ირაკლი ღარიბაშვილი: ჩვენი ომი ომი არაა და უკრაინის არის? კიდევ რა თქვა პრემიერმა კატარში

რა თქვა პრემიერმა ღარიბაშვილმა კატარში

საქართველოს პრემიერმინისტრი ირაკლი ღარიბაშვილი კატარის ეკონომიკური ფორუმის პანელურ დისკუსიაზე გამოსვლისას კიდევ ერთხელ იმეორებს, რომ 20% უკრაინის ტერიტორიისა უკვე არის რუსეთის მიერ ოკუპირებული და “არავინ იცის როდის” დამთავრდება ეს ომი. მისივე თქმით, ყველას უკვირს, რომ უკრაინამ “ამდენი ხანი” გაძლო. პრემიერი ასევე შეეხო რუსეთთან ფრენების აღდგენას და განაცხადა, რომ ეს “ჩვეულებრივი” ამბავია.

კიდევ რა თქვა საქართველოს პრემიერმა:

●  ჩვენ 2008 წელს გვქონდა ომი, კარგად გემახსოვრებათ, გახსოვთ ვინმე, ვინც დააწესა სანქციები რუსეთის მიმართ? – მსოფლიოში არავინ არ იქონია სწორი რეაქცია, არც ადეკვატური. ამიტომ, ჩემი კითხვა ისმის ასე: სად არის ლოგიკა? ჩვენი ომი არ არის ომი და უკრაინაში არსებული ომი ომია?

● ძალიან იმედგაცრუებული ვიყავით, რომ ბიზნესი ჩვეულებრივ რეჟიმში მიმდინარეობდა რუსეთთან 2008 წლის ომის შემდეგ, იმ დამანგრეველი ომის შემდეგ ჩვენი ტერიტორიების 20% კვლავ ოკუპირებული აქვს, რუსეთმა ორი სამხედრო ბაზა ააგო ჩვენს ისტორიულ მიწაზე, რუსეთმა აღიარა ე.წ დამოუკიდებლობა ჩვენი ისტორიული რეგიონებისა და ეს ოკუპაცია კვლავ გრძელდება.

● მინდა გკითხოთ, კიდევ რა შეუძლია საქართველოს გააკეთოს უკრაინისა და უკრაინელი ხალხის მხარდასაჭერად. უკრაინელი მეგობრები შეიძლება სხვა მოლოდინის მქონენი არიან. მათ საჯაროდ განაცხადეს, რომ უნდათ მეორე ფრონტის ნახვა საქართველოში. ჩვენ საკმარისად გვქონდა ომი.

● ჩემი კითხვა ევროპელი და ამერიკელი მეგობრებისადმი არის შემდეგი: ჩემო ძვირფასო მეგობრებო, თქვენ აგრძელებდით ბიზნესს რუსეთთან, სანქციები არ გქონდათ დაწესებული, ევროკავშირმა 2,3 ტრილიონი დოლარი გადაიხადა 2022 წლამდე რუსეთთან, არავის გაუჩერებია ბიზნესი რუსეთთან, ამ სიტუაციაში კიდევ ერთხელ მინდა დავადასტურო, რომ მხარს ვუჭერთ უკრაინას და უკრაინელ ხალხს, გვინდა, რომ ეს ომი დასრულდეს რაც შეიძლება მალე.

● შევუერთდით 500-ზე მეტ რეზოლუციას, სრულად შევესაბამებით საერთაშორისო სანქციებს, სახდეპმა განაცხადა, რომ საქართველოს ფინანსური ინსტიტუტები, ეროვნული ბანკი სრულად შეესაბამება ფინანსურ სანქციებს, მაგრამ რაც შეეხება ეკონომიკურ სანქციებს, მინდა განვმარტო – საქართველოს სავაჭრო ბრუნვა 1 მილიარდ დოლარზე ნაკლებია რუსეთთან. ევროკავშირი მხოლოდ 4 დღეში იმას ვაჭრობს, რასაც ჩვენ მთელი წლის განმავლობაში. ეს სასაცილოა.

