NYT: როგორ აღწევს დასავლური საქონელი რუსეთში საქართველოს გავლით
როგორ აღწევს დასავლური საქონელი რუსეთში
The New York Times–მა რუსეთში იმპორტირებული საქონლის შესახებ სტატია გამოაქვეყნა, რომლის ავტორი ივან ნეჩეპურენკოა. ავტორიტეტული ამერიკული გამოცემა წერს, რომ მას შემდეგ, რაც უკრაინაში რუსეთი შეიჭრა და ევროპამ ოკუპანტ ქვეყანასთან სანქციების გამო სავაჭრო კავშირები გაწყვიტა, რუსეთმა მალევე იპოვა ალტერნატიული გზები. ავტორი აღნიშნავს, რომ ყოველდღე საქართველოში რუსეთის საზღვართან სატვირთო მანქანების რიგები დგას.
“მანქანის ნაწილებით, სამრეწველო მასალებით და სხვადასხვა პროდუქტით დატვირთულები დღეების განმავლობაში ელოდებიან საზღვრის გადაკვეთას და იმ მგზავრობის დასრულებას, რომელიც ჩვეულებრივ თურქეთიდან იწყება და რუსეთის სხვადასხვა ქალაქში სრულდება.” – ვკითხულობთ სტატიაში.
როგორც ავტორი განმარტავს საქართველო რუსეთსა და გარესამყაროს შორის მოსახერხებელ ლოგისტიკურ არხად იქცა. ამასთან, ჟურნალისტი საუბრობს, რომ საქონლის შეძენა საქართველოსა და მეზობელი ქვეყნების (სომხეთი და აზერბაიჯანი) გავლით, რუსეთს დაეხმარა, უკრაინაში შეჭრით გამოწვეული ეკონომიკური შტორმი გადაეტანა:
“მიუხედავად იმისა, რომ ზოგიერთი საქონელი დეფიციტშია და უამრავმა დასავლურმა კომპანიამ ოპერირება შეაჩერა, მთავრობა ამბობს, რომ რუსეთის ეკონომიკა გასულ წელს მხოლოდ 3 პროცენტით შემცირდა. მიუხედავად იმისა, რომ ზრდის პერსპექტივა ბუნდოვანი რჩება, დასავლეთის სანქციების პირობებში მყისიერი კოლაფსი, რომელიც ზოგიერთმა ეკონომისტმა იწინასწარმეტყველა, არ დამდგარა.”
სტატიაში აღნიშნულია ისიც, რომ საქართველოს თურქეთამდე ყველაზე სწრაფი სახმელეთო მარშრუტი აქვს, რაც რუსეთისთვის დასავლეთთან ერთ-ერთ მთავარ სავაჭრო კავშირად იქცა. სტატიაში ასევე მოყვანილია TBC Capital-ის მიერ ჩატარებული კვლევა, რომლის თანახმადაც, 2022 წლის პირველი ექვსი თვის განმავლობაში თურქეთსა და რუსეთს შორის ტვირთების ტრანზიტი სამჯერ გაიზარდა და მისი დიდი ნაწილი საქართველოს გზებზე მოძრაობდა.
“შეუძლებელია იმის თქმა, საქართველოში გამავალი ევროპული ტვირთის რა ნაწილი ექვემდებარება ევროკავშირის სანქციებს. რუსეთთან ვაჭრობის მხრივ ქვეყნის მთავარ რგოლად გამოჩენა ევროკავშირის სანქციების პოლიტიკაში პოტენციურ ხარვეზებზე მიუთითებს.” – წერს ნეჩეპურენკო.
● საქართველოში 17 000-მდე რუსული კომპანიაა და მათი უმეტესობა ომის შემდეგ დარეგისტრირდა – TI
● „თუ საზღვარს ჩაკეტავენ, ერთადერთი გზა დარჩება – გზა ომში“ . რუსეთიდან გამოქცეულების ისტორიები
● რუსეთიდან ნაღდი ფულით: რუსები გარბიან, საქართველოში ეკონომიკური ბუმია
“საერთაშორისო გამჭვირვალობა-საქართველოს” ახალი ანგარიშის მიხედვით, საქართველოში სულ 17 000-მდე რუსული კომპანიაა რეგისტრირებული და მათ ნახევარზე მეტი უკრაინაში ომის დაწყების შემდეგ დარეგისტრირდა.
ანგარიშში ასევე აღნიშნულია, რომ 2022 წელს საქართველოს რუსეთზე ეკონომიკური დამოკიდებულება მნიშვნელოვნად გაიზარდა, თუმცა მას იმ დონისთვის არ მიუღწევია, რომ ამ ქვეყანასთან ეკონომიკური ურთიერთობების სრულად შეწყვეტის პირობებშიც კი საქართველო ღრმა კრიზისში აღმოჩნდეს და განვითარება ვერ შეძლოს.
“ინფორმაციის თავისუფლების განვითარების ინსტიტუტის” (IDFI) ცნობით, 2022 წლის პირველი 7 თვის განმავლობაში საქართველოს მოქალაქეობა ჯამში 1 598 ადამიანს მიენიჭა და მათგან 723 რუსეთის მოქალაქე იყო. 2022 წელს რუსეთის უკრაინაში შეჭრის შემდეგ საქართველოს მოქალაქეობა საგამონაკლისო წესით მიიღო რუსეთის 551-მა მოქალაქემ, ხოლო უკრაინის 8 მოქალაქემ.
იმავე IDFI-ს მონაცემებით, უკრაინაში რუსეთის შეჭრის დღიდან 31 აგვისტომდე საქართველოს კომერციულ ბანკებში ახალი ანგარიშები გახსნა რუსეთის 45 349-მა მოქალაქემ. როგორც ორგანიზაციაში განმარტავენ, ამ რაოდენობით ანგარიშების გახსნა მიუთითებს, რომ ეს რუსეთის მოქალაქეთა მიგრაციაა და არა უბრალოდ ტურისტულად მოგზაურობა საქართველოში. მონაცემები არასამთავრობო ორგანიზაციამ ეროვნული ბანკისგან გამოითხოვა.
