კომენტარი აფხაზეთიდან: არა ანტირუსული აქტი, არამედ პასუხი ბჟანიას პოლიტიკაზე
რუსული ინვესტიციები აფხაზეთში
3 დეკემბერს აფხაზეთის პარლამენტმა სკანდალური რუსულ-აფხაზური საინვესტიციო შეთანხმების რატიფიცირების წინააღმდეგ დაუჭირა მხარი, რაც ე.წ. პრეზიდენტის, ასლან ბჟანიას გადადგომის მიზეზი გახდა.
თუმცა, წამყვანი აფხაზური მედიის, APSNYKHABAR-ის მთავარი რედაქტორის, ლეუან ლაგულაას თქმით, პარლამენტის ეს გადაწყვეტილება არ არის ანტირუსული აქტი, არამედ ეს არის პასუხი ბჟანიას პოლიტიკაზე.
აფხაზეთში რუსული ინვესტიციების შესახებ შეთანხმება, რომელსაც ლობირებდა ასლან ბჟანია, ადგილობრივმა ოპოზიციამ და საზოგადოებამ მტრულად მიიღო, რადგან რუსული მხარისთვის უპრეცედენტო და გაუმართლებელი სარგებელი მოაქვს.
ბევრის აზრით, ასეთ პირობებში ინვესტიციები ფაქტობრივად გაანადგურებს აფხაზურ ბიზნესს და საფრთხეს უქმნის თავად აფხაზეთს.
მას შემდეგ, რაც აფხაზეთის ეკონომიკის მინისტრმა, ქრისტინა ოზგანმა რუს კოლეგასთან ხელი მოაწერა ამ შეთანხმებას, დოკუმენტი პარლამენტს გადაეგზავნა რატიფიკაციისთვის. ამან გამოიწვია მასობრივი პროტესტი, რომელიც გადაიზარდა ფაქტობრივ სახელმწიფო გადატრიალებაში და 19 ნოემბერს ასლან ბჟანია თანამდებობიდან გადადგა.
ვადამდელი საპრეზიდენტო არჩევნები აფხაზეთში 2025 წლის 15 თებერვალს არის დანიშნული.
- “საიდუმლო ფაილები“: აფხაზეთში სამთავრობო კომპლექსის შტურმის დროს აღებულ დოკუმენტებს სწავლობენ
- აფხაზეთში მასობრივი პროტესტია რუსეთთან საინვესტიციო შეთანხმების წინააღმდეგ. ითხოვენ პრეზიდენტის გადადგომას. Live
ლეუან ლაგულაას კომენტარი:
“პარლამენტის გადაწყვეტილება არ მოახდინოს საინვესტიციო ხელშეკრულების რატიფიცირება, რომელსაც ლობირებდა და მოაწერა ხელი ექს-პრეზიდენტ ასლან ბჟანიას მთავრობამ, არ არის ანტირუსული აქტი – ეს არის პასუხი ასლან ბჟანიას პოლიტიკაზე.
ეს საპარლამენტო გადაწყვეტილება შეიძლება აღიქმებოდეს, როგორც მომენტი ექს-პრეზიდენტის მმართველობის ისტორიაში და როგორც მისი მთავრობისადმი უნდობლობის გამოცხადება.
მნიშვნელოვანია გვესმოდეს, რომ აფხაზეთის წინაშე დგას პრობლემა, რომელიც ღრმად არის ფესვგადგმული სუპერ-საპრეზიდენტო მმართველობის სისტემაში, რომელიც არ უზრუნველყოფს სახელმწიფოს მეთაურის ქმედებებზე ეფექტური კონტროლის მექანიზმებს – სწორედ ამ სისტემის გამო მოუხდა ქვეყანას ბჟანიას გადადგომის მტკივნეული პროცესი.
დღეს აფხაზი ხალხის თავისუფლების დღეა, დღე, როდესაც მათი ინტერესები პირად ამბიციებზე მაღლა დგას. თუმცა, გამოწვევები არ დასრულებულა. მომავალ პრეზიდენტს, როგორც სწორად აღნიშნა დეპუტატმა დაუთ ხუტაბამ, მოუწევს “დიპლომატიური სასწაულების ჩვენება“ და ხასიათის გამოვლენა, რადგან ასლან ბჟანიამ და მისმა გუნდმა ძალიან მძიმე მემკვიდრეობა დატოვა.
პარლამენტის რიგგარეშე სესიის გამართვის იდეა შეთანხმების რატიფიცირების საკითხზე ოპოზიციისგან გაჩნდა. სხდომაში 35 დეპუტატიდან 24-მა მიიღო მონაწილეობა. გადაწყვეტილება ხელშეკრულების რატიფიცირებაზე უარის თქმის შესახებ ხმათა უმრავლესობით მიიღეს.
ოპოზიციონერმა დეპუტატმა კან კვარჩიამ ასევე შესთავაზა პარლამენტს უნდობლობის გამოