აქტივისტ ნატა ფერაძეს სასამართლომ 5-დღიანი პატიმრობა შეუფარდა
ნატა ფერაძე დააპატიმრეს
აქტივისტ ნატა ფერაძეს 5-დღიანი ადმინისტრაციული პატიმრობა შეეფარდა. გამოძიება მას ადმინისტრაციული წესით ედავებოდა. ფერაძემ 9 იანვარს სამების ტაძარში, წმინდა მატრონას ხატს, რომელზეც სტალინი იყო გამოსახული, საღებავი შეასხა.
ნატა ფერაძემ დაკავებამდე თქვა, რომ მის მიმართ 5-დღიანი პატიმრობის გამოყენებით რადიკალების მოთხოვნა შეასრულეს. ის ასევე ამბობს, რომ სიცოცხლის მოსპობის მუქარების გამო, დაცვა მოითხოვა, თუმცა, მისივე განცხადებით, ამაზე სახელმწიფო უწყებებს არანაირი რეაგირება არ ჰქონიათ.
“ვერ შემაშინებენ, ბრძოლა გრძელდება […] ინანებენ, ციხეში რომ მივყავარ, იმიტომ, რომ შიგნიდან ძალიან ბევრ ამბავს გამოვიტან, თუ რა მიქარვებია […] რა თქმა უნდა, რადიკალების, ორკების მოთხოვნა შეასრულეს. ეს რადიკალების დასტვენილზე ცეკვაა […] აქამდე, სასამართლო ჯარიმას იყენებდა ხოლმე, მაგრამ ნახეს, რომ ეს თანხა გროვდებოდა და ეს არ გვაფერხებდა. ახლა კი დაშინების ამ მეთოდზე გადავიდნენ და თან ალტ-ინფოს უგორებენ, რომ აი, თქვენი წმინდა სტალინის შელახვისთვის ციხეში ვსვამთო […] საქალაქო სასამართლოს ამ გადაწყვეტილებას გავასაჩივრებთ.
ჩვენ განვაცხადეთ, რომ ბევრი მუქარა იყო და მე დაცვა მჭირდებოდა. მაგრამ, რეაგირება საერთოდ არ ჰქონიათ. ჩვენმა ე.წ. სამართალდამცველებმა ჩემი და ჩემი ოჯახის წევრების მიმართ სიცოცხლის მოსპობის მუქარაზე პირი ამოიკერეს. დახმარება ამერიკამ შემომთავაზა. ქართული ოცნება კი მეუბნება, რომ ფეხებზე ვკიდივარ და საერთოდ მიგდებული ვყავარ. ოფიციალურად შევიტანეთ მოთხოვნა, რომ ჩემთვის დაცვა დაეყენებინათ. ვალდებულება აქვთ, რომ ამაზე პასუხი გამცენ, მაგრამ ეს ლაჩრები პასუხს არ გვცემენ და ტელეფონს გვიკიდებენ”. – თქვა ფერაძემ დაკავებამდე რამდენიმე წუთით ადრე პირდაპირ ეთერში.
● “მივმართავთ შემომწირველთ, თვითონ შეიტანონ სათანადო ცვლილებები წმ.მატრონას ხატში ” – საპატრიარქოს განცხადება
● “ქართული ოცნება” რელიგიური ნაგებობებისა და ნივთების შეურაცხყოფისთვის კანონის გამკაცრებას გეგმავს
● სამოქალაქო აქტივისტის, ნატა ფერაძის საცხოვრებელ სახლთან ძალადობრივი ჯგუფის წევრები მივიდნენ და ემუქრებიან
კომენტარი
გიორგი კანდელაკი, საბჭოთა წარსული კვლევის ლაბორატორია: “ეკლესიაზე შეტევა“ პირველ რიგში სწორედ კათედრალურ ტაძარში იოსებ სტალინის განმადიდებელი ხატის განთავსება და მისი თაყვანისცემაა, ისევე როგორც საბჭოთა ტოტალიტარიზმის და სტალინის მსხვერპლთა შეურაცხყოფა. ხატი „მატრონა მოსკოველი ლოცავს სტალინს,“ სხვა ყველაფერთან ერთად, პირდაპირ შეურაცხყოფს სტალინის მსხვერპლ ეკლესიის მსახურებს რომლებიც უშუალოდ მისი ინიციატივით ამოხოცეს. აი ესაა „ეკლესიაზე თავდასხმა.“
ხატი „მატრონა მოსკოველი ლოცავს სტალინს“ ამ ქვეყნის ათეულ ათასობით პატრიოტის საფლავებზე დაფურთხებაა ვინც სტალინთან და სტალინის ინიციატივით მოტანილ საბჭოთა რუსულ ოკუპაციასთან ბრძოლას შეეწირა.
