩართულობა იყო დასახელებული. ეს პირველი პერსონალური სანქციები იყო აშშ-ის მხრიდან საქართველოს მოქალაქეების წინააღდეგ.
პირველად საგამოძიებო კომისიის შექმნის საკითხი პარლამენტის დღის წესრიგში 18 აპროლს დადგა, თუმცა “ქართული ოცნების” დეპუტატებმა სხდომაზე რეგისტრაცია არ გაიარეს და კვორუმის არარსებობის გამო საკითხი ჩავარდა.
იგივე განმეორდსა დღესაც, 19 აპრილს. ოცნების დეპუტატებმა კვლავ არ გაიარეს რეგისტრაცია და შესაბამისად, პროცედურულად ისევ არ დადგა მოსამართლეთა საქმიანობაზე საგამოძიებო კომისიის შექმნის საკითხი.
“ოცნების” დეპუტატები ღიად აცხადებენ, რომ არ სურთ საგამოძიებო კომისიის შექმნა “მოსამართლეების სოლიდარობის” ნიშნად.
“კოლეგებო, ჩვენ ისევ ვუცხადებთ მხარდაჭერას სასამართლოს დამოუკიდებლობას და სოლიდარობას ქართველ მოსამართლეებს და აქედან გამომდინარე დღესაც, რა თქმა უნდა, საპარლამენტო უმრავლესობა არ გაივლის რეგისტრაციას”, – თქვა მმართველი პარტიის თავმჯდომარემ, ირაკლი კობახიძემ.
პროცედურულად, იმისთვის რომ მოსამართლეთა საქმიანობის შემსწავლელი საპარლამენტო კომისია შეიქმნას, აუცილებელია რეგისტრაცია გაიაროს დეპუტატების ნახევარზე მეტმა. ეს მიზანი ვერ მიიღწევა საპარლამენტო უმრავლესობის გარეშე.
აშშ-ის სახელმწიფო დეპარტამენტმა კორუფციისთვის სანქციები დაუწესა მოსამართლეებს მიხელ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს. სახელმწიფო მდივანმა, ენტონი ბლინკენმა აღნიშნა, რომ ამ მოსამართლეების დასანქცირების მიზეზია ის, რომ მათ ბოროტად გამოიყენეს საკუთარი თანამდებობები.
სანქცირებასთან დაკავშირებით აშშ აცხადებს, რომ ჰქონდათ სანდო ინფორმაცია, რის თანახმადაც, მოსამართლეები ბოროტად იყენებდნენ საჯარო თანამდებობას კორუფციულ გარიგებებში მონაწილეობით.
უკვე წლებია საქართველოში ოპოზიცია და არასამთავრობო სექტორის წარმომადგენლები სასამართლო სისტემის პრობლემებზე მუდმივად საუბრობენ და მიუთითებენ, რომ არსებობს მოსამართლეთა ე.წ. კლანი. კლანის საკვანძო ფიგურებად სწორედ აშშ-ის მიერ სანქცირებული მოსამართლეები სახელდებოდნენ.
