მაიკ პომპეოს ვიზიტი დასრულდა. მთავარი, რაც გავიგეთ

აშშ-ის სახელმწიფო მდივანი მაიკ პომპეო თბილისში 17 ნოემბერს საღამოს, თურქეთიდან ჩამოფრინდა და თბილისი 18 ნოემბერს დღის პირველი საათისთვის მას შემდეგ დატოვა, რაც დაგეგმილი შეხვედრები გამართა.

პომპეო მთავრობის ადმინისტრაციაში შეხვდა საქართველოს პრემიერ-მინისტრ გიორგი გახარიას და საგარეო საქმეთა მინისტრ დავით ზალკალიანს. მანამდე, პირველი შეხვედრა მას ორბელიანის სასახლეში პრეზიდენტ სალომე ზურაბიშვილთან ჰქონდა.

მთავრობის ადმინისტრაციიდან აშშ-ის სახელმწიფო მდივანი საპატრიარქოში გაემგზავრა, სადაც პატრიარქს ილია მეორეს შეხვედრა.

ბოლო შეხვედრა ამერიკელმა მაღალჩინოსანმა არასამთავრობო ორგანიზაციების წარმომადგენლებთან გამართა.

პომპეომ ისე დატოვა თბილისი, რომ ჟურნალისტებთან განცხადება არ გაუკეთებია.

საქართველოში, სადაც პოლიტიკური კრიზისია, რადგან ოპოზიცია 31 ოქტომბრის არჩევნებს არ ცნობს, პომპეოს ვიზიტს განსაკუთრებით ელოდნენ.

ასევე მნიშვნელოვანი იყო ეს ვიზიტი რეგიონული თვალსაზრისით – მთიანი ყარაბაღის გარშემო ხელმოწერილი შეთანხმების და შეცვლილი რეალობის შემდეგ, ეს იყო ამერიკელი მაღალჩინოსნის პირველი ვიზიტი კავკასიის რეგიონში.

ვიზიტი პროტესტის ფონზე მიმდინარეობდა. ოპოზიციამ ცოცხალი ჯაჭვი მოაწყო – აქციის მონაწილეებს ეჭირათ ტრანსფარანტები, სადაც ეწერა, რომ “რუსმა ოლიგარქმა საქართველოში არჩევნები მოიპარა”.

შეხვედრა პრეზიდენტთან

საქართველოს პრეზიდენტი იყო პირველი, ვისაც მაიკ პომპეო შეხვდა.

სახელმწიფო მდივანმა საქართველოს პრეზიდენტთან შეხვედრაზე აშშ-ის სახელით საქართველოს სუვერენიტეტისა და ტერიტორიული მთლიანობისადმი ერთგულება დაადასტურა – ნათქვამია აშშ-ის საელჩოს განცხადებაში.

ამავე შეხვედრაზე მაიკ პომპეომ გლობალური ტერორიზმის წინააღმდეგ ბრძოლაში შეტანილი მნიშვნელოვანი წვლილისთვის ქვეყნის მიმართ პატივისცემა გამოხატა.

ზურაბიშვილმა შეხვედრის შეფასებისას განაცხადა, რომ ეს იყო უმნიშვნელოვანესი შეხვედრა და იმის დასტური, რომ აშშ რჩება საქართველოს მთავარ სტრატეგიულ პარტნიორად, ხოლო საქართველო აშშ-ის მთავარ საყრდენად რეგიონში.

„ეს იყო შეხვედრა, რომელიც ადასტურებს რამდენად ახლოს ვართ ამერიკა და საქართველო. რამდენად მყარია ამერიკის მხარდაჭერა საქართველოსთვის, ამ რეგიონისთვის, მით უმეტეს დღეს, როდესაც ამ რეგიონში ცვლილებები მიმდინარეობს“.

შეხვედრა პრემიერთან და საგარეო საქმეთა მინისტრთან

“ჩვენი თანამშრომლობისა და პარტნიორობის გაძლიერების, ასევე ამ რეგიონში შეერთებული შტატების გაძლიერებული წარმომადგენლობის მომენტი დადგა” – ასე მიმართა პრემიერმა გახარიამ აშშ-ს სახელმწიფო მდივანს.

მაიკ პომპეოს თქმით, ამერიკა მხარს უჭერს საქართველოს დემოკრატიულ საკითხებში და ისინი ერთად მუშაობენ იმ თემებზე, რომლებიც საქართველოს ოკუპაციიდან მომდინარე ტკივილსა და სირთულეს უკავშირდება.

პომპეომ თავისუფალი არჩევნების შესახებაც ისაუბრა და ხაზი გაუსვა არჩევნების განსაკუთრებულ მნიშვნელობას.

„მხარს გიჭერთ დემოკრატიულ საკითხებში და ერთად ვმუშაობთ იმ საკითხებზე, რომლებიც თქვენი ქვეყნის ოკუპაციიდან მომდინარე ტკივილსა და სირთულეს უკავშირდება. ყველაფერს გავაკეთებთ მომავალშიც თქვენი ქვეყნის დემოკრატიზაციის პროცესის მხარდასაჭერად, ინსტიტუტების გასაძლიერებლად, რაც მნიშვნელოვანია თავისუფალი და სამართლიანი არჩევნებისთვის და ყოველივე იმისთვის, რაც მომდინარეობს ჯანსაღი დისკუსიიდან და დემოკრატიიდან. მადლობას გიხდით მასპინძლობისთვის. ვაფასებ ამ შესაძლებლობას და მოხარული ვარ თქვენთან შეხვედრით“, – აღნიშნა მაიკ პომპეომ.

