საქართველოს ერთპარტიულ პარლამენტში "FARA"-ს კანონპროექტი დაარეგისტრირეს
პარლამენტში “FARA”-ს კანონპროექტი დაარეგისტრირეს
საქართველოს ერთპარტიული პარლამენტის ბიუროს სხდომაზე “FARA”-ს კანონპროექტი დაარეგისტრირეს. კანონპროექტი განსახილველად კომიტეტებს გადაეცემა.
“არის ამერიკული ფარას სიტყვა-სიტყვით, მძიმე წერტილით თარგმანი. შემდეგ საკანონმდებლო განხილვის პროცესში მოხდება შესაბამისი ტერმინოლოგიის შესაბამისობაში მოყვანა ქართულ სამართლებრივ სივრცესთან, თუმცა ამით ნებისმიერი ის ყალბი ცრუ ნარატივი, რომელსაც ზოგიერთი შიგნიდან თუ გარედან ავრცელებდა ხოლმე ქართულ კანონებთან დაკავშირებით, ამით დასრულებულია. აგერ არის კანონპროექტი, რომელიც სიტყვასიტყვითაა ნათარგმნი და იდენტურია აშშ-ში მოქმედი კანონისა.“ — თქვა “ქართული ოცნების” პარლამენტის თავმჯდომარემ, შალვა პაპუაშვილმა.
ირკვევა, რომ FARA-ს სიტყვა-სიტყვით ნათარგმნ პროექტში მათ შორის გადმოტანილია ტერმინები – “აშშ-ს პრეზიდენტი“, “კონგრესი“, “სახელმწიფო დეპარტამენტი“, “ხაზინის მდივანი“ და სხვ.
აღსანიშნავია, რომ “ქართულმა ოცნებამ” პარლამენტში დააინიცირა კანონპროექტი, რომელზეც ირაკლი კობახიძე 2023 წლის 21 თებერვალს ამბობდა რომ “ამერიკული კანონი სრული კატასტროფა იყო და ასეთის მიღებას ვერ იკადრებდნენ”.
საკანონმდებლო ცვლილებების შესახებ განცხადება “ქართული ოცნების” წევრმა, მამუკა მდინარაძემ 5 თებერვალს გააკეთა.
მდინარაძის თქმით, მმართველი პარტია მიიღებს კანონპროექტს, “რომელიც იქნება ამერიკული FARA-ს დღეს მოქმედი რედაქციის პირდაპირი ასლი”. მისივე განმარტებით, პარალელურად შექმნიან ფონდს “ქართველი ხალხის გავლენების გამტარებელი” საზოგადოებრივი ორგანიზაციების ინიციატივების დასაფინანსებლად და ამისთვის ცვლილებები შევა გრანტების შესახებ კანონში.
“დავაინიცირებთ კანონპროექტს, რომელიც იქნება ამერიკული FARA-ს დღეს მოქმედი რედაქციის პირდაპირი ასლი. შარშან პარლამენტმა მიიღო FARA-ს მსუბუქი ვერსია, რომელიც ჯერ სრულფასოვნად არც აგვიმოქმედებია, თუმცა იცით, რომ მიუხედავად მისი ძალაში შესვლისა, რეესტრში რეგისტრაციაც კი არ გაუვლია რამდენიმე ათეულ, ყველაზე მდიდარ და გარე დაფინანსების მიმღებ ყველაზე მსხვილ არასამთავრობო ორგანიზაციას.
ამიტომ, მის ნაცვლად მივიღებთ ახალ, ამერიკულ კანონს, მისი მოქმედი რედაქციის პირდაპირ ასლს და უზრუნველვყოფთ, მის სრულფასოვან ამოქმედებას”, – თქვა მამუკა მდინარაძემ.
“ქართულმა ოცნებამ” მრავალთვიანი პროტესტის ფონზე მედიისა და არასამთავრობო ორგანიზაციების შემზღუდავი რუსული კანონი 28 მაისს უკვე მიიღო.
ამერიკული კანონი FARA (Foreign Agents Registration Act), რომელზეც “ოცნება” აპელირებს, აშშ-ში მეორე მსოფლიო ომის წინ, 1938 წელს მიიღეს და ამ კანონის მიზანი იყო ამერიკის მოსახლეობა მაშინდელი მტრისგან – მესამე რაიხის ნაცისტური პროპაგანდისგან დაეცვა. არც მაშინ და არც დღეს FARA არ ვრცელდებოდა ამერიკის მოკავშირე, მეგობარ ქვეყნებზე.
FARA-ში წერია, რომ კანონი არ ეხება არც მედია ორგანიზაციებს და არც არასამთავრობო ორგანიზაციებს, არამედ მხოლოდ ლობისტურ ორგანიზაციებს.
აღსანიშნავია, რომ აშშ-ის პრეზიდენტის, დონალდ ტრამპის მიერ ახლადდანიშნული გენერალური პროკურორის, პემ ბონდის ბრძანებით, “უცხოური აგენტების რეგისტრაციის აქტის” იგივე FARA-ს აღსრულება იზღუდება.
ბრძანება ზღუდავს FARA-ს დარღვევისთვის სისხლის სამართლის დევნას და განსაზღვრავს, რომ ასეთი საქმეები უნდა შემოიფარგლოს მხოლოდ იმ შემთხვევებით, როდესაც სავარაუდო ქმედებები ტრადიციული ჯაშუშობის მსგავსია და უკავშირდება უცხო ქვეყნის მთავრობებს.
