როგორ შეძლო Silk Hospitality-მ პლასტმასის ნივთების მინიმუმამდე შემცირება
პლასტმასის ნივთების შემცირება
კომპანია Silk Hospitality -მ, რომელსაც საქართველოში სტუმარ-მასპინძლობისა და გართობის ინდუსტრიაში წამყვანი პოზიცია უკავია, ბოლო ერთ წელიწადში მის ობიექტებში ერთჯერადი გამოყენების პლასტმასის ნივთების მოხმარება მინიმუმამდე შეამცირა.
Silk Hospitality Silk Road Group-ის ჯგუფში შემავალი კომპანიაა. Silk Hospitality-ს სასტუმროები და გასართობი დაწესებულებები თბილისში, ბათუმსა და წინანდალშია თავმოყრილი.
ეს კომპანია მართავს ისეთ სასტუმროებს, როგორიცაა: თბილისისა და ბათუმის რედისონი, წინანდლის მამული, რესტორანი რესპუბლიკა და რესპუბლიკა 24. ასევე, სამორინე ივერია თბილისი და სამორინე ივერია ბათუმი.
სულ კომპანიაში 2000-ზე მეტი თანამშრომელია დასაქმებული.
ამ სტატიაში გიყვებით, რას გულისხმობს კომპანიის გარემოსდაცვითი პოლიტიკა. რა ალტერნატივები იპოვა პლასტმასის ნივთების შესამცირებლად. რა აქტივობები დაგეგმა იმისათვის, რომ არა მხოლოდ სერვისის მიწოდებისას შეეცვალა პოლიტიკა, თანამშრომელთა ქცევაზეც მოეხდინა გავლენა.
რატომ არის სახიფათო ერთჯერადი გამოყენების პლასტმასის ნივთები
სინთეტიკური შეფუთვების წარმოება მსოფლიოში XX საუკუნის 50-იანი წლებიდან დაიწყო. იქიდან დღემდე კაცობრიობამ 8.3 მილიარდი მეტრული ტონა პლასტმასა აწარმოა.
Science -ის თანახმად, 2015 წლის მდგომარეობით, დაახლოებით 6300 მტ პლასტმასის ნარჩენი იყო წარმოქმნილი. მათი დაახლოებით 9% გადამუშავდა, 12% დაიწვა, 79% კი ნაგავსაყრელებზე ან ბუნებრივ გარემოში დაგროვდა.
თუ პლასტმასის წარმოების ამჟამინდელი ტემპი შენარჩუნდება, პლასტმასის ნივთების შემცირება არ დაიწყება და ნარჩენებთან ბრძოლის მეთოდები არ შეიცვლება, 2050 წლისთვის მათი წონა 12 მილიარდ ტონას მიაღწევს
პლასტმასა პოლიეთილენ-ტერეფტალატისგან (PET) იწარმოება. ეს ყველაზე გავრცელებული პოლიმერული მასალაა და, ძირითადად, შეფუთვებში გამოიყენება. ის ვერ დეგრადირდება, რადგან ისეთ ნაერთებს შეიცავს, რომლებსაც ბაქტერიები და მიკრობები ვერ შთანთქავენ. პლასტმასა გარემოში ძალიან დიდხანს, საუკუნეების განმავლობაში რჩება.
მაგალითად, პლასტმასის ერთჯერადი ჭიქის, ასევე, ბოთლის დაშლას, რომელთაც ყველაზე ხშირად და აქტიურად ვიყენებთ, 450 წელიწადი სჭირდება. უფრო მეტი, 500 წელიწადია საჭირო იმისათვის, რომ ყავის ერთჯერადი კაფსულა დაიშალოს.
30 წელიწადი სჭირდება ყავის ერთჯერად ჭიქას. ხოლო, პლასტმასის საწრუპები, რომელსაც მომსახურების სფერო ყველაზე აქტიურად იყენებს, 200 წელიწადი რჩება ბუნებაში.
ეს ნარჩენები გარემოში რამდენიმე ფენად გროვდება. მზის სხივებს მათში შეღწევა და მათი დაშლა უჭირს. პლასტმასის დიდი ნაწილი ოკეანეებში ხვდება, ნაწილი ნაწევრდება და ჰაერში, ხმელეთსა თუ წყალში მცირე ზომის ნაწილაკების სახით იფანტება.
ერთ-ერთი კვლევა ამბობს, რომ ჩვენს სხეულში ყოველკვირა საშუალოდ ხუთი გრამი პლასტმასა ხვდება.
