მცირე ბიზნესები გარემოს დასაცავად: როგორ ცდილობს „თომას ქოხი“ მავნე ნარჩენების შემცირებას
პლასტმასის ნარჩენების შემცირება
საოჯახო სასტუმრო „თომას ქოხმა“ გასულ წელს მომსახურებიდან მთლიანად ამოიღო ერთჯერადი გამოყენების პლასტმასის ნივთები. ამ წლის გეგმა სხვა მავნე ნარჩენების მინიმუმამდე შემცირებაა.
ამ ფოტო-ისტორიაში „თომას ქოხს“ და მის გარემოსდაცვით ხედვაზე მოგიყვებით.
——-
საოჯახო სახლი-სასტუმრო, კოტეჯი „თომას ქოხი“ გურიაში, ბახმაროში მდებარეობს. სასტუმრო სეზონურია, ივნისი-სექტემბრის პერიოდში ფუნქციონირებს.
ბახმაროში, მზის ჩასვლის გორასთან ახლოს, ბუკნარის ქუჩაზე, გურულებს, სოფელ ბუკნარიდან, ხის ქოხები წინაპრებისგან ერგოთ, მემკვიდრეობით. ასეთი, უბრალო ხის ფიცრული ნაგებობა იყო „თომას ქოხიც“ მაშინ, როდესაც მისმა მფლობელებმა ამ სახლის საოჯახო სახლ-სასტუმროდ ქცევა გადაწყვიტეს.
ზღვის დონიდან 2050 მეტრზე მდებარე ბახმაროს, საქართველოს სხვა კურორტებიდან ზღვისა და მთის შერეული ჰაერი, აღმოსავლური ნაძვის, სოჭის და კავკასიური ფიჭვის მარადმწვანე ტყის კორომები (ყვავილობა), ჯადოსნური მზის ჩასვლა და ამოსვლა გამოარჩევს.
ეკა დევიძე, „თომას ქოხის“ მასპინძელი, ამ ჩამონათვალს ადგილობრივ დღესასწაულს, ტრადიციული დოღს და გაზაფხული-ზაფხულის მოაგარაკეების წეს-ჩვეულებებს ამატებს. ამბობს, ეს ის კულტურული მემკვიდრეობაა, რაც ძალიან გამოარჩევს დაბა ბახმაროს სხვა კურორტებიდანო. ამავდროულად, ბახმარო სამედიცინო დანიშნულების კურორტია, კურორტი სადაც სისხლის ფორმულა 21 დღეში იცვლება.
,,თომას ქოხი”, ბუკნარის ქუჩაზე, მზის ჩასვლის გორასთან ახლოს მდებარეობს, დაახლოებით 150 მეტრში. ეს არის ორსართულიანი ხის კოტეჯი, პირველ სართულზე სამი საძინებლით, სამზარეულოთი და სველი წერტილით, მეორე სართულზე კი დიდი, ოთხადგილიანი საძინებლითა და დახურული ჰოლით. კოტეჯი კეთილმოწყობილია, დამსვენებელს აქ სრული კომფორტი ხვდება.
ეკა გვიყვება, რომ „თომას ქოხის“ მახლობლად აგრო-ტურისტული ფერმაა, სადაც ისინი დამსვენებელს საფეხმავლო, აგრო ტურებს უწყობენ. მაგალითად, მათ შეუძლიათ მონაწილეობა მიიღონ რძის პროდუქტებისა და ბოსტნეულის მოვლა/მოყვანაში და თავიანთი მოწეული პროდუქცია დააგემოვნონ.
“თომას ქოხის” მწვანე პოლიტიკა
„თომას ქოხისთვის“ პრიორიტეტია გარემოზე ზრუნვა. შეუძლებელია ბახმარო გიყვარდეს და გარემოზე არ ფიქრობდეო, ამბობს ეკა.
ამიტომ, ახლა ამ პატარა საოჯახო სახლის მეპატრონეების დიდი საზრუნავი გარემოს მანვე ნარჩენებისგან დაცვაა. ვინ თუ არა, ბახმაროელებმა იციან, რამდენი საყოფაცხოვრებო ნარჩენი გროვდება ასეთ, სეზონურ, დასასვენებელ კურორტებზე, სადაც, ხშირად, ადამიანებს ყოველდღიურობის გაიოლებისთვის განსაკუთრებით ბევრი ერთჯერადი გამოყენების პლასტმასის ნივთი მიაქვთ.