საგარეო საქმეთა მინისტრს, დავით ზალკალიანს ჟურნალისტებმა დაუსვეს კითხვა არჩევნების შესახებ, რაზეც მინისტრმა უპასუხა, რომ მისი [პომპეოს] მხრიდან რაიმე სახის პირდაპირი ჩარევა არ ყოფილა.

„მისი მხრიდან რაიმე სახის პირდაპირი ჩარევა არ ყოფილა. ეს ჩვენი შიდა პოლიტიკური პროცესია. ამერიკა არის ჩვენი მთავარი სტრატეგიული პარტნიორი, რომელიც საქართველოში მოქმედ ყველა პოლიტიკურ აქტორს მოუწოდებს, რომ პროცესები წავიდეს პოლიტიკურ ჭრილში, სამართლებრივ ჩარჩოებში დარჩეს. ამერიკა საქართველოს შიდა საქმეებში ვერ ჩაერევა, არცაა ეს მათი სურვილი. მათი სურვილია, რომ საქართველოში სიტუაცია იყოს სტაბილური“, – აღნიშნა ზალკალიანმა.

მისივე თქმით, საუბრისას ასევე განიხილეს საქართველოში დემოკრატიული ინსტიტუტების გაძლიერების საკითხი.

შეხვედრა საპატრიარქოში

საქართველოში ამერიკის შეერთებული შტატების საელჩომ აშშ-ის სახელმწიფო მდივნისა და საქართველოს კათოლიკოს – პატრიარქის შეხვედრის შესახებ ინფორმაციას ფეისბუქით გაავრცელა.

საელჩოს ინფორმაციით, შეხვედრისას სახელმწიფო მდივანმა და ილია მეორემ განიხილეს საქართველოს მნიშვნელოვანი როლი მსოფლიოში რელიგიის თავისუფლების მხარდაჭერის კუთხით.

შეხვედრა არასამთავრობოებთან

არასამთავრობო ორგანიზაციების წარმომადგენლებსა და ამერიკის შეერთებული შტატების სახელმწიფო მდივანს, მაიკ პომპეოს შორის შეხვედრა 35 წუთის განმავლობაში გაგრძელდა.

შეხვედრის მონაწილეებმა განაცხადეს, რომ საუბარი ძირითადად შეეხებოდა სასამართლოს და საუბრისას ძალიან ცოტა დრო დაუთმეს არჩევნებს.

ასევე საუბარი შეეხო პოლიტპატიმრებს, კარტოგრაფების საქმეს, ანაკლიის პორტის ჩაშლილ მშენებლობას და არაფორმალური მმართველობის პრობლემებს.

“რაც შეეხება კონკრეტულ მაგალითებს, კარტოგრაფების საქმე და ანაკლიის პორტის საკითხი დაისვა როგორც მაგალითი, თუ როგორ ვერ დაიჭირა სასამართლომ ნეიტრალური პოზიცია” – განაცხადა “უფლებები საქართველოს” წარმომადგენელმა კახა წიქარიშვილმა.

“პომპეოსთან შეხვედრაზე ყურადღება გავამახვილეთ იმაზე, რამდენად საფრთხეა არაფორმალური მმართველობა დემოკრატიული განვითარებისთვის”, – ამის შესახებ ეკონომიკური პოლიტიკის კვლევის ცენტრის აღმასრულებელმა დირექტორმა, ნინო ევგენიძემ ისაუბრა.

„საერთაშორისო გამჭვირვალობა- საქართველოს“ პროგრამების მენეჯერის, გია გვილავას განცხადებით, პომპეოსთან შეხვედრაზე სასამართლოს საკითხი ორ კონტექსტში იყო განხილული: სასამართლო, როგორც პოლიტიკური ბრძოლის იარაღი ხელისუფლების ხელში და სასამართლო, სადაც კორუფციის პატარა ტენდენციები შეინიშნება.

„მხოლოდ სასამართლოზე იყო საუბარი და იმ მდგომარეობაზე, რაც გვაქვს. გარდა სისტემური პრობლემებისა, საუბარი იყო კონკრეტულ საქმეებზე, რომელიც სახელმწიფო მდივანს მოვახსენეთ”, – განაცხადა გვიალავამ.

ვიზიტი პროტესტის ფონზე

სახელმწიფო მდივნის ვიზიტი თბილისში საპორტესტო აქციების ფონზე გაიმართა. რუსთაველიდან მელიქიშვილამდე ცოცხალი ჯაჭვი იყო გაბმული, ხალხს ხელში ბანერები და სტიკერები ეჭირა – წარწერით “გაყალბებულია!”, ხოლო მშვიდობის ხიდზე აქტივისტებმა გადმოფინეს ბანერები წარწერით “არჩევნები გაყალბებულია რუსი ოლიგარქის მიერ”.

მოგვიანებით აქციის მონაწილეებმა პარლამენთან გადაინაცვლეს და მომიტინგეებს სიტყვით მიმართეს.