რუსეთი 2025 წელს აფხაზეთის საჯარო მოხელეების დაფინანსებას წყვეტს. როგორ გადაუხდიან ხელფასებს მათ?
რუსეთი აფხაზეთის დაფინანსებას წყვეტს
შემაშფოთებელი გათვლები წარუდგინა საზოგადოებას ცნობილმა აფხაზმა ეკონომისტმა ახრა არისტავამ, რომელიც აანალიზებს აფხაზეთის 2025 წლის ეკონომიკურ პერსპექტივებს, როდესაც, შეთანხმების თანახმად, რუსეთი ადგილობრივ საჯარო მოხელეებს ხელფასების გაცემას შეუწყვეტს.
„2025 წლამდე წელიწადნახევარზე ცოტა მეტი დარჩა. ამ დროის განმავლობაში მთავრობამ რესპუბლიკური ბიუჯეტი თითქმის სამნახევარი მილიარდი რუბლით [დაახლოებით 37,5 მილიონი აშშ დოლარი] უნდა გაზარდოს.
ამიტომ, ვფიქრობ, სახელმწიფოს მეთაურმა 2021 წელს ეროვნულ ასამბლეაში გზავნილით დაადასტურა ამ თანხის შოვნის მიზნით შიდა წარმოების ხელშეწყობისა და ექსპორტის გაზრდის მნიშვნელობა.
სამწუხაროდ, ხელისუფლებამ იგნორირება გაუკეთა პრეზიდენტის გზავნილს.
მინისტრთა კაბინეტმა არც გასულ წელს და არც 2023 წელს არ გაზარდა საბიუჯეტო ხარჯები ბიზნესის ხელშეწყობისა და სოფლის მეურნეობისთვის – მინიმალური გადაუდებელი რეფორმებიც კი არ განხორციელებულა.
შედეგად, სტატისტიკის მიხედვით:
- შიდა წარმოება ოდნავ იზრდება;
- ექსპორტი არ იზრდება;
- ტურისტული ნაკადის ზრდა არ გამოიყენება განვითარებისთვის;
- აფხაზეთიდან გასული ფულის რაოდენობამ 2022 წელს მიაღწია ყველა დროის მაქსიმუმს: 60 მილიარდი რუბლი [დაახლოებით 750 000 აშშ დოლარი];
- ისევ ისე, როგორც 2009-2014 წლებში, 2022 წელს იმპორტი (32 მილიარდი რუბლი) უფრო გაიზარდა, ვიდრე შიდა ვაჭრობა (31 მილიარდი რუბლი).
მთელი ეს ნეგატიური დინამიკა ნათლად აჩვენებს, რომ 2025 წელს რესპუბლიკური ბიუჯეტიდან სახელმწიფო მოხელეებისთვის ხელფასების დამოუკიდებლად გაცემა შეუძლებელი გახდება.
სხვა ხარჯების გაზრდაზეც არაფერი ვიცით – თავდაცვაზე, დემოგრაფიულ პოლიტიკაზე, ენერგეტიკაზე, ჯანდაცვაზე, განათლებაზე.“
- დეფიციტი. ისტორია აფხაზეთის ბიუჯეტის შესახებ
- მოსაზრება: ასლან ბჟანიას სურს გახდეს “აფხაზი პუტინი”
- ახალი „კანონი ბინების შესახებ“ აფხაზეთში – რას ნიშნავს და რა საფრთხეებს შეიცავს
- უფასო საცხოვრებელი აფხაზეთში: რატომ არ არის ყველასთვის საკმარისი
„აფხაზეთი ფინანსური გადახდისუუნარობისკენ მიდის და ამ მდგომარეობაში მყოფ რიგით მოქალაქეებს ნამდვილად არ ეცინებათ“
ასე ამთავრებს ანალიზს ახრა არისტავა იმ ირონიაზე, რომლითაც მინისტრები 27 აპრილის მთავრობის სხდომაზე ოპოზიციის ულტიმატუმს გამოეხმაურნენ.
25 აპრილს ოპოზიციამ პრეზიდენტ ასლან ბჟანიას ულტიმატუმი წაუყენა. მოთხოვნების პაკეტში, სხვა საკითხებთან ერთად, მთავრობის გადადგომაც იყო. მოთხოვნების შესასრულებლად ასლან ბჟანიას ორი კვირა მიეცა, წინააღმდეგ შემთხვევაში ოპოზიცია მასობრივ პროტესტს აანონსებს.
მეორე დღეს მთავრობის სხდომა გაიმართა, რომელზეც მინისტრებმა ოპოზიციის მოთხოვნებს, ფაქტობრივად, დასცინეს.
თავდაპირველად პრემიერმინისტრმა ალექსანდრ ანქვაბმა ტურიზმის მინისტრს, თეიმურაზ ხიშბას უსაყვედურა აფხაზეთში ჩამოსული ტურისტების რაოდენობის შესახებ არასწორი მონაცემების გამო, რაზეც ხიშბამ რუს ჟურნალისტებთან ისაუბრა.
ხიშბა ცდილობდა გამოესწორებინა საკუთარი ქმედება ფრაზით: „სწავლის პროცესში ვართ“. – “რა სწავლის?” – აღშფოთდა ანქვაბი – “უკვე გადამწიფებული ხარ. რას სწავლობთ ამდენს? დროა, გაიზარდოთ!“
ხიშბამ პრემიერმინისტრს წინადადების დამთავრების საშუალება არ მისცა და ხუმრობით თქვა: „ჩვენს დრო ამოიწურა“, რაც სწორედ ოპოზიციის ულტიმატუმზე მიუთითებს. ანქვაბი ამ ხუმრობას, რომელსაც მთავრობის წევრების სიცილი მოჰყვა, მხარი აუბა და დასძინა: „ორი კვირა მოგვცეს.“
თუმცა, ოპოზიცია პრეზიდენტ ბჟანიას მხრიდან დათმობას არ ელის. ოპოზიციის ლიდერმა ადგურ არძინბამ უკვე განაცხადა, რომ საპროტესტო აქციები მაისის შუა რიცხვებიდან დაიწყება.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
