"აფხაზეთს რუსეთის ვალი 110 მილიონი დოლარი ექნება და აეროპორტს დაკარგავს" - მოსაზრებები ახალ შეთანხმებაზე
გაზიარება
გაზიარება
რუსი ინვესტორი და აეროპორტი აფხაზეთში
აფხაზეთის პარლამენტმა მოახდინა რუსეთის მთავრობასთან შეთანხმების რატიფიცირება, რომლის თანახმადაც „რუსული იურიდიული პირი განახორციელებს საინვესტიციო პროექტს სოხუმის საერთაშორისო აეროპორტის ხელახალი ამუშავებისა და შემდგომი ოპერირების მიზნით“.
მარტივად რომ ვთქვათ, დამტკიცდა ხელშეკრულება, რომელიც რუს ინვესტორს საშუალებას აძლევს აღადგინოს და გამოიყენოს სოხუმის აეროპორტი.
33 დეპუტატიდან რატიფიცირებას მხარი 30-მა დაუჭირა, ორმა წინააღმდეგი იყო, ხოლო ერთმა დეპუტატმა თავი შეიკავა.
რატომ თვლის ხელისუფლება ამას დადებით გადაწყვეტილებად, მაშინ როცა თითქმის ყველა დამოუკიდებელი ექსპერტი აპროტესტებს და აფხაზეთის ხელისუფლებას აფრთხილებს კატასტროფულ შედეგებზე?
აფხაზეთის ეკონომიკის მინისტრის, კრისტინა ოზგანის განცხადებით, აეროდრომის ინფრასტრუქტურა და საჰაერო ტერმინალის კომპლექსი, რომელიც ისტორიული და კულტურული მემკვიდრეობის ობიექტია, სახელმწიფო საკუთრებაში რჩება, უბრალოდ აეროპორტის ინფრასტრუქტურა გადადის კერძო საკუთრებაში.
დამოუკიდებელი ექსპერტების არგუმენტები
საზოგადოებაში დეპუტატების გადაწყვეტილება უარყოფითად იქნა აღქმული. კერძოდ, იმის გამო, რომ ამგვარად აფხაზეთი რუსეთს 10 მილიარდი რუბლის [დაახლოებით 110 მილიონი დოლარის] ვალი ექნება.
საზოგადო მოღვაწემ თენგიზ ჯოპუამ ეს ჯანსაღი თირკმლის გაყიდვას ძვირად ღირებული სპორტული ფეხსაცმელების შესაძენად შეადარა.
„ახლა წარმოიდგინეთ, რომ თქვენ უბრალოდ კი არ იყიდეთ ისინი, არამედ ისესხეთ, რისთვისაც ბანკმა გირაოს სახით თირკმელი გთხოვა. მაგრამ არც ეს არის ყველაზე სასაცილო. სასაცილო ის არის, რომ ამ სესხის დასაფარად 50 წელი მოგიწევს რომ გუთანი ათრიო. მართლა სულელურია“, – წერს ჯოპუა.
ეკონომისტი ახრა არისტავა კი დარწმუნებულია, რომ საბოლოოდ აფხაზეთს მოუწევს მთელი აეროპორტის დათმობა რუსეთსთვის. ის ამტკიცებს, რომ შეუძლებელი იყო სასესხო ვალდებულებების აღება იმაე მეტით, ვიდრე ბიუჯეტის შემოსავალია – იმ იმედით, რომ ამ თანხებს გამოიმუშავებს აეროპორტი, როცა დაიწყებს მუშაობას:
„რა მოხდება, თუ რამე არასწორად გაკეთხება? თუ ამ სესხს ვერ დავფარავთ, საერთაშორისო პრაქტიკის შესაბამისად, მოგვიწევს მთელი აეროპორტის დათმობა. ამიტომ შეუძლებელია არარეალური ვალდებულებების აღება. მე კი მესმის ჩვენი ხელისუფლების – მათ ძალიან უნდათ აეროპორტის გახსნა. მაგრამ როგორ ვენდოთ რუსეთის მთავრობას? მათ ზუსტად იციან ჩვენი შესაძლებლობები და ამ შეთანხმებას მაინც აწერენ ხელს.“
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
