როგორი იყო ალან გაგლოევის პირველი შეხვედრა პუტინთან და რატომ არიან უკმაყოფილო ცხინვალში
ალან გაგლოევის შეხვედრა პუტინთან
ალან გაგლოევის პირველი შეხვედრა პუტინთან შედგა. სამხრეთ ოსეთის ე.წ. პრეზიდენტმა რუსეთის პრეზიდენტთან შეხვედრა თანამდებობის დაკავებიდან მხოლოდ ათი თვის შემდეგ მოახერხა.
ჩვენ გიყვებით, როგორ ჩაიარა შეხვედრამ და რატომ არ არიან ამ შეხვედრით კმაყოფილი ცხინვალში.
“მსუბუქი მინიშნება”?
ცხინვალში ბევრმა გაამახვილა ყურადღება იმ ფაქტზე, რომ ალან გაგლოევის პირველი შეხვედრა ვლადიმირ პუტინთან შედგა ყირიმის რეფერენდუმის წლისთავზე, “რომლის შემდეგაც ნახევარკუნძული რუსეთის ნაწილი გახდა“.
მათ მიიჩნიეს, რომ ეს იყო არა მხოლოდ დამთხვევა, არამედ „დახვეწილი მინიშნება“ გაგლოევისთვის, რომელმაც პრეზიდენტად არჩევისთანავე გააუქმა სამხრეთ ოსეთის რუსეთში შესვლის შესახებ რეფერენდუმი, რომელიც დაგეგმილი იყო მისი წინამორბედის, ანატოლი ბიბილოვის მიერ.
ყურადღებას იქცევს ისიც, რომ შეხვედრა არ იყო დაგეგმილი პროტოკოლის მიხედვით. კერძოდ, ორ პრეზიდენტს შორის არსებულ მაგიდაზე არ იყო რუსეთისა და სამხრეთ ოსეთის დროშები.
- “ქამრებს შემოვიჭერთ” – როგორ აპირებს გადარჩენას ცხინვალი რუსეთის წინააღმდეგ სანქციების ფონზე
- სამხრეთ ოსეთი რუსეთის შემადგენლობაში: ისევ აქტუალურია ეს თემა?
- ექსპერტები ცხინვალში ძალაუფლებისთვის ბრძოლის ახალ რაუნდს ვარაუდობენ
“გაზიფიკაცია არ უშველის”
შეხვედრაზე გაგლოევმა წამოჭრა სამხრეთ ოსეთის რეგიონების გაზიფიცირების საკითხი. მისი თქმით, თუ რუსეთი გაზსადენს გაიყვანს დაცლილ სოფლებში, ეს მოსახლეობას დააბრუნებს მიტოვებულ დასახლებებში, სოფლის მეურნეობა აღორძინდება და გაგლოევი შეძლებს ინვესტიციების მოზიდვას, რომელიც გააჯანსაღებს ეკონომიკას.
ცხინვალელი ექსპერტების აზრით, ამგვარად ალან გაგლოევი უპირველეს ყოვლისა ზრუნავს გაზპრომის ყოფილი ტოპ მენეჯერის და მისი ნათესავის, არსენ გაგლოევის ინტერესებზე. ექსპერტები თანხმდებიან, რომ:
ალან გაგლოევი არის არსენ გაგლოევისა და მის უკან მდგომი ჩრდილოვანი ბენეფიციარების კადრი, რომლებსაც “არ ეზარებათ” სამხრეთ ოსეთის გაზიფიკაციის ფართომასშტაბიანი ინფრასტრუქტურული პროექტის ლობირება და ამ გზით დიდი ფულის შოვნა.
ახლა სამხრეთ ოსეთში გაზი მხოლოდ ქალაქ ცხინვალსა და მიმდებარე დასახლებებს მიეწოდება. ძუარიკაუ-ცხინვალის გაზსადენი რუსეთმა 2009 წელს გაიყვანა. პარალელურად შეიქმნა ერთობლივი საწარმო OAO Gazprom – რომელშიც რუსული გაზპრომის წილი შეადგენდა 75 პროცენტს, ხოლო სამხრეთ ოსეთის წილი 25 პროცენტს. მოგვიანებით, რუსეთის ფედერაციამ გამოისყიდა სამხრეთ ოსეთის წილი და აიღო ვალდებულება დახმარებოდა ცხინვალის ხელისუფლებას გაზიფიკაციასა და გაზის ინფრასტრუქტურის მოდერნიზაციაში.