გასულ წელს, გაზაფხულიდან, „თომას ქოხის“ ადმინისტრაციამ ნარჩენების შემცირებაზე გამუდმებული ფიქრი, საქმედ აქცია. ის გაეროს განვითარების პროგრამისა და ნორვეგიის მხარდაჭერით, CENN-ის მიერ ინიცირებულ კამპანიაში ჩაერთო და სხვადასხვა ტრენინგი გაიარა სხვა მონაწილე ორგანიზაციებთან ერთად. შეხვედრების ერთ-ერთი თემა სასტუმროებში პლასტმასის ნარჩენების შემცირებაც იყო.
ჰორეკა სექტორის წარმომადგენლებისთვის ორგანიზებულ ტრენინგს ესწრებოდნენ როგორც მსხვილი სასტუმროების ქსელები, ისე მცირე საკურორტო სასტუმროების წარმომადგენლები.
ეკა იხსენებს, რომ ტრენინგზე, საერთაშორისო ექსპერტი, რომელიც სესიებს უძღვებოდა, მონაწილეებს უყვებოდა და პრაქტიკულად აჩვენებდა კიდეც, როგორ შეიძლება პლასტმასის ნარჩენების შემცირება. აცნობდა ალტერნატივებს.
ამ ტრენინგების შემდეგ, „თომას ქოხის ადმინისტრაციამ ერთჯერადი ჭიქები, თეფშები, დანა-ჩანგალი და სხვა ნივთები ჩაანაცვლა მრავალჯერადი გამოყენების შუშის და ხის ჭურჭლით. წყლის პლასტმასის ბოთლები კი მინის ბოთლებით შეცვალა.
„დღეში დაახლოებით 50-მდე ერთჯერად, პლასტმასის თეფშს, ჭიქას, დანა-ჩანგალსა და კოვზს ვიყენებდით. ახლა ისინი სრულიად ამოღებულია წარმოებიდან“, – ამბობს ეკა.
მცირე ზომის საოჯახო სასტუმროს მაგალითზე, ეკამ შეძლო, დღიურად დაახლოებით 250 ერთჯერადი პლასტმასის ნივთის გარემოში ნარჩენად ქცევა შეემცირებინა. ეს თვიურად დაახლოებით 7,500 ნივთს უდრის, სასტუმროს სამუშაო სეზონზე კი – 30 ათასს.
თუ ვივარაუდებთ, რომ ერთჯერადი პლასტმასის დანა-ჩანგალი დაახლოებით 18 სმ-ია სიგრძით, გამოვა, რომ 30 ათასი ასეთი ნივთის მთლიანი სიგრძე 5.4 კმ-ს მიაღწევს. გაინტერესებთ ეს რა მანძილია?
მაგალითად, 5.4 კილომეტრია თავისუფლების მოედნიდან დინამო თბილისის არენამდე. წარმოიდგინეთ პლასტმასის ჩანგლების, დანებისა და კოვზების უწყვეტი ზოლი რომ ფარავდეს რუსთაველის გამზირს.
ან, ყაზბეგის მყინვარის სიმაღლის დაახლოებით ნახევარი – თუ პლასტმასის ნივთებს მთაზე ვერტიკალურად დააწყობთ.
ეკა ამბობს, რომ ვიდრე ამ წლის ტურისტული სეზონი ძალაში შევა, „თომას ქოხი“ ფიქრობს როგორ მოახდინოს ნარჩენების სეპარირება და გადამუშავება. ამისათვის, ახლა მთავარია იპოვონ ბახმაროსთან ყველაზე ახლოს მდებარე ნარჩენების გადამუმაშავებელი კომპანიები, რადგან, ფაქტია, რომ ნარჩენების ტრანსპორტირება გახდება საჭირო.
სამომავლოდ „თომას ქოხის“ მფლობელები ჯემების წარმოებასაც გეგმავენ. იმისათვის, რომ ამ წარმოებამაც არ გაზარდოს მავნე ნარჩენების რაოდენობა, ეკა ამბობს, რომ შესაფუთად ეკომეგობრულ მასალას შეარჩევენ და პლასტმასის ნივთებს არ გამოიყენებენ.
და იმისათვის, რომ ეს მიდგომა მდგრადი იყოს, „თომას ქოხის“ ადმინისტრაციის სამომავლო გეგმებში ცნობიერების ამაღლების კამპანიაა. ამისათვის, როგორც ეკა ამბობს, საოჯახო სახლში მომუშავე ადამიანებთან გარკვეულ აქტივობებს დაგეგმავენ.
