"ოფშორების შესახებ კანონი" მესამე მოსმენით მიღებულია. რას ნიშნავს ეს
ოფშორების შესახებ კანონი
საქართველოს პარლამენტმა მესამე მოსმენით მიიღო კანონპროექტი, რომლითაც ოფშორიდან კომპანიების/აქტივების გადმოტანაზე გადასახადი უქმდება.
კანონპროექტს მხარი 73-მა დეპუტატმა დაუჭირა, ცხრამ კი წინააღმდეგ მისცა ხმა.
ოპოზიცია და ასევე ექსპერტები მიიჩნევენ, რომ აღნიშნული საკანონმდებლოი ცვლილება ბიძინა ივანიშვილის ინტერესებს ემსახურება.
რა იცვლება:
__ ცვლილების თანახმად, შეღავათიანი დაბეგვრის მქონე ქვეყანაში (ოფშორი) რეგისტრირებული საწარმოს აქტივების საქართველოს საწარმოსთვის გადაცემის შემთხვევაში იმოქმედებს საგადასახადო შეღავათები წესდება:
ა) აქტივების გადაცემის ოპერაციის ფარგლებში, ოფშორში რეგისტრირებული უცხოური საწარმოს და მისი მფლობელი ფიზიკური პირის მიერ მიღებული შემოსავალი გათავისუფლებულია მოგების და საშემოსავლო გადასახადისგან;
ბ) აქტივის ან საქონლის საქართველოში შემოტანა გათავისუფლებულია იმპორტის გადასახდელისგან;
გ) საქართველოს საწარმო, რომელიც ოფშორიდან აქტივებს მიიღებს, გათავისუფლებულია ქონების გადასახადისგან 2030 წლის 1 იანვრამდე.
(ტექნიკურად, ამ კანონპროექტის ინიციირება მოხდა კიდევ ერთ სხვა ცვლილებასთან – საგადასახადო დავალიანების კანონპროექტთან ერთად, ერთ პაკეტში. ეს ცვლილება ფიზიკური პირების საგადასახადო დავალიანებების ჩამოწერას ითვალისწინებს. ანუ ამ ცვლილებით ფიზიკურ პირებს აღიარებული, 2021 წლის პირველ იანვრამდე წარმოშობილი და ჩამოწერის მომენტისთვის არსებული საგადასახადო დავალიანება და მასზე დარიცხული საურავი ჩამოეწერებათ.)
ახლა კი, უფრო ვრცლად, რას გულისხმობს “ოფშორების შესახებ კანონი” :
რას ნიშნავს ეს ცვლილებები:
“უცხოური გავლენის აგენტების” კანონის პარალელურად აღნიშნული საკანონმდებლო ინიციატივას ექსპერტები “ცინიკურს” უწოდებენ. მათი თქმით, ხელისუფლება, ერთი ხელით “გუდავს” სამოქალაქო სექტორს და მეორე ხელით ოფშორებიდან აქტივების ქვეყანაში უკონტროლო შემოდინებას უწყობს ხელს, რაც ბიძინა ივანიშვილის ინტერესებშია.
ოპოზიციაში მიიჩნევენ, რომ კანონპროექტის მიღება ბიძინა ივანიშვილის შესაძლო სანქცირებასთანაა დაკავშირებული.
„ბიძინა ივანიშვილს ეძლევა უფლება, დაუბეგრავად და შავი ფულის გათეთრების წინააღმდეგ მოქმედი ნორმების გვერდის ავლით, შემოიტანოს საქართველოში ოფშორებში გადამალული თავისი ქონება, წილები, აქციები“, – აღნისნავს „ევროოპტიმისტების“ წევრი, დეპუტატი, ეკონომისტი რომან გოცირიძე. მისი თქმით, „ქართული ოცნების“ დამფუძნებელს და საპატიო თავმჯდომარეს ამ საკანონმდებლო ცვლილებების საჭიროება სანქციების მოახლოებამ გაუჩინა.
ამ მოსაზრებას იზიარებს ლელოს წევრი, სალომე სამადაშვილი:
“პუტინის, პეტრუშევის, ლავროვის, ყველა თქვენი უფროსის კაპიტალი არის ოფშორებში და არის დასანქცირებული. ბიძინა ივანიშვილმა იცის, რომ მათ გზას დაადგა მისი კაპიტალიც, ამისთვის გაღებინებთ დღეს ამ კანონს,” – მიმართა სამადაშვილმა დღეს “ქართული ოცნების” დეპუტატებს.
მისი თქმით, ივანიშვილი აქამდე მალავდა, მის მიერ შექმნილი ბიზნესი რა გადასახადებს იხდიდა ბიუჯეტში,” ახლა კი კანონს ცვლის, რომ საერთოდ არ გადაიხადოს, რისი შემოტანაც აქ უნდა. ეგ არის ამ კანონის დანიშნულება”, – თქვა სამადაშვილმა.
მმართველი პარტიის არგუმენტები:
მმართველ პარტიაში უარყოფენ, რომ ცვლილებები “ქართული ოცნების” საპატიო თავმჯდომარის, ბიძინა ივანიშვილის ინტერესების გამო მიიღეს.
საფინანსო-საბიუჯეტო კომიტეტის თავმჯდომარის, პაატა კვიჟინაძის მტკიცებით, კანონპროექტი, რომელიც დაჩქარებული წესით განიხილეს, ბიძინა ივანიშვილის ოფშორულ ქონებას არ ეხება.
“რა არის ცუდი იმაში, რომ ოფშორიდან გადმოვა და საქართველოში შეხვალ რეესტრში და ნახავ, რომ აქ არის დარეგისტრირებული. ამაში ცუდი რა არის?”, – ამბობს კვიჟინაძე.
“საერთაშორისო გამჭვირვალობა – საქართველოს” მოსაზრება:
საერთაშორისო არასამთავრობო ორგანიზაცია “საერთაშორისო გამჭვირვალობა – საქართველო”, რომელიც მსოფლიოს მრავალ ქვეყანაში კორუფციულ სქემებს იკვლევს, ოცნების მიერ ოფშორების კანონის მიღებას ეხმაურება და აღნიშნავს, რომ მისი დაჩქარებული წესით განხილვა აჩენს ეჭვს, რომ მიზანი სინამდვილეში ბიძინა ივანიშვილის ოფშორული კომპანიების აქტივების საქართველოში გადმოტანის ხელშეწყობაა.
ორგანიზაციის წერილში აღნიშნულია, რომ ამ შეღავათით რუს ოლიგარქებსაც შეეძლებათ სარგებლობა:
“გასათვალისწინებელია ის ფაქტიც, რომ რუსი ბიზნესმენები და ოლიგარქები ხშირად იყენებენ ოფშორული კომპანიების პრაქტიკას და არსებული საკანონმდებლო ცვლილებით, მათაც მიეცემათ საშუალება თავისი აქტივები საქართველოში საგადასახადო შეღავათებით გადმოიტანონ”.
ორგანიზაციაში ხედავენ კავშირს “აგენტების კანონის” მიღებასა და “ოფშორების შესახებ კანონის” დაჩქარებულად მიღებას შორის – “აგენტების კანონის” მიღების შემთხვევაში, შესაძლოა, დასავლეთმა ბიძინა ივანიშვილს სანქციები დაუწესოს, ამიტომ ივანიშვილი ცდილობს კანონი შეცვალოს და საკუთარი აქტივები სანქციებისგან დაიცვას, ფიქრობენ „საერთაშორისო გამჭვირვალობაში”.
„საერთაშორისო გამჭვირვალობა – საქართველოს” 2021 წელს გამოქვეყნებული აქვს კვლევა, რომლის თანახმად, ბიძინა ივანიშვილი იმ დროსითვის 20 ოფშორულ კომპანიას ფლობდა.
“ეს ინიციატივა ნათლად აჩვენებს, თუ რამდენად დიდი გავლენა აქვს ბიძინა ივანიშვილს აღმასრულებელ და საკანონმდებლო ხელისუფლებაზე და მისთვის სასურველი კანონების დამტკიცება როგორ ხდება დაჩქარებული გზით, საკითხზე ფართო მსჯელობის გარეშე,” – წერია “საერთაშორისო გამჭვირვალობა – საქართველოს” განცხადებაში.
აღსანიშნავია ისიც, რომ ხშირად ოფშორული კომპანიები მიმზიდველია საეჭვო წარმომავლობის აქტივების მქონე პირებისთვის და თუკი საქართველო, ოფშორიდან აქტივების გადმოტანის ხელშემწყობ რეჟიმს აამოქმედებს, ამასთან ერთად გამჭვირვალობის მაღალი სტანდარტი უნდა დააწესოს. საჯარო უნდა იყოს იმ პირების ვინაობა, ვინც ოფშორებიდან საქართველოში აქტივებს გადმოიტანს”- ნათქვამია განცხადებაში.