“გაზიფიკაცია არ უშველის”
მაგრამ ექსპერტები ამბობენ, რომ ამ პროექტების განხორციელება საეჭვოა. მათი აზრით, სრული გაზიფიცირებაც კი ნაკლებად იმოქმედებს ცხინვალის რეგიონის მცხოვრებთა სოფლებში დაბრუნებაზე. რუსეთიდან გაზიფიკაციის თხოვნის მცდელობა ყოფილ პრეზიდენტს, ლეონიდ თიბილოვსაც ჰქონდა.
„სამხრეთ ოსეთი მეოთხედი საუკუნის განმავლობაში ცხოვრობდა წყლისა და გათბობის გარეშე, შიმშილობდა და ხალხიც უძლებდა ამ ყველაფერს ნათელი მომავლის მიზნით. მაგრამ 90-იანი წლების მძიმე ბლოკადის დროსაც კი არ ყოფილა მოსახლეობის ისეთი გადინება, როგორც ეს ბოლო წლებში ხდება. რაშია საქმე? იმისთვის, რომ მოსახლეობა რეგიონებში დაბრუნდეს, მხოლოდ გაზი არ კმარა. ადამიანებმა თავი სრულფასოვან მოქალაქეებად უნდა იგრძნონ, მაგრამ ეს არ მოხდება მანამ, სანამ ადამიანები მხოლოდ არჩევნებზე ახსენდებათ და მოკლევადიანი მხარდაჭერის შემდეგ, საკუთარ დაპირებებს ივიწყებენ. ამიტომ, გასაკვირი არ არის, რომ გაგლოევი სახელმწიფო დონეზე არ მიიღეს. სწორედ ამიტომ, გაგლოევს არ უნდა ეთქვა უარი რეფერენდუმის გამართვაზე და არ უნდა დაევიწყებინა თავისი საარჩევნო ვალდებულებები.“ – მიიჩნევს ხუგაევი.
რით გაანაწყენა გაგლოევმა რუსეთი?
შეგახსენებთ, რომ 2022 წლის მაისში, სამხრეთ ოსეთის პრეზიდენტად „ნიხასის“ თავმჯდომარის, ალან გაგლოევის არჩევაზე რუსული მხარე ძალიან თავშეკავებულად, ან სულაც ცივად რეაგირებდა. გაგლოევმა პუტინისგან ოფიციალური მილოცვა არჩევნების შედეგების გამოცხადებიდან მხოლოდ მესამე დღეს მიიღო. მის წინამორბედებთან, ლეონიდ თიბილოვთან და ანატოლი ბიბილოვთან კრემლი ბევრად უფრო თბილად იყო განწყობილი.
ამ გარემოებამ თავიდანვე დააფიქრა ცხინვალის რეგიონის მოსახლეობა. ადგილობრივმა პოლიტიკოსებმაც დაიწყეს მტკიცება, რომ მოსკოვმა დაფინანსება შეამცირა სწორედ გაგლოევის ფიგურით უკმაყოფილების გამო, რომელიც დაკავშირებული იყო გახმაურებულ კრიმინალურ ისტორიასთან. შეგახსენებთ, რომ გაგლოევის ძმას ბრალი ედებოდა 2007 წელს ცხინვალში ტერაქტის მომზადების ორგანიზებაში და, ზოგიერთი ცნობით, ის მრავალი წლის წინ რუსეთის სამი მოქალაქის მკვლელობაშიც მონაწილეობდა.
- ცხინვალი: რომელი პრეზიდენტია ჩართული გახმაურებულ მკვლელობაში?
- ნასოფლარების მხარე.რეპორტაჟი მიტოვებული, დაცლილი თრუსოს ხეობიდან სადაც ოდესღაც ოსები და ქართველები ერთად ცხოვრობდნენ
გარდა ამისა, გაგლოევმა ჯერ კიდევ ვერ შეძლო გამოეჩინა თავი როგორც კარგ მენეჯერს და მან თითქმის ერთი წლის განმავლობაში ვერ მოახერხა მთავრობის სრულად დაკომპლექტება – ახალი გენერალური პროკურორის, ფინანსთა მინისტრისა და გენინსპექციის უფროსის დანიშვნა. თუმცა გაგლოევის მეგობრები და ნათესავები დაინიშნენ ბევრ საკვანძო თანამდებობებზე, რამაც საერთოდ ვერ გააუმჯობესა მოსახლეობის ცხოვრება.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
