ომი წყლისთვის. ყირგიზეთ-ტაჯიკეთის საზღვარზე 31 ადამიანი დაიღუპა
29 აპრილს ყირგიზეთსა და ტაჯიკეთს შორის სასაზღვრო კონფლიქტი დაიწყო. ორი ქვეყნის სამხედროებს შორის ნამდვილი საომარი მოქმედებები გაჩაღდა. თუმცა მხარეებმა ცეცხლის შეწყვეტის შეთანხმებას მიაღწიეს. კონფლიქტი წყლის გამო დაიწყო – ეს მწვავე საკითხია, რის გამოც კონფლიქტები საზღვარზე პერიოდულად ხდება.
ყირგიზეთის მხრიდან კონფლიქტის დროს, 30 აპრილის საღამოს მონაცემებით, 31 ადამიანი, მათ შორის 12 წლის გოგონა დაიღუპა. 154 ადამიანი დაშავდა. ყირგიზეთის ჯანდაცვის სამინისტროს ეს მონაცემები ადგილობრივ გამოცემას Kloop-ს მოჰყავს.
კონფლიქტის ზონიდან ასობით ადამიანის ევაკუაცია განხორციელდა.
რადიო “ოზოდს” ტაჯიკური მხარის ოფიციალური მონაცემები მოჰყავს – ყირგიზეთის საზღვარზე სროლის შედეგად ორი მშვიდობიანი მოქალაქე დაშავდა, რომელთაგან ერთი მძიმე მდგომარეობაშია.
- ახალი ძველი საზღვარი: რატომ აღმოჩნდა სომხური სოფლები აზერბაიჯანის ტერიტორიაზე
- უკრაინა და რუსეთი დიდი ომის ზღვარზე
- ყირგიზეთში ოპოზიციამ, რომელიც არჩევნების შედეგებს აპროტესტებს, მთავრობის შენობა დაიკავა
მანამდე გავრცელდა ინფორმაცია, რომ ტაჯიკეთის 7 მოქალაქე ქვების სროლის შედეგად დაშავდა, ჯერ კიდევ შეიარაღებული კონფლიქტის დაწყებამდე, ორი ქვეყნის მოქალაქეებს შორის შეტაკების დროს.
კონფლიქტი ყირგიზეთ-ტაჯიკის საზღვარზე 28 აპრილს დაიწყო ორი ქვეყნის საზღვარზე წყალსაცავისა და წყლის სათავე ნაგებობის გარშემო. შეთანხმების თანახმად, წყალსაცავიდან წყალს ორივე ქვეყანა დადგენილი კვოტების შესაბამისად იყენებს.
წყლის სათავე ნაგებობას ყირგიზეთი აკონტროლებს, მაგრამ ტაჯიკეთი ირწმუნება, რომ ეს მისი, მეზობელი სახელმწიფოს მიერ უკანონოდ ოკუპირებული ტერიტორიაა.
კონფლიქტი დაიწყო ტაჯიკური მხარის მცდელობით, წყლის სათავე ნაგებობაზე ვიდეოკამერები დაემონტაჟებინა, წყლის მოხმარების კონტროლის მიზნით. ამან კონფლიქტი გამოიწვია, რომლის დროსაც ორი ქვეყნის 100-150 მოქალაქემ ერთმანეთს ქვები დაუშინა.
29 აპრილს კონფლიქტი გამწვავდა – სასაზღვრო რაიონებში ორივე ქვეყნის სამხედროებმა ავტომატები, ტყვიამფრქვევები და ნაღმტყორცნები გამოიყენეს. დაბომბვის შედეგად განადგურდა ყირგიზეთის სასაზღვრო ნაწილის შენობა, ხოლო საპასუხოდ ყირგიზეთის სპეცრაზმმა ტაჯიკეთის სასაზღვრო პოსტი აიღო. ორივე მხარემ საზღვარზე ჯარის თავმოყრა დაიწყო.
საბოლოოდ მხარეები ცეცხლის შეწყვეტაზე და ჯარების გაყვანაზე მხოლოდ 29 აპრილის საღამოსთვის შეთანხმდნენ. მხარეები ასევე შეთანხმდნენ მოლაპარაკებების დაწყებაზე სიტუაციის დეესკალაციის მიზნით.
სარწყავი სეზონის დროს წყლის ხელმისაწვდომობა ორი ქვეყნის საზღვარზე მწვავე საკითხია, რამაც კონფლიქტები უკვე არაერთხელ გამოიწვია. ტაჯიკეთ- ყირგიზეთის საზღვრის სიგრძე 900 კილომეტრზე მეტია, მის დაახლოებით ნახევარზე დემარკაცია არ ჩატარებულა.
