რას გულისხმობს აშშ-ს სანქციების რეჟიმი, რომელიც ბიძინა ივანიშვილს დაუწესეს?
რას გულისხმობს აშშ-ს სანქციების რეჟიმი
ქართული არასამთავრობო ორგანიზაციები ტელეგრამ არხზე “დაიბრუნე ხმა” ავრცელებენ დეტალურ ახსნას იმასთან დაკავშირებით, თუ რას რას გულისხმობს აშშ-ს სანქციების რეჟიმი, რომელიც ბიძინა ივანიშვილს დაუწესეს.
აშშ-მა ბიძინა ივანიშვილს ფინანსური სანქციები დაუწესა. მისი სახელი OFAC-ის სიაში თბილისის დროით 20:00-ზე გამოჩნდა. OFAC-ის სიის თანახმად, ივანიშვილის სანქცირება რუსეთის წინააღმდეგ დაწესებული სანქციების პაკეტის ნაწილია.
როგორც ცნობილია, ივანიშვილის მთელი ქონება, რომელიც შეერთებულ შტატებში და აშშ-ის მოქალაქეების მფლობელობაში ან კონტროლშია, დაიბლოკება.
რას გულისხმობს აშშ-ს სანქციების რეჟიმი
– რა სანქციები დაედო ბიძინა ივანიშვილს?
ივანიშვილს ეკისრება აშშ პრეზიდენტის სანქციები აღმასრულებელი ბრძანების 14024 მუხლი 1(a)(ii)(C)-ის შესაბამისად. ეს სანქციები მას ეკისრება “როგორც პირს, რომელიც პასუხისმგებელი ან თანამონაწილეა, პირდაპირ ან არაპირდაპირ ჩართულია, ან აქვს მცდელობა იყოს ჩართული ქმედებებში ან პოლიტიკაში, რომლებიც ძირს უთხრის დემოკრატიულ პროცესებს ან ინსტიტუტებს აშშ-ში ან საზღვარგარეთ, რუსეთის ფედერაციის მთავრობის სახელით, ან მის სასარგებლოდ, პირდაპირ ან არაპირდაპირ.”
– ვის ეკისრება ამ კატეგორიის სანქციები, რისთვის და როგორ?
ამ სანქციების დადებით ივანიშვილი მოხვდა აშშ-ს ხაზინის დეპარტამენტის OFAC-ის (საგარეო აქტივების კონტროლის ოფისი) მიერ დაწესებულ/სპეციალურად დანიშნულ პირებისა და დაბლოკილ სუბიექტთა სიაში (SDN). ეს პირები ან ორგანიზაციები ასოცირდებიან ისეთ საქმიანობებთან, როგორიცაა ტერორიზმი, ნარკოტრეფიკი, ადამიანის უფლებების დარღვევა ან აშშ-ის ეროვნული უსაფრთხოების სხვა საფრთხეები.
– რა შეზღუდვებს გულისხმობს სანქციების ეს რეჟიმი?
1. ქონების გაყინვა (ქონების ბლოკირება)
• სანქცირებული პირის ქონება და ქონებრივი ინტერესები აშშ-ის იურისდიქციაში სრულად იყინება.
• ქონების გადაცემა სხვა ფიზიკური ან იურიდიული პირისთვის, აშშ-დან გატანა ან განკარგვა, წვდომა ან სხვა ფინანსური ოპერაციები – აკრძალულია და შეუძლებელია.
სპეციალურად დანიშნულ პირებისა და დაბლოკილ სუბიექტთა სიაში (SDN) შეყვანილი პირებისთვის სანქციების რეჟიმი უმკაცრესია. დასანქცირებული პირისთვის ამ სანქციების გარდაუვალი და თავიდან აურიდებელი შედეგებია:
2. ტრანზაქციების აკრძალვა
• აშშ-ის მოქალაქეებს და კომპანიებს ეკრძალებათ სანქცირებულ პირებთან ტრანზაქციების განხორციელება ან მათთვის სერვისების მიწოდება.
3. მეორეული სანქციების რისკი დასანქცირებულ პირთან ფინანსური ურთიერთობისთვის:
• უცხოური კომპანიები, რომლებიც ითანამშრომლებენ SDN-ის სიაში მყოფ სუბიექტებთან, რისკავენ მათაც დაედოთ მეორეული სანქციები და ვეღარ აწარმოონ საქმიანობა აშშ-ში.
4. ფინანსური იზოლაცია
• დასანქცირებულ პირმა შესაძლოა დაკარგოს წვდომა აშშ-ს ფინანსურ ინსტიტუტებსა და დოლარზე დაფუძნებულ ფინანსურ სისტემაზე.
• გარდა აშშ-ს ბანკებისა, უცხოურმა ბანკებმაც (მათ შორის ქართულმა ბანკებმა), რომლებიც სანქცირებული პირისთვის მნიშვნელოვან ტრანზაქციებს განახორციელებენ – აშშ-ს კორესპონდენტ ბანკებთან მომსახურებაზე წვდომას დაკარგავენ (ამით, პრაქტიკულად, საერთაშორისო ფინანსური სისტემიდან იზოლირდებიან).
5. ვიზისა და მოგზაურობის შეზღუდვები
• სანქცირებული პირისთვის აშშ-ში მოგზაურობა, როგორც წესი, იკრძალება. მსგავსი შეზღუდვები შესაძლოა დაწესდეს ასევე აშშ-ს მოკავშირე ქვეყნების მიერ, რომლებიც ახორციელებენ თანმხვედრ სანქციებს.
6. რეპუტაციული ზიანი
• სანქცირებული პირის რეპუტაცია იმდენად ძლიერად ილახება, რომ მასთან საქმიანი ურთიერთობების წარმოება სერიოზული რეპუტაციული რისკია საერთაშორისო მასშტაბით, მათ შორის, ევროპაში და ყველა იმ იურისდიქციაში, რომლებიც ეთანხმებიან აშშ-ის სანქციებს.
