რეპრესიები საკარანტინო რეჟიმის დროს აზერბაიჯანში

აზერბაიჯანში  კორონავირუსის გავრცელებასთან დაკავშირებით გამოცხადებული საკარანტინო რეჟიმის ფონზე რეპრესიები გრძელდება.

ოპოზიციური პარტია „სახალხო ფრონტის“  წევრ ფაიკ ამირლის „საკარანტინო რეჟიმის დარღვევისთვის“  30 დღე-ღამით პატიმრობა აქვს მისჯილი.   

მოძრაობა NİDA-ს აქტივისტმა, ყოფილმა პოლიტპატიმარმა ილკინ რუსტამზადემ პოლიციის მხრიდან ზეწოლის, შანტაჟისა და ბულინგის შესახებ განაცხადა. 

მანამდე 22-23 მარტს საკარანტინო რეჟიმის დარღვევასთან დაკავშირებული ბრალდებით 10-დღიანი პატიმრობა მიესაჯა „სახალხო ფრონტის“ სხვა წევრს ანარ მელიკოვს, პარტია „მუსავათის“ ერთ-ერთი ლიდერ ტოფიკ იაგუბლუს კი ბრალი ხულიგნობაში დასდეს და სასამართლოს მოლოდინში 3 თვით ციხეში ჩასვეს.

ევროპის საბჭოს საპარლამენტო ასამბლეაში ამას „რეპრესიების ახალი რაუნდი“ უწოდეს და განაცხადეს, რომ პრეზიდენტი ილჰამ ალიევი  ოპოზიციის ჩასახშობად პანდემიით სარგებლობს. 

„როგორც ჩანს, აზერბაიჯანის მთავრობა შეთანხმებული პოლიტიკური რეპრესიების ახალ რაუნდს იწყებს. ეს ევროპის საბჭოს შემადგენლობაში ქვეყნის მომავალს კარგს არაფერს უქადის“ , – გააკეთა კომენტარი ებროპის საბჭოს საპარლამენტო ასამბლეის აზერბაიჯანის პოლიტპატიმრების საკითხების მომხსენებელმა ტორჰილდურ სუნა ევარსდოტირმა. 

ოფიციალური მონაცემებით, 8 აპრილს დილით აზერბაიჯანში კორონავირუსით დაინფიცირების 882 შემთხვევაა დაფიქსირებული. რვა ადამიანი გარდაიცვალა, 63 გამოჯანმრთელდა.

30 დღე-ღამე ოპოზიციონერისთვის

ფაიკ ამირლი პარტია სახალხო ფრონტის თავმჯდომარის თანაშემწეა.  2016 წლის აგვისტოში ის რეგიონთაშორისი შუღლის გაღვივებისა და გადასახადების გადაუხდელობის ბრალდებით დააპატიმრეს და 3 წლითა და 3 თვით თავისუფლების აღკვეთა მიუსაჯეს. 2017 წლის სექტემბერში მას პატიმრობის რეალური ვადა პირობითით შეუცვალეს და ამირლი გათავისუფლდა.  

როგორც ამირლის ცოლი ჰყვება, 8 აპრილს ოპოზიციონერი მანქანაში ძალით ჩასვეს და უცნობი ავტომობილით წაიყვანეს.

9 აპრილს სასამართლომ ფაიკ ამირლის 30 დღე-ღამით ადმინისტრაციული სასჯელი მიუსაჯა. ამის შესახებ თავიანთ Facebook-გვერდებზე ამირლის ცოლი და ოპოზიციონერის სხვა ახლობლები წერენ. თუ, კერძოდ, როგორც „დაარღვია ამირლიმ საკარანტინო წესები“, გაუგებარია.

• „კიდევ კარგი, რომ ეს ყველაფერი საკუთარი თვალით ვნახე“, – ისტორია აზერბაიჯანის საავადმყოფოდან
•  „ისე უხეშად მიპასუხეს, თითქოს ვალად ვითხოვდი“, – როგორ აისახა პანდემია აზერბაიჯანის ვაჭრობის მუშაკებზე

ალყა აქტივისტისთვის

ილკინ რუსტამზადემ არეულობის მოწყობის ყალბი ბრალდებით 6-წლიანი პატიმრობა მოიხადა და 2019 წელს გათავისუფლდა. მას შემდეგ, რაც აზერბაიჯანში კორონავირუსის პანდემიის გამო საკარანტინო რეჟიმი გამოცხადდა, მან დაწერა ონლაინ პეტიცია მოთხოვნით, რომ სახელმწიფომ მოქალაქეებს ფულადი კომპენსაცია გადაუხადოს და ისინი ამ პერიოდში კომუნალური და საბანკო გადასახადებისგან გაათავისუფლოს.

რუსტამზადე მომხდარს სწორედ ამ პეტიციას უკავშირებს. მისი თქმით, 8 აპრილს პოლიცია ჯერ მის მშობლებთან მივიდა, შემდეგ კი იმ სახლს შემოარტყა ალყა, სადაც ის ამჟამად ბინას ქირაობს.

გარდა ამისა, ილკინი ამბობს, რომ მანამდე, რამდენიმე დღით ადრე ინტერნეტში მისი ცოლის მაკომპრომეტირებელი ფეიკ ინფორმაცია გაჩნდა.

აქტივისტის ნაამბობით, ყველაფერთან ერთად დაქირავებული ბინის პატრონი მათგან ბინიდან გადასვლას მოითხოვს.

აზერბაიჯანში შემოღებულია გაძლიერებული საკარანტინო რეჟიმი.

დაკეტილია მეტრო, პარკები, სკვერები, საწარმოების, ორგანიზაციებისა და დაწესებულებების უმრავლესობის საქმიანობა შეჩერებულია.

 5 აპრილიდან დაწესებულია  მგზავრების გადაადგილების შეზღუდვა – ქუჩაში გასასვლელად, გარკვეული სფეროების მუშაკების გარდა, ყველამ სპეციალური SMS უნდა გააგზავნოს და ხელისუფლებისგან ნებართვა მიიღოს.

საკარანტინო რეჟიმის დამრღვევებს აჯარიმებენ.

ამავდროულად, ქვეყანაში აქამდე ოფიციალურად არ არის შემოღებული საგანგებო მდგომარეობა.

ხელისუფლება დაზარალებულ მეწარმეებსა და მათ, ვინც მომხდარის გამო უმუშევრად დარჩა, კომპენსაციის გადახდას ჰპირდება.