მოლდოვის პარლამენტის ექს-დეპუტატი რუსეთის სასარგებლოდ ჯაშუშობისთვის გაასამართლეს

 Ziarul de Garda –ს მასალების მიხედვით

იური ბოლბოჩანუს, მოლდოვის პარლამენტის დემოკრატიული პარტიის ყოფილ დეპუტატს სამშობლოს ღალატისთვის 14 წლით პატიმრობა მიესაჯა.

განაჩენი 13 მარტს, ექს-დეპუტატის წინასწარი პატიმრობის ვადის გასვლამდე ოთხი დღით ადრე გამოქვეყნდა. სასამართლოს რომ დაეგვიანა, ის უნდა გაეთავისუფლებინათ. ბოლბოჩანუ გასული წლის მარტში დააპატიმრეს. იმ დროისთვის ის უკვე არც პარლამენტარი იყო და არც დემოკრატიული პარტიის წევრი. გამოძიების ფორმულირებით, ექს-დეპუტატი სწორედ იმ მომენტში დააკავეს, როდესაც ის მოლდოვაში რუსეთის საელჩოს სამხედრო ატაშის მოადგილეს, ალექსანდრ გრუდინს „ეროვნული მნიშვნელობის“ ინფორმაციას გადასცემდა. ამ ინფორმაციის გამოყენება შესაძლებელი იყო “რესპუბლიკის სუვერენიტეტისა და უსაფრთხოების საზიანოდ“, – განაცხადეს პროკურორებმა. შემდეგ ცნობილი გახდა, რომ ბოლბოჩანუ სისტემატურად ხვდებოდა რუსეთის სამხედრო ატაშეს და მისგან ჯილდოებს იღებდა.

გამოძიებამ განაცხადა, რომ ჩხრეკის დროს ბოლბოჩანუს აღმოუჩინეს 23 ათასი დოლარი, ელექტრონული მონაცემების შესანახი დანადგარი, ნოუთბუკი, ზოგიერთი საპარლამენტო დოკუმენტი და მობილური ტელეფონები, რომელთაგან ერთ-ერთი უცხოელ აგენტთან კონსპირაციული მოლაპარაკებებისთვის იყო განკუთვნილი.

საიდან შეიძლებოდა ბოლბოჩანუს რუსული დაზვერვისთვის ფასეული ინფორმაცია მოეპოვებინა, თუკი ის 2014 წლის ნოემბრიდან სახელმწიფო თანამდებობებს არ იკავებდა? მოლდოვურმა გაზეთმა Ziarul de Garda-მ ამის შესახებ საქმის მწარმოებელ პროკურორ ანატოლი პიტელს ჰკითხა. პროკურორმა უპასუხა, რომ ყოფილ დეპუტატს ჩინოვნიკებსა და მაღალი თანამდებობის პირთა შორის „ძალიან ბევრი კონტაქტი ჰქონდა და ბევრი მეგობარი ჰყავდა“. გამოძიება ყოფილი დეპუტატის კონტაქტებს ექვსი თვის განმავლობაში ამოწმებდა, – დასძინა მან.

2017 წლის 9 მარტს იური ბოლბოჩანუს სახელმწიფოს ღალატისა და ჯაშუშობის ბრალდება წაუყენეს, რაც ითავლისწინებს სასჯელს –  12 -დან 20 წლამდე თავისუფლების აღკვეთას, სასამართლომ კი მისი წინასწარი პატიმრობის შესახებ გამოიტანა გადაწყვეტილება.

რუს დიპლომატ ალექსანდრ გრუდინს, დიპლომატიური ხელშეუხებლობის წყალობით, ამ საქმესთან დაკავშირებით პასუხისმგებლობა არ დაეკისრა. თუმცა მოგვიანებით ის ქვეყნიდან გაასახლეს ოთხ  რუს დიპლომატთან ერთად, რომლებიც პერსონა ნონ-გრატად  ცნეს.