რატომ არ შემოუშვეს რუსული ტელეკომპანია „დოჟდის“ ჟურნალისტი საქართველოში
„დოჟდის“ ჟურნალისტი საქართველოში არ შემოუშვეს
რუსული ოპოზიციური ტელეკომპანია „დოჟდის“ ჟურნალისტმა მიხაილ ფიშმანმა 5 მარტს, საქართველოში თავისი წარუმატებელი მოგზაურობის დეტალების შესახებ ისაუბრა. ის ქვეყანაში არ შემოუშვეს და თბილისის საერთაშორისო აეროპორტიდან უკან გააბრუნეს.
ჟურნალისტი ოჯახთან ერთად მოდიოდა, თბილისში მას ქალიშვილი და ნათესავები ელოდნენ. ამასთან, საზღვარზე ფიშმანს უარის მიზეზები არ განუმარტეს.
„საქართველოში ჩემს ორ ქალიშვილთან ერთად ჩამოვფრინდი – შუათანა, რომელიც 16 წლისაა – შეუშვეს, უმცროსიც შეუშვეს, მე კი მითხრეს, რომ მომეცადა. რა თქმა უნდა, უმცროსი ჩემს გარეშე არ წავიდა, ჩემთან დარჩა. შემდეგ რამდენიმე შეკითხვა დამისვეს: დიდი ხნით ჩამოვედი თუ არა, ჩემი ვიზიტის მიზანი რა არის? შემდეგ კი მითხრეს: „დაგველოდეთ“.
დაახლოებით ერთ საათს ველოდე, შემდეგ მოვიდა სასაზღვრო სამსახურის თანამშრომელი და მაცნობა, რომ საქართველოში შესვლაზე უარი მითხრეს და შემიძლია ეს გადაწყვეტილება 10 დღის განმავლობაში გავასაჩივრო, მიზეზები არ მითხრეს. ქალიშვილთან ერთად გამაცილეს და თვითმფრინავში ჩამსვეს, ჩვენი პასპორტები ეკიპაჟს ჰქონდა და ის უკვე უკან ჩაფრენის შემდეგ დაგვიბრუნეს. ვცდილობდი გამერკვია, რაში იყო საქმე, მაგრამ არ მითხრეს“, – განუცხადა ფიშმანმა „რადიო თავისუფლების“ ქართულ სამსახურს.
ფიშმანი ყოველკვირეული პროგრამის, „და ასე შემდეგ მიხაილ ფიშმანთან ერთად“ ავტორია, რომელიც ეთერში 2012 წლიდან გადიოდა. თავის გადაცემაში წამყვანი რუსეთის ხელისუფლების ქმედებებს აკრიტიკებდა.
3 მარტს „დოჟდის“ ხელმძღვანელობამ განაცხადა, რომ არხი დროებით წყვეტს მუშაობას. მიზეზი ახალი რუსული კანონი გახდა, რომლის თანახმადაც, „რუსეთის შეიარაღებული ძალების შესახებ განზრახ ცრუ ინფორმაციის გავრცელება“ და კერძოდ, უკრაინაში ე.წ. „სპეციალური სამხედრო ოპერაციის“ შესახებ, ახლა ჟურნალისტს შეიძლება 15 წლამდე პატიმრობად დაუჯდეს.
„სხვას ვერაფერს ვუკავშირებ, ნათელია, რომ სწორედ იმიტომ არ შემიშვეს, რომ რუსეთში ცნობილი ჟურნალისტი ვარ…
რა შემიძლია ვთქვა? ეს საქართველოს შიდა საქმეა. ეს ჩემი სახით დამოუკიდებელი რუსული ჟურნალისტიკისადმი დამოკიდებულების დემონსტრირებაა, რომელიც ახლა ისეთი რისკის ქვეშაა, რომლის მსგავსიც არასოდეს გამოუცდია. დღეს ეს უკვე ზღვარია და ჩემი აზრით საქართველოს სახელმწიფომ აჩვენა, რა დამოკიდებულება აქვს ამისადმი“, – თქვა ფიშმანმა.
საქართველოს ხელისუფლება ამ შემთხვევაზე არანაირ კომენტარს არ აკეთებს.
კიდევ ვინ არ შემოუშვეს საქართველოში
ბოლო თვეებში, რუსეთიდან და სხვა ქვეყნებიდან კრემლის ბევრ კრიტიკოსს უთხრეს უარი საქართველოში შემოშვებაზე, მიზეზების ახსნის გარეშე.
ამრიგად, 31 იანვარს, საქართველოში არ შემოუშვეს რუსი ოპოზიციონერი დმიტრი გუდკოვი.
მანამდე საქართველოში არ შემოუშვეს რუსი პოლიტიკოსი ლუბოვ სობოლი და ჟურნალისტი ილია აზარი, ასევე, უკრაინელი ჟურნალისტი დმიტრი გორდონი.
გარდა ამისა, ასევე მიზეზების ყოველგვარი ახსნის გარეშე საქართველოში არ შემოუშვეს რამდენიმე რუსული ოპოზიციური პარტიის წარმომადგენელი, რომლებიც საჯარო საქმიანობას არ ეწევიან და მათი სახელები უცნობია ფართო საზოგადოებისთვის.
ამასთან დაკავშირებით არანაირ კომენტარს არ აკეთებენ არც სამართალდამცავ სტრუქტურებში და არც საქართველოს მთავრობაში.
