მოსახლეობის მიერ "ახსნა-განმარტებითი საუბრების" შემდეგ, აფხაზეთში ბინების შესახებ კანონის მიღება გადაიდო
კანონი ბინების შესახებ აფხაზეთში
აფხაზეთში ბინების შესახებ კანონის მიღების წინააღმდეგ სახალხო პროტესტმა დიდი გავლენა მოახდინა მრავალი დეპუტატის პოზიციებზე, რომლებიც თავდაპირველად მზად იყვნენ ხმა მიეცათ კანონისთვის. როგორც ჩანს, სკანდალური კანონი, რომლის გატანას პრეზიდენტი ასლან ბჟანია უკვე ორი წელია ცდილობს, აღარ მიიღება.
მიღების შემთხვევაში ბინების შესახებ კანონი რუსებს აფხაზეთში ბინების აშენებისა და ყიდვის საშუალებას მისცემს – ეს ფაქტობრივად გააუქმებს აფხაზეთში უცხოელების მიერ საცხოვრებლის შეძენის მოქმედ აკრძალვას. აფხაზური ოპოზიცია, სამოქალაქო საზოგადოების წარმომადგენლები და მთლიანად ხალხის მნიშვნელოვანი ნაწილი ამის კატეგორიული წინააღმდეგია მრავალი მიზეზის გამო.
გასული კვირის დასაწყისში პარლამენტის ეკონომიკური პოლიტიკის კომიტეტმა ბინების კანონპროექტი დაამტკიცა. მართალია, არა თავისი პირველადი ფორმით, არამედ “ოჩამჩირის, ტყვარჩელისა და გალის რაიონების სოციალურ-ეკონომიკური განვითარების დონის ამაღლების მიზნით“ – ვარაუდობდნენ, რომ კანონი აფხაზეთის მთელ ტერიტორიას არ შეეხებოდა და მხოლოდ ამ სამ აღმოსავლეთ რეგიონში ამოქმედდებოდა, რომლებიც “დეპრესიულად” ითვლება.
შეხვედრას ესწრებოდა ასლანა ბჟანია და თავად დარწმუნდა, რომ კომიტეტმა ეს კანონპროექტი პარლამენტის მომავალ სესიაზე შესატანად მიიღო. ამასობაში მომიტინგეთა მასა პარლამენტის შენობასთან მივიდა, თუმცა უსაფრთხოების ძალებმა ისინი შენობასთან არ მიუშვეს.
სიტუაციის განმუხტვის მიზნით პარლამენტის თავმჯდომარე ლაშა აშუბა იძულებული გახდა დაერწმუნებინა მომიტინგეები, რომ კანონპროექტი ფარულად არ განიხილებოდა.
აქციის მონაწილეები დროებით დაიშალნენ, მაგრამ რამდენიმე დღის მერე აქცია ისევ გაიმართა.
ამ შეხვედრაზე, რომელსაც სულ მცირე სამი ათასი ადამიანი ესწრებოდა, ოპოზიციამ პირობა დადო, რომ ნებისმიერ ფასად შეუშლის ხელს ბინების შესახებ კანონის მიღებას.
გარდა ამისა, გადაწყდა თითოეულ დეპუტატთან ინდივიდუალურად მუშაობა. ანუ, თითოეულ ოლქში ამომრჩევლებს უნდა დაერეკათ მათთან და გაეგოთ მისი პოზიცია – თუ ის მომხრე იყო, აეხსნათ, რომ ასეთი პოზიცია არ შეესაბამება საზოგადოების განწყობას.
რამდენიმე დეპუტატი “გამოწვევას” არ დაელოდა და იმავე საღამოს, სოხუმში აქციის მონაწილეებთან შეხვედრის ინიციატივით გამოვიდა. მათ იქვე თქვეს, რომ ამ კანონის წინააღმდეგ მისცემდნენ ხმას.
“ახსნა-განმარტებითი საუბრები” სხვა დეპუტატებთან უკვე მიმდინარეობს მთელი აფხაზეთის მასშტაბით და ბევრმა, ვინც კანონის მომხრე იყო, უკვე შეიცვალა პოზიცია.
შედეგად, არაოფიციალური მონაცემებით, პარლამენტის 35 დეპუტატის უმრავლესობა ბინების კანონს წინააღმდეგ უყრის კენჭს. თუ, რა თქმა უნდა, კენჭისყრა საერთოდ შედგება.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
