იზოლაციის აღლუმი. როგორ ჩაიარა მოსკოვში მეორე მსოფლიო ომში გამარჯვების 75 წლისთავმა
რუსეთმა 24 ივნისს, მეორე მსოფლიო ომში გამარჯვების 75 წლისთავის აღსანიშნავად, პომპეზური სამხედრო აღლუმი ჩაატარა. თუმცა, მოსკოვში ჩასულ უცხოელ სტუმრებს შორის დასავლური სამყაროს ლიდერები არ ყოფილან. აღლუმს არც რუსეთისადმი ლოიალური სომხეთის, აზერბაიჯანისა და ცენტრალური აზიის ლიდერები დასწრებიან.
”რუსეთმა იმდენად დააზიანა თავისი რეპუტაცია, რომ მოკავშირეებიც კი მას თავს არიდებენ”, – მიიჩნევენ ექსპერტები.
აღლუმი 9 მაისს უნდა ჩატარებულიყო – ფაშისტურ გერმანიაზე გამარჯვების დღეს, მაგრამ დღესასწაული კორონავირუსის პანდემიის გამო გადაიდო.
აღლუმში 15 ათასამდე ჯარისკაცი და 200–ზე მეტი ერთეული სამხედრო ტექნიკა და თვითმფრინავი, მათ შორის მეორე მსოფლიო ომის დროინდელი, მონაწილეობდა.
უცხოელი სტუმრები – ვინ ჩამოვიდა და უარი ვინ თქვა
აღლუმზე რუსეთის პრეზიდენტის მოწვევით უცხოელი ლიდერები ჩავიდნენ – კრემლის ოფიციალური ცნობით, აღლუმს ესწრებოდნენ ბელარუსის, უზბეკეთის, ბოსნია და ჰერცეგოვინის, ყაზახეთის, ყირგიზეთის, მოლდოვას, ტაჯიკეთის, სერბეთის მეთაურები.
აღლუმზე ასევე იმყოფებოდნენ სამხრეთ ოსეთისა და აფხაზეთის ლიდერები.
- რუსეთის ახალი კონსტიტუცია: „მარადიული“ პუტინი, ღმერთი და რუსი ხალხის განსაკუთრებული როლი
- მოსაზრება: ორი სამშობლო. რა განსხვავებაა რუსეთსა და უკრაინას შორის
- მოსაზრება: „დაივიწყეთ, რომ პუტინი ლიბერალი არ არის. გაიხსენეთ მისი ომები“
საერთაშორისო და რუსული მედია წერს, რომ ბევრმა პრეზიდენტმა, რომელთანაც რუსეთს კარგი ურთიერთობა აქვს, დღესასწაულზე დასწრებაზე სხვადასხვა საბაბით უარი თქვა.
რუსული “ნოვაია გაზეტა” ყურადღებას ამახვილებს იმ მიზეზებზე, რის გამოც სახელმწიფოს მეთაურებმა მოსკოვში ჩასვლაზე უარი თქვეს. მაგალითად, სომხეთისა და აზერბაიჯანის ლიდერებმა ერთი და იგივე მოტივაცია გამოიყენეს – საკუთარ ქვეყანაში პანდემიის წინააღმდეგ ბრძოლის აუცილებლობის შესახებ.
თურქმენეთის პრეზიდენტმა გურბანგული ბერდიმუჰამედოვმა ის მიზეზი დაასახელა, რომ მას “წინასწარმეტყველის ასაკი” შეუსრულდა. ისლამში 63 წლის ასაკს ასე უწოდებენ და ეს თარიღი ოჯახთან ერთად უნდა აღინიშნოს.
ხორვატიის პრეზიდენტმა ზორან მილანოვიჩმა უარი თქვა მოსკოვში გამგზავრებაზე იმის გამო, რომ მისი თვითმფრინავი მოულოდნელად გაფუჭდა.
“მოსკოვს უბრალოდ თავს არიდებენ”
სტუმრების ასეთი შემადგენლობა, ისევე მათი, ვინც ჯერ დათანხმდა, შემდეგ კი უარი თქვა, სრულ ჩავარდნას ნიშნავს, მიიჩნევენ ექსპერტები.
”რუსეთის რეჟიმი მსოფლიო საზოგადოებრივი აზრის თვალში იმდენად დისკრედიტირებულია, რომ მასთან საქმის დაჭერა საზიანოა. განსაკუთრებული საჭიროების გარეშე მოსკოვში წასვლა არავის სურს. რატომ უნდა აკრიტიკებინონ თავი?” – მოჰყავს “ნოვაია გაზეტას” პოლიტოლოგ აბას გალიამოვის კომენტარი.
პოლიტიკური გეოგრაფიის სპეციალისტი დმიტრი ორეშკინი დასძენს, რომ შესაძლოა უცხოელი ლიდერები დამატებით უხერხულობაში ჩააგდო ვლადიმირ პუტინის ბოლო განცხადებებმა იმის შესახებ, რომ საბჭოთა კავშირის დაშლისას ”რუსეთის მიწები” სხვა სახელმწიფოების შემადგენლობაში უსამართლოდ აღმოჩნდა, ასევე მისმა ინგლისურენოვანმა სტატიამ მეორე მსოფლიო ომის შესახებ.
”ეს რაღაც მასშტაბური იზოლაციაა. საფრანგეთის პრეზიდენტი მაკრონიც თითქოს აპირებდა ჩამოსვლას და გადაიფიქრა. ისეთი ტრენდი შეიქმნა, რომ მოსკოვს უბრალოდ ყველა არიდებს თავს,” – თქვა მან.
ის რაც ხდება, კრემლისთვის მტკივნეული დარტყმაა, დარწმუნებულია გალიამოვი.
”საზოგადოებრივი აზრის გამოკითხვებმა აჩვენა, რომ რუსებს არ მოსწონთ იზოლირების იდეა. ერთია ამბოხება უსამართლობის წინააღმდეგ, რასაც ამერიკა მსოფლიოში ახორციელებს და მთელი დაჩაგრული სამყარო რომ შენ მოგყვება. და სულ სხვაა, როდესაც აღმოჩნდები ისეთი მარგინალი, ვისთვისაც ხელის ჩამორთმევა არავის სურს“, – ხსნის იგი საზოგადოებაში გაბატონებულ განწყობებს.
