კორონავირუსი მსოფლიოში: ფოტოები, რიცხვები და ფაქტები. განახლებადი

აშშ-ში, უკვე კორონავირუსის 123 781 შემთხვევაა დაფიქსირებული. მხოლოდ გასული დღე-ღამის განმავლობაში, 20 ათასზე მეტი ადამიანი დაავადდა.

აშშ-ში, კორონავირუსით 2 229 ადამიანი გარდაიცვალა.

თუმცა, პრეზიდენტი ტრამპი უარს აცხადებს საგანგებო მდგომარეობის დაწესებაზე და ამბობს, რომ მოსახლეობა რამდენიმე კვირაში სამუშაოს უნდა დაუბრუნდეს.

ვიცე-პრეზიდენტმა პენსმა განაცხადა, რომ პრეზიდენტს თავის რეკომენდაციებს წარუდგენს იმის შესახებ, ღირს თუ არა სოციალური დისტანცირების შეჩერება და ოფისებისა და ბიზნესების გახსნა.

ესპანეთის მეფის, ფილიპე VI-ის ბიძაშვილი, პრინცესა მარია ტერეზა კორონავირუსით გარდაიცვალა. ის 86 წლის იყო და COVID-19-ის პირველი მსხვერპლი გახდა ევროპის სამეფო ოჯახებიდან.

თავად ესპანეთის მეფეს უარყოფითი ტესტი აქვს.

კორონავირუსით სამეფო ოჯახების კიდევ ორი წარმომადგენელია ინფიცირებული – ბრიტანეთის ტახტის მემკვიდრე, დიდი ბრიტანეთის დედოფლის, ელიზაბეთ II-ის უფროსი შვილი, პრინცი ჩარლზი და მონაკოს მმართველი, პრინცი ალბერ II.

აშშ – 104,256 ინფიცირებული

იტალია – 86,498 ინფიცირებული

ჩინეთში, საერთო ჯამში, ეპიდემიის დაწყებიდან, 2019 წლის დეკემბრიდან მოყოლებული, კორონავირუსით 81,394 ადამიანი დაინფიცირდა.

მსოფლიოს ყველა ქვეყანას შორის, ყველაზე მეტი ინფიცირებული აშშ-შია – 104,256 ადამიანი. 

1,704 ადამიანი გარდაიცვალა.

ადგილობრივი ექიმები და მედდები ითხოვენ, მიაწოდონ მათ მეტი დამცავი და ათასობით პაციენტის სამკურნალო აღჭურვილობა.

აშშ-ში, საავადმყოფოები უკვე ვეღარ უმკლავდებიან ინფიცირებულთა რაოდენობას. ექსპერტები ამბობენ, რომ თუკი დაუყოვნებლივ არ იქნება მიღებული ზომები – კატასტროფა მოხდება.

რობერტ ბერკი – ნიუ იორკში ცნობილი, როგორც „შიშველი კოვბოი“, დაცარიელებულ Times Square-ზე, სამედიცინო ნიღბით პოზირებს. 24 მარტი, 2020. REUTERS/Carlo Allegri

იტალიაში, კორონავირუსით გამოწვეული სიკვდილიანობის ძალიან მაღალი მაჩვენებელია. მხოლოდ გასული დღე-ღამის განმავლობაში, აქ 969 ადამიანი გარდაიცვალა.

საერთო ჯამში, უკვე 9,134 დაიღუპა.

ადრე, ჯანდაცვის მსოფლიო ორგანიზაციის თავმჯდომარემ, თედროს ადჰანომ ღებრეიესუსმა განაცხადა, რომ იტალიაში გარდაცვალების ასეთი მაღალი მაჩვენებლის მიზეზი – „დამცავი საშუალებებისა და აღჭურვილობის ქრონიკული გლობალური ნაკლებობაა“

კარაბინერი მიდის ძველი ქალაქის ქუჩაში. ბარი, იტალია. 27 მარტი, 2020. REUTERS/Alessandro Garofalo

ესპანეთი – ევროპის ერთ-ერთი ყველაზე დაზარალებული ქვეყანაა. უკანასკნელი დღე-ღამის განმავლობაში, აქ გარდაცვალების 769 შემთხვევა დაფიქსირდა.

დაღუპულთა საერთო რიცხვმა 4,858 ადამიანს მიაღწია.

ქვეყნის ხელისუფლებამ ექსპლუატაციიდან ამოიღო 9 ათასი კომპლექტი ჩინური წარმოების კორონავირუსის ტესტირების საშუალება მას შემდეგ, რაც გაირკვა, რომ მათ მიერ ვირუსის აღმოჩენის სიზუსტე, მხოლოდ 30 პროცენტს შეადგენს.

საქართველომ, რომელიც 215 ათასი ასეთივე ტესტ-სისტემის შეძენას გეგმავდა, ჩინურ კომპანია Shenzhen Bioeasy Biotechnology-სთან გარიგებაზე უარის თქმა მოასწრო.

•  ჩინეთმა საქართველოს ექსპრეს-ტესტები აჩუქა, მაგრამ ისინი უსარგებლო გამოდგა

გავლენიანი ბრიტანული სამედიცინო ჟურნალის, The Lancet-ის რედაქტორმა განაცხადა, რომ დიდი ბრიტანეთი „ქაოსისა და პანიკის ზღვარზეა“, რადგან ხელისუფლებამ ჯანდაცვის სისტემა „პანდემიისთვის სრულად მოუმზადებელი“ დატოვა.

რიჩარდ ჰორტონმა მინისტრები იმაში დაადანაშაულა, რომ ისინი არ გაჰყვნენ ჯანდაცვის მსოფლიო ორგანიზაციის მთავარ რჩევას – ჩაეტარებინათ მოსახლეობის ტოტალური ტესტირება და მკვეთრად შეეზღუდათ სოციალური კონტაქტები.

„ინფექციურ დაავადებებთან ბრძოლის ეს საბაზო პრინციპები უცნობი მიზეზების გამო იყო უგულებელყოფილი“, – განაცხადა ჰორტონმა.

დიდ ბრიტანეთში, Covid-19-ის აფეთქების დაწყებიდან მოყოლებული, ერთ დღეს გარდაცვალების ყველაზე მაღალი მაჩვენებელი დაფიქსირდა.

ქვეყნის პრემიერ-მინისტრი ბორის ჯონსონი და ჯანდაცვის მინისტრი მეთ ჰენკოკი კორონავირუსით დაინფიცირდნენ.

ლონდონის ქუჩაში. 26 მარტი, 2020. REUTERS/Hannah McKay