● ერთი მილიონი ეთნიკურად ქართველი გვყავს, ვინც რუსეთში ცხოვრობს დიასპორის სახით და პირდაპირი ფრენები რუსეთთან მგონი ჩვეულებრივი ამბავია. თან ეს არ ნიშნავს, რომ ჩვენ რუსეთთან რამე პოლიტიკურ კონსულტაციებს ვაწარმოებთ. როგორც ვახსენე, ეს ჩვენი ეკონომიკური და სავაჭრო ურთიერთობების ნაწილია, ისევე როგორც ევროკავშირი და აშშ აკეთებს რუსეთთან მიმართებით.

● ჩინეთთან ძალიან კარგი ურთიერთობები გვაქვს. თავისუფალი სავაჭრო შეთანხმება გვაქვს, ჩვენ ვზრდით ვაჭრობას და ეკონომიკურ ურთიერთობებს ჩინეთთან. ჩინეთი იცით რას აკეთებს? მემგონი ამ კრიზისის განმავლობაში ჩინეთს ძალიან ჭკვიანური მიდგომა აქვს- მედიაციას ცდილობს უკრაინასა და რუსეთს შორის. მე მივესალმები ნებისმიერ ძალისხმევას, ნებისმიერი ქვეყნიდან, რომელიც მშვიდობისა და მოლაპარაკებებისკენ უბიძგებს ქვეყნებს და გარკვეულ ძალისხმევას განახორციელებს. ზოგადად ვამბობ- მე მშვიდობის ადამიანი ვარ, სტაბილურობის და მოლაპარაკებების მჯერა. 

● TI-ს კვლევა: ღარიბაშვილი რუსეთთან ფრენების გასამართლებლად სხვადასხვა ფაქტებით მანიპულირებს
● რუსული თვითმფრინავი თბილისის აეროპორტში დაეშვა. რა გამოხმაურება მოჰყვა ამ ფაქტს
● ღარიბაშვილი: კეთილი ინებონ მეგობრებმა და გაგებით მოეკიდონ – რუსეთთან ვაჭრობა ჩვენს ინტერესშია. კიდევ რა თქვა პრემიერმა

23 მაისს “საერთაშორისო გამჭვირვალობა – საქართველომ” (TI) რუსეთთან პირდაპირი ფრენების აღდგენის გასამართლებლად პრემიერმინისტრ ირაკლი ღარიბაშვილის განცხადებებით მანიპულაციების შესახებ კვლევა გამოაქვეყნა.

ორგანიზაციის შეფასებით, პრემიერი ფრენების აღდგენის გამო დაწყებულ პროტესტს თავიდანვე ანტიდასავლური რიტორიკით და მანიპულაციური განცხადებებით გამოეხმაურა. TI-ს განმარტებით, ღარიბაშვილის განცხადების მთავარი პათოსი იყო, რომ მაშინ როდესაც ევროკავშირი თავად ვაჭრობს რუსეთთან, უსამართლოა საქართველოს მიმართ მოწოდება შეწყვიტოს მასთან ეკონომიკური ურთიერთობები.

“სიმართლე კი ასე გამოიყურება: უკრაინაში ომის დაწყების შემდეგ ევროკავშირის რუსეთზე სავაჭრო დამოკიდებულება 3-ჯერ შემცირდა, საქართველოს რუსეთზე სავაჭრო დამოკიდებულება კი 1.5-ჯერ გაიზარდა.

აქცენტის გაკეთება იმაზე, რომ ევროკავშირს რუსეთთან გაცილებით დიდი სავაჭრო ბრუნვა აქვს, ვიდრე საქართველოს, მანიპულირებაა, რადგან ევროკავშირის ეკონომიკა არის 20 ტრილიონ დოლარამდე და მასში ვაჭრობის მცირე წილიც კი მაღალი რიცხვი გამოდის.” – ვკითხულობთ კვლევაში.

12 მაისს საქართველოს პრემიერმა ირაკლი ღარიბაშვილმა განაცხადა, რომ რუსეთის მხრიდან საქართველოს მოქალაქეებისთვის სავიზო რეჟიმის გაუქმება დადებითი ფაქტი და დადებითი გადაწყვეტილებაა. მისივე თქმით, “მეგობრებმა კეთილი ინებონ” და ამას გაგებით მოეკიდონ, რადგან რუსეთთან ვაჭრობა საქართველოს ინტერესშია.