რუსეთის საბაჟო ცხინვალის ნომრიან მანქანებს კვლავ პრობლემებს უქმნის
ცხინვალის სანომრე ნიშნებიანი მანქანების მფლობელებს რუსეთის საზღვრის გადაკვეთისას კვლავ პრობლემები ექმნებათ.
პრობლემა სულ მცირე წელიწადნახევარია არსებობს. ყველაფერი 2019 წლის სექტემბერში დაიწყო, როდესაც ევრაზიის საბაჟო კავშირის კანონმდებლობა ამოქმედდა, რამაც ცხინვალის მცხოვრებლებისთვის, მათ შორის რომლებსაც რუსეთის მოქალაქეობა აქვთ, მოგზაურობა ძალიან გაურთულა ან შეუძლებელი გახადა. იმავდროულად, ცხინვალის რეგიონში საკვები და სამრეწველო საქონელი თითქმის მთლიანად რუსეთიდან შემოდის და ბევრი ადგილობრივი მცირე მეწარმე თავს ამ საქმიანობით ირჩენს.
ამის შესახებ ბლოგერმა ალიკ ფუხაევმა და ავტომფლობელთა საინიციატივო ჯგუფის წევრებმა ალან ზოოლოევმა და ტიმურ კოკოევმა youtube არხ Rajdian-ზე ისაუბრეს.
2019 წლის სექტემბრიდან დაიწყო ევრაზიის საბაჟო კავშირის კანონმდებლობის გამოყენება ცხინვალის რეგიონის მოსახლეობის მიმართ.
რუსეთთან სამოკავშირეო შეთანხმების თანახმად, ცხინვალელებს რუსეთში დარჩენა და საზღვრის გადაკვეთა შეუზღუდავად შეუძლიათ. თუმცა, როგორც აღმოჩნდა, ეს მათ მფლობელობაში მყოფ მანქანებზე არ ვრცელდება.
მას შემდეგ, რაც ადგილზე საპროტესტო გამოსვლები დაიწყო, სიტუაცია დროებით მოგვარდა. შემდეგ დროებითი რეჟიმი გაგრძელდა კორონავირუსის პანდემიის გამო. თუმცხა, ახლა ავტომობილების მფლობელებს აფრთხილებენ, რომ 31 მარტის შემდეგ, შეღავათები აღარ იქნება.
- გაივლიან თუ არა რუსეთ-საქართველოს ტრანზიტული ტვირთები აფხაზეთისა და სამხრეთ ოსეთის ტერიტორიას?
- ცხინვალი: მოსახლეობა აღშფოთებულია რუსული საბაჟოს ახალი წესებით
- ჩრდილოეთ ოსეთი-საქართველო: უხილავი კავშირები
”ხალხს პრობლემები ექმნება მანქანების შემოყვანასთან დაკავშირებით, წელიწადნახევრის წინანდელი ამბავი მეორდება, ბევრი ადამიანი შეიძლება მანქანების გარეშე დარჩეს”, – ამბობს ალიკ ფუხაევი.
ალან ზოოლოევის განცხადებით, სამხრეთ ოსეთის ნომრის მქონე ავტომობილების ბევრ მძღოლს, რომლებიც რუსეთიდან სამხრეთ ოსეთში მიემგზავრებიან, დაბრუნებისას ავტომანქანის დროებითი შემყვანის ხელახლა გაფორმებაზე უარს ეუბნებიან, იმის გამო, რომ ისინი ბოლო ექვსი თვის განმავლობაში რუსეთში იმყოფებოდნენ და, შესაბამისად, აღარ აქვთ უცხო ქვეყნების ნომრების მქონე მანქანებით შესვლის უფლება.
”ამავე დროს, ისინი იღებენ მონაცემებს ევრაზიის ეკონომიკური კავშირის ტერიტორიაზე მათი ყოფნის შესახებ, მონაცემთა ბაზებიდან, რომლებიც მანქანებს ეხება… მაგრამ ეს ძალიან სადავო საკითხია, ისინი კანონმდებლობას თავისებურად განმარტავენ.”
მან განმარტა, რომ თუ მანქანა დიდი ხნის განმავლობაში რუსეთის ტერიტორიაზე იყო, ეს არ ნიშნავს, რომ მისი მფლობელიც იქ იყო. იმიტომ, რომ არის შემთხვევები, როდესაც სამხრეთ ოსეთიდან მანქანას, მაგალითად, ჩრდილოეთ ოსეთში შესაკეთებლად ტოვებენ, მაგრამ თავად პატრონი სახლში ბრუნდება. ხოლო თავად მფლობელის გადაადგილების შესახებ მონაცემებს საბაჟოზე არ ამოწმებენ.
კოკოევისა და ზოლოევის თქმით, საინიციატივო ჯგუფის შეხვედრაზე საბაჟო სამსახურის წარმომადგენლებთან ვერაფერი გადაწყდა და ჯერჯერობით უცნობია, როგორ შეიძლება პრობლემის მოგვარება, რომელიც ათასობით ავტომობილის მფლობელის ეხება.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