როგორ დაიწყო Silk Hospitality-მ პლასტმასის ნივთების მოხმარების შემცირება
“კომპანიაში Silk Hospitality ვაღიარებთ გარემოს მდგრადობის სასიცოცხლო აუცილებლობას, განსაკუთრებით პლასტიკური დაბინძურების წინააღმდეგ ბრძოლაში. ამიტომ, ჩვენ მთელი რიგი ღონისძიებები განვახორციელეთ პლასტმასის ნარჩენების შესამცირებლად”, – ამბობს კომპანია Silk Hospitality-ს აღმასრულებელი დირექტორი იორდი ქუითი.
კომპანია ისეთ ბაზარზე ოპერირებს, რომელსაც სერვისის მიწოდებისას ათასობით ერთჯერადი პლასტმასის ნივთი სჭირდებოდა. ამიტომ, კომპანიის აქტივობების ჩამონათვალი ვრცელი და შთამბეჭდავია.
“პირველ რიგში, ჩვენ შევისწავლეთ რა იყო ჩვენი მთავარი პრობლემა პლასტმასის ნარჩენებთან დაკავშირებით. აღმოჩნდა, რომ ყველაზე დიდი რაოდენობით საწრუპ ჩხირებს, აბაზანის მინი ბოთლებს (შამპუნი, კრემი, კონდიციონერი) და წყლის ბოთლებს მოვიხმარდით. გარდა ამისა, გროვდებოდა ბევრი ნარჩენი კვების სექტორში, მაგალითად, მაიონეზის , მაწვნისა და არაჟნის შეფუთვა. და ასევე, სხვა პროდუქტები”, – მიყვება ილონა ტეხოვი, კომპანიის სურსათის უსაფრთხოებისა და მდგრადი განვითარების მენეჯერი.
მიღებული შედეგები კომპანიის ადმინისტრაციამ თანამშრომლებთან განიხილა. მსჯელობა, როგორ შეიძლებოდა პლასტმასის ნივთების შემცირება, ხანგრძლივი აღმოჩნდა. საბოლოოდ, კომპანიამ გადაწყვიტა, მის ობიექტებში ეტაპობრივად დაეწყო მათი შემცირება.
აქტივობები რთული, ძვირი და ზოგ შემთხვევაში, შრომატევადი იყო.
“ჩვენ რამდენიმე მიმართულებით უნდა გვეპოვა ალტერნატივა და ასევე, უნდა მოგვეფიქრებინა, როგორ შევუწყობდით ხელს იმ ნარჩენის გადამუშავებას, რომელსაც ბოლომდე ვერ აღმოვფხვრიდით”, – იხსენებს ილონა.
საბოლოოდ, ალტერნატივები თითქმის ყველა მიმართულებით იპოვეს.
სასტუმროს ნომრებში აბაზანის მინი პლასტმასის ბოთლები, დიდი, შევსებადი დისპენსერებით ჩაანაცვლეს. თავდაპირველად ეს ნივთები კომპანიის ყველა დიდი სასტუმროს 10-10 და პარკ ჰოტელის 70-ვე ნომერში შეიცვალა.
“წლის ბოლომდე ყველა ნომერში ჩანაცვლდება. საუბარია თბილისის 236, ბათუმის 168 და წინანდლის 124 ნომერზე”, – ამბობს ილონა ტეხოვი.
შემდეგი ნაბიჯი პლასტმასის საწრუპებისა და ამრევების ჩანაცვლება იყო. კომპანიამ ახალი მიმწოდებლების ძებნა დაიწყო და ეს ნივთები ხის ალტერნატივებით შეცვალა.
რთული არ აღმოჩნდა საკონფერენციო სივრცეებში წყლის ბოთლების ჩანაცვლება. მათ ნაცვლად Silk Hospitality-მ წყლის მინის ბოთლების შეძენა დაიწყო. შედეგად, კომპანია მის ობიექტებში თვეში დაახლოებით 1000 ბოთლით ნაკლებს მოიხმარს.
ცხადია, ერთჯერადი პლასტმასის 100 პროცენტით შემცირება ჯერ ვერ მოხერხდა. ამიტომ, კომპანია დარჩენილი მასალების გადამუშავებაზე დაფიქრდა.
“ვიპოვეთ კომპანია “ტენე”, რომელიც ერთჯერადი გამოყენების პლასტმასის ნივთების გადამუშავებით არის დაკავებული. იმ ნარჩენს, რომელიც ჯერ ისევ გროვდება, ამ კომპანიას ვაბარებთ. მათ შორის, გადამამუშავებელ კომპანიაში ვაბარებთ მინის ნარჩენსაც, ასევე, მუყაოს, ქაღალდსა და ბატარეებს”, – ამბობს ილონა ტეხოვი.
Silk Hospitality, თბილისის ობიექტებიდან, საწარმო “ტენეს” თვეში 400 კილოგრამზე მეტ პლასტმასისა და 2600 კილოგრამ მინის ნარჩენს აბარებს.
თანამშრომელთა ქცევის ცვლილება
კომპანიის მდგრადი პოლიტიკისადმი ერთგულება ამით არ ამოიწურება. ამ ნაბიჯებთან ერთად მნიშვნელოვანი იყო, ერთჯერადი გამოყენების პლასტმასის ნივთების შემცირება სამსახურს გარეთაც.
კომპანიამ თანამშრომელთა ცნობიერების ასამაღლებლად კამპანია წამოიწყო.
“აღმოჩნდა, რომ ბევრი ჩვენგანი ვერც კი წარმოიდგენდა, რამხელა ზიანს ვაყენებთ გარემოს მაგალითად იმით, რომ წყლის დასალევად ერთჯერად ბოთლებს მოვიხმართ. ან თუნდაც, მაღაზიაში პოლიეთილენის პარკებს ვიყენებთ. ამის გაანალიზების შემდეგ, დავიწყეთ შიგნით ერთმანეთის წახალისება იმისათვის, რომ ჩვენი ქცევა შეცვლილიყო”, – ამბობს ილონა ტეხოვი.
შიდა სივრცეში Silk Hospitality-მ თანამშრომლებისთვის განკუთვნილი წყლის პლასტმასის ბინულებიც შეცვალა. ახლა კომპანია წყლის ფილტრიან დისპენსერებს იყენებს, რომლებიც ქალაქის წყალს ფილტრავს.
“თუ აქამდე თვეში 300 ბინულს ვიყენებდით, ახლა მათი მოხმარება 60 პროცენტითაა შემცირებული. ესეც იმიტომ, რომ ზოგან წყლის გაყვანილობა არაა და ისევ ბინული დარჩა”, – ამბობს ილონა.
ბინულების შეცვლამ, ცხადია, მინიმუმამდე შეამცირა თანამშრომელთა მხრიდან ერთჯერადი ჭიქების გამოყენებაც. ახლა ყველა კერამიკის ჭიქას იყენებს.
რას გეგმავს კომპანია მომავალში?
კომპანია Silk Hospitality-ს სამომავლო გეგმებში ერთჯერადი გამოყენების პლასტმასის ნივთების მოხმარებიდან სრული ამოღებაა.
გარდა ამისა, დაწყებულია მუშაობა ენერგიის დაზოგვის მიმართულებითაც. პირველი ნაბიჯი, რაც კომპანიამ უკვე გადადგა, თბილისში, სასტუმრო “რედისონის” საპარკინგე სივრცეში ელექტრო მანქანების დამმუხტველების დამონტაჟებაა.
ილონა ამბობს, რომ ამ ნაბიჯით მათ იმ მომხმარებლების წახალისება სურთ, რომლებიც უპირატესობას ელექტროავტომობილებს ანიჭებენ. დამმუხტველების დამონტაჟება უკვე დაწყებულია.
“ჩვენ არაერთი ზომა მივიღეთ მდგრადი, გარემოსდაცვითი პოლიტიკის გასატარებლად. მაგალითად ის, რომ დავიწყეთ ერთჯერადი პლასტმასის ჩანაცვლება ყველა ობიექტზე, უკვე ძალიან ბევრია. Silk Hospitality-სთვის მდგრადი პოლიტიკა ნიშნავს მომავალზე ზრუნვას. რასაც ვაკეთებთ, ყველაფერში ვითვალისწინებთ რა გავლენა აქვს ჩვენზე და მომავალ თაობებზე”, – აჯამებს გარემოსდაცვით პოლიტიკას Silk Hospitality-ს აღმასრულებელი დირექტორი იორდი ქუითი.
პლასტმასის ნივთების შემცირება
ისტორია მომზადებულია პროექტის “საზოგადოების გაძლიერება ცირკულარული გადაწყვეტების დანერგვისათვის საქართველოში” ფარგლებში, რომელსაც ახორციელებს CENN, USAID-ის ეკონომიკური უსაფრთხოების პროგრამის მხარდაჭერით.
