ევროსაბჭოს ჟურნალისტთა უსაფრთხოების პლატფორმამ მზია ამაღლობელის საქმეზე განგაშის სიგნალი გამოსცა
მზია ამაღლობელის საქმე
ევროპის საბჭოს ჟურნალისტთა უსაფრთხოების პლატფორმამ 21 იანვარს განგაშის სიგნალი გამოსცა “ნეტგაზეთისა“ და “ბათუმელების“ დამფუძნებლის, მზია ამაღლობელის სისხლის სამართლის მუხლით დაკავების შესახებ.
ჟურნალისტთა უსაფრთხოების პლატფორმა არის ევროპის საბჭოსა და პრესის თავისუფლების ცნობილი ორგანიზაციების ქსელის ერთობლივი პროექტი. ეს არის ჟურნალისტების წინააღმდეგ მუქარის რეალურ დროში მონიტორინგისა და რეაგირების მექანიზმი. პლატფორმა მუშაობს მედიის თავისუფლებისა და ჟურნალისტების უსაფრთხოების სერიოზულ საფრთხეებზე სიგნალების შეგროვებით და შემოწმებით.
ეს შეტყობინებები, რომლებიც წარმოდგენილია პლატფორმის პარტნიორი ორგანიზაციების მიერ, გამოქვეყნებულია ცნობიერების ამაღლებისა და ეროვნული ხელისუფლების მხრიდან სწრაფი მოქმედების მიზნით. სიგნალების გასაჯაროებით პლატფორმა ცდილობს უზრუნველყოს ანგარიშვალდებულება და წაახალისოს წევრი სახელმწიფოები, შეასრულონ ადამიანის უფლებათა ევროპული კონვენციით ნაკისრი ვალდებულებები გამოხატვის თავისუფლების დასაცავად.
2025 წელს პლატფორმაზე აქტიურია 4 საგანგაშო სიგნალი ევროპის საბჭოს წევრ ქვეყნებში ჟურნალისტთა უსაფრთხოების შესახებ, აქედან ერთი ეხება უკრაინას, ხოლო სამი — საქართველოს.
მანამდე პლატფორმაზე გამოქვეყნდა განგაშის სიგნალები “საერთაშორისო გამჭვირვალობა — საქართველოს“ წევრ, ჟურნალისტ ზვიად ქორიძეზე თავდასხმისა და “ბათუმელების“ ოპერატორ გურამ მურვანიძის დაკავების შესახებ.
საქართველოსთან დაკავშირებულ სამივე შემთხვევაზე მოქმედებს განგაშის სიგნალის პირველი დონე, რაც ფარავს მედიის თავისუფლების ყველაზე მძიმე და საზიანო დარღვევებს. განგაშის მეორე, შედარებით მცირე დონე არის გამოყენებული უკრაინის შემთხვევასთან დაკავშირებით, რომელიც შეეხება საჯარო მონაცემთა ბაზებიდან „კონფიდენციალური ინფორმაციის“ გამოქვეყნების კრიმინალიზების კანონპროექტს.
მზია ამაღლობელი 12 იანვარს სისხლის სამართლის კოდექსით მას შემდეგ დააკავეს, როცა მან არაერთგზის შეურაცხყოფის შემდეგ სილა გააწნა ბათუმის პოლიციის უფროსს, ირაკლი დგებუაძეს.
11-12 იანვრის საღამოს ამაღლობელი ორჯერ დააკავეს. პირველად – საპროტესტო შინაარსის პლაკატის გაკვრის გამო, რომელზეც ეწერა – “იფიცება საქართველო 15 იანვარს, 15:00 საათზე”. აქციაზე ამაღლობელი მეგობრის, ციალა ქათამიძის დაკავების შემდეგ მივიდა.
ამაღლობელი პირველი დაკავებიდან დაახლოებით 1 საათის შემდეგ გაათავისუფლეს. ის მის საგულშემატკივროდ მისულ ადამიანებს, ახლობლებს ესაუბრებოდა, რა დროსაც პოლიციამ უმიზეზოდ დააკავა ჯერ მისი ერთი ახლობელი, შემდეგ – მეორე. პოლიციის მხრიდან პროვოკაციული ქმედებების გამო აქციის მონაწილეებსა და პოლიციას შორის დაიწყო დაპირისპირება. სწორედ ამ დროს დააკავეს მზია ამაღლობელი მეორედ.
დაკავებიდან 3 საათის განმავლობაში მასთან არ უშვებდნენ ადვოკატს. მზია ამაღლობელმა სახალხო დამცველის წარმომადგენელს განუცხადა, რომ დაკავების შემდეგ ადგილი ჰქონდა მის მიმართ არასათანადო მოპყრობას.
