რუსეთსა და აზერბაიჯანს შორის დაძაბულობა იზრდება. კრემლი უკვე აზერბაიჯანულ მედიას ბლოკავს
უკრაინაში რუსეთის სამხედრო აგრესიის დაწყების შემდეგ, ქვეყნის ხელისუფლების მიერ კონტროლირებადმა აზერბაიჯანულმა მედიამ ღიად პროუკრაინული პოზიცია დაიკავა. ომის დაწყებიდან ერთ თვეში “როსკომნადზორმა” ოთხი აზერბაიჯანული საინფორმაციო საიტი დაბლოკა. საპასუხოდ, ოფიციალური ბაქო მოსკოვს ადექვატური ზომების გატარებით დაემუქრა იმ რუსული მედიის წინააღმდეგ, რომელიც აზერბაიჯანის საწინააღმდეგო ინფორმაციას ავრცელებს.
- რატომ შეიჭრა რუსეთი უკრაინაში, რა სურს პუტინს და როგორ შეიძლება დასრულდეს ომი?
- ომი უკრაინაში. ვის მხარეს არის აზერბაიჯანი?
რა ხდება?
მხოლოდ გასულ შაბათ-კვირას, აზერბაიჯანის თავდაცვის სამინისტროს ორჯერ მოუწია რუსეთის თავდაცვის სამინისტროს მიერ დაშვებული შეცდომის გამოსწორება. თუ პირველ შემთხვევაში რუსული მხარის მიერ დაშვებულ ტერმინოლოგიურ შეცდომებზე იყო საუბარი, 27 მარტს აზერბაიჯანის თავდაცვის უწყებამ რუსი კოლეგები, პრაქტიკულად, ტყუილში ამხილა.
დაძაბულობა იმ ქვეყნებს შორის, რომელთა ლიდერებმა მოკავშირეთა ურთიერთობების შესახებ მემორანდუმს 2022 წლის 22 თებერვალს მოაწერეს ხელი, მედიასაშუალებებშიც იზრდება.
ამის მიზეზი გახდა აზერბაიჯანული მედიის, მათ შორის ხელისუფლების მიერ კონტროლირებადი მედიის მხრიდან უკრაინული პოზიციის ღია მხარდაჭერა. აზერბაიჯანის ტელევიზიაში, რადიოსა და ელექტრონულ გამოცემებში უკრაინის ომი დეტალურად შუქდება, აზერბაიჯანელი ჟურნალისტები კიევიდან და ლვოვიდან მაუწყებლობენ. ჟურნალისტურ მასალებში ისინი რუსეთის ჯარs ოკუპანტს უწოდებენ.
აზერბაიჯანული მედიის ამგვარი ანტირუსული რიტორიკა მოსკოვში შეუმჩნეველი არ დარჩენილა.
უკრაინაში ომის დაწყების შემდეგ, “როსკომნადზორმა” დაბლოკა წვდომა ოთხ აზერბაიჯანულ საინფორმაციო საიტზე: haqqin.az, minval.az, oxu.az და baku.ws.
რუსეთის ხელისუფლების ეს ნაბიჯი უყურადღებოდ არც ოფიციალურმა ბაქომ დატოვა.
ბაქომ მიანიშნა, რომ დაბლოკვაც იცის
აზერბაიჯანის ციფრული განვითარებისა და ტრანსპორტის სამინისტრომ გააფრთხილა ვებგვერდები, რომლებიც ქვეყნის ინტერესების წინააღმდეგ ავრცელებენ ინფორმაციას. სამინისტროს გაფრთხილებაში იკითხება, რომ ქვეყნის შიგნით და მის ფარგლებს გარეთ ნებისმიერი საიტის საქმიანობის შეზღუდვის საკითხი აზერბაიჯანის კანონმდებლობით რეგულირებას ექვემდებარება:
„თუ ამ რესურსებზე ქვეყნის ინტერესების, ტერიტორიული მთლიანობისა და კანონმდებლობის წინააღმდეგ მიმართული ინფორმაცია გამოქვეყნდება, ამ საიტების საქმიანობასთან დაკავშირებით შესაბამისი ზომების მიღება შესაძლებელი იქნება“, – განაცხადეს სამინისტროში რუსეთის ფედერაციის მიერ აზერბაიჯანულ მედიებზე დაწესებული შეზღუდვების პასუხად.
აზერბაიჯანის პრესის საბჭოს განცხადება
რამდენიმე აზერბაიჯანულ საიტზე რუსეთში წვდომის აკრძალვაზე, აზერბაიჯანის პრესის საბჭომ განცხადება გაავრცელა:
„რუსეთის ფედერაციამ აზერბაიჯანის მედიასაშუალებები დაბლოკა
მიზეზი აშკარაა. რუსეთი არ არის კმაყოფილი აზერბაიჯანული მედიის გზავნილებით უკრაინის შესახებ, ობიექტური პოზიციით, რომელსაც ის იკავებს რუსეთ-უკრაინის ომში.
