"კრემლს აბსოლუტურად არ სჭირდება ასლან ბჟანიას აფხაზეთის ხელისუფლებაში დაბრუნება" - მოსაზრება
აფხაზეთის ახალი მთავრობა
აფხაზეთში აფხაზეთში ახალი მთავრობის ფორმირების პროცესი ჭიანურდება, რაც სპეკულაციებსა და სხვადასხვა ვერსიებს ბადებს. ერთ-ერთი გავრცელებული ვარაუდით, ყოფილი პრეზიდენტი ასლან ბჟანია, რომელიც 2024 წლის ნოემბერში გადადგა, შესაძლოა გახდეს ან უსაფრთხოების საბჭოს მდივანი, ან აფხაზეთის ელჩი მოსკოვში.
თუმცა, გაზეთ „ჩეგემსკაია პრავდას“ მთავარ რედაქტორს, ინალ ხაშიგს, სხვა მოსაზრება აქვს. მისი შეფასებით, კრემლი ძალისხმევას არ დაიშურებს, რათა ბჟანიამ ახალ პოლიტიკურ კონსტრუქციაში ადგილი არ დაიკავოს.
ეს მოსაზრება ხაშიგმა საკუთარ სვეტში ჩამოაყალიბა — გთავაზობთ მისი ტექსტის შემოკლებულ ვერსიას.
ინალ ხაშიგი:
“ახალი პრეზიდენტი ბადრა გუნბა – რომელიც, ფორმალურად, ასლან ბჟანიას მემკვიდრედ ითვლება – შესაძლოა თანამდებობაზე დაეხმაროს წინამორბედს. თუმცა, ვითარება გაცილებით კომპლექსურია.
ახლა საკადრო გადაწყვეტილებებს აღარ იღებს მხოლოდ გუნბა ან მისი გუნდი, ახალ ხელისუფლებას ფორმალურად მოსკოვი აკომპლექტებს – კერძოდ, რუსეთის პრეზიდენტის ადმინისტრაციაში აფხაზეთის მიმართულების კურატორი სერგეი კირიენკო.
კირიენკო საკითხს რაციონალურად მიუდგება – მთავრობის შემადგენლობა პირდაპირ იქნება დაკავშირებული იმ ამოცანებთან, რასაც კრემლი ახალ ხელისუფლებას უყენებს.
რუსეთისთვის, რომელიც დაღლილია აფხაზეთის მუდმივი პოლიტიკური არასტაბილურობითა და პერიოდული ძალაუფლების ცვლილებებით, მთავარი მიზანია – რესპუბლიკაში ხანგრძლივი სტაბილურობა.
მე ეს უკვე დავწერე და კვლავ გავიმეორებ: ახალი აფხაზური მთავრობა იქნება ტექნოკრატიული. მასში არ იქნება იმ ადამიანების ადგილი, რომლებიც აფხაზეთში ქრონიკულ პოლიტიკურ კრიზისთან ასოცირდებიან.
ყოფილი პრეზიდენტი ასლან ბჟანია ახალ ხელისუფლებაში ვერ მოხვდება. მისი რეპუტაცია – ზედმეტად პრობლემურია, რათა მოსკოვმა მისი დაბრუნება პოლიტიკურად გამართლებულ ნაბიჯად ჩათვალოს.
ბჟანიას ახალი მთავრობის რიგებში ჩასმა იქნებოდა არათუ არარაციონალური, არამედ სრულიად მარცხისთვის განწირული გადაწყვეტილება. და კრემლს ეს არ სჭირდება.
ბჟანიას შესაძლო თანამდებობა მხოლოდ გააღიზიანებს ოპოზიციას და დარტყმის ქვეშ დააყენებს ახალ პრეზიდენტ ბადრა გუნბას, რომელზეც, როგორც ჩანს, მოსკოვი დიდ იმედებს ამყარებს.
თუ, მიუხედავად ყველა არგუმენტისა, ბჟანიას მაინც მისცემენ პოსტს, მაშინ გუნბამ უმჯობესია ახლავე დაიწყოს პრეზიდენტის რეზიდენციის გარშემო ღობის აგება – რათა მეოთხე გადაყენებულ პრეზიდენტად არ იქცეს“.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