გელა მთივლიშვილი, ჟურნალისტი, მთის ამბების მთავარი რედაქტორი: “მოსამართლე ნინო შჩერბაკოვი – სისტემის მსახური. სისტემამ დაუფასა, უვადოდ გაამწესეს.
არაფერი ამ ქალს საერთო სამართალთან და სამართლიანობასთან არ აქვს! ხელს აწერს ყველაფერს, რასაც დაავალებენ! არანაირი რეფორმა ამ მართლმსაჯულებას არ უშველის, ვიდრე ამნაირ “მოსამართლეებად” წოდებულებს კინწისკვრით არ გავყრით სასამართლო სისტემიდან!”
წინაისტორია
9 იანვარს, აქტივისტმა ნატა ფერაძემ გამოაქვეყნა ვიდეო, სადაც ჩანს, რომ წმინდა მატრონა მოსკოველის ხატს ლურჯი საღებავი აქვს შესხმული. ამის მიზეზი, სავარაუდოდ, ხატზე არსებული იოსებ სტალინის გამოსახულებაა.
შსს-მ სამართალწარმოება ადმინისტრაციული სამართალდარღვევათა კოდექსის 166-ე მუხლით დაიწყო, რაც წვრილმან ხულიგნობას გულისხმობს.
მანამდე 6 იანვარს, სოციალურ ქსელში გავრცელდა ინფორმაცია იმის შესახებ, რომ სამების საკათედრო ტაძარში წმინდა მატრონა მოსკოველის ხატი იყო დასვენებული, რომელზეც საბჭოთა დიქტატორი, იოსებ სტალინიც არის გამოსახული.
10 იანვარს სამოქალაქო აქტივისტის, ნატა ფერაძის საცხოვრებელ სახლთან ძალადობრივი, პრორუსული ალტ-ინფოს წევრები შეიკრიბნენ და მას ემუქრებოდნენ. სიტუაცია ადგილზე მობილიზებულმა პოლიციამ განმუხტა. ძალადობრივი ჯგუფების აგრესია სწორედ მატრონას ხატის ე.წ. შეურაცხყოფამ გამოიწვია.
მალევე მმართველმა პარტიამ საკანონმდებლო ცვლილებები დააანონსა, რომლის მიხედვით რელიგიური ნაგებობებისა და ნივთების შეურაცხყოფისთვის სისხლის სამართლის კანონმდებლობა უნდა გამკაცრდეს. ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.
მისი თქმით, დღეს მოქმედი საქართველოს კანონმდებლობის თანახმად, სამებაში მომხდარი ფაქტი კანონსაწინააღმდეგოა და შესაბამის პასუხისმგებლობას ითვალისწინებს, თუმცა, ამჟამინდელი კანონმდებლობა ასეთი ქმედებებისთვის პროპორციულ პასუხისმგებლობას არ ითვალისწინებს.
11 იანვარს საქართველოს საპატრიარქომ სამების საკათედრო ტაძარში წმინდა მატრონას ხატზე გამოსახულ იოსებ სტალინთან დაკავშირებით ოფიციალური განცხადება გაავრცელა, რომელშიც ვკითხულობთ, რომ ხშირად ხატებზე წმინდანების ცხოვრების ეპიზოდებია აღბეჭდილი, თუმცა რადგან წმ. მატრონას სტალინთან შეხვედრის საკმარისი მტკიცებულებები არ არსებობს, “აუცილებელია აღნიშნული ეპიზოდის შეცვლა”.