რუსეთი აშკარად უგულებელყოფს სიტყვისა და გამოხატვის თავისუფლებას, პლურალიზმს. ეს არის საერაშორისო ნორმებისა და პრინციპების უგულვებელყოფა. ამავე დროს, ეს არის რუსეთის საზოგადოების უფლების შეზღუდვა, მიიღოს ობიექტური ინფორმაცია, გაეცნოს ალტერნატიულ აზრს“, – ნათქვამია აზერბაიჯანის პრესის საბჭოს განცხადებაში.
ექსპერტის კომენტარი
პოლიტიკური მიმომხილველის აგშინ კარიმოვის შეფასებით, რუსეთი აზერბაიჯანული პრესის წინააღმდეგ, იგივე “საინფორმაციო ბომბებს”იყენებს, რასაც უკრაინის წინააღმდეგ ომში.
„რუსეთმა თავის ტერიტორიაზე დაბლოკა სამი აზერბაიჯანული ვებგვერდი, რომლებიც აქვეყნებენ ანალიტიკურ მასალებს უკრაინის ომის შესახებ და ავრცელებენ უახლეს ამბებს რუსული აგრესიის შესახებ.
უბრალოდ მიაქციეთ ყურადღება, ვინ აკეთებს ამას – ის რუსეთი, რომელიც “აფურთხებს” ჟურნალისტიკის ყველა პრინციპს, ინარჩუნებს ინფორმაციის დამახინჯების ხაზს თავისი იმპერიული პროპაგანდის ინტერესებისთვის.
რუსული მედია, თავისი აგიტაციის მეთოდებით, თავად ითავსებს გადაჭარბებულ ფუნქციას. ჩვენ ამას უკვე წლებია ვხედავთ. 44-დღიანი ომის დროს, აზერბაიჯანის წინააღმდეგ სიბინძურით სავსე მასალები ქვეყნდებოდა იმ მედიაში, რომელიც კრემლის პროპაგანდისტულ იარაღადაა ქცეული.
არც მინდა დავასახელო ის საიტები და ტელეარხები, რომლებიც ყველასთვის ცნობილია თავისი არაკეთილსინდისიერებით. მაგრამ, მიუხედავად ამისა, 44-დღიანი ომის დროს, აზერბაიჯანს მაინც არ დაუბლოკავს ის მედიები, რომლებიც იდეოლოგიურ ბრძოლას აწარმოებდნენ ჩვენი ქვეყნის წინააღმდეგ. იმიტომ, რომ აზერბაიჯანი ამ ბრძოლაში მართალი იყო და ტყუილი, რომელიც ყველას აწუხებდა, ამის ფონზე ძალიან მცირე ჩანდა.
და რას აკეთებს აზერბაიჯანული პრესა, რუსეთის მიერ დაბლოკილი საიტები? ისინი უბრალოდ სიმართლეს გადასცემენ მკითხველს, ოფიციალურ წყაროებზე დაყრდნობით. ეს მედია მუშაობს ჟურნალისტურ პრინციპებზე დაყრდნობით და არ უერთდება ანტირუსულ კამპანიას.
რუსეთს სურს აზერბაიჯანული საიტების დაბლოკვით შური იძიოს დასავლეთზე წაგებული საინფორმაციო ომის გამო. ამდენად, აზერბაიჯანი კი არ აგებს, არამედ, თავად რუსეთი.
გვაქვს ასეთი ანდაზა: როგორი ძლიერიც არ უნდა იყოს ძმარი, ის მხოლოდ მის ჭურჭელს დააზიანებს. და ეს ანდაზა დღეს მშვენივრად ერგება ოფიციალურ მოსკოვს.
კარგი იქნება, თუ რუსეთი ცოტა შეამსუბუქებს თავის ხასიათს, პრესასთან მუშობის მექანიზმს შექმნის და საიტების დაბლოკვის ნაცვლად, საინფორმაციო ბიულეტენების სიხშირეს გაზრდის. არ არის კარგი მთელი ბრაზის აზერბაიჯანზე გადანთხევა უკრაინის ომის შედეგად მიღებული ეკონომიკური და სამხედრო დანაკარგების გამო.
აზერბაიჯანს დიდი ხანია იმუნიტეტი აქვს მსგავსი ამბების მიმართ და საბოლოოდ, ისევ რუსეთს მოუწევს უკან დახევა. ამიტომ, ღირს უსამართლო გადაწყვეტილების გაუქმება, ”- განაცხადა კერიმოვმა.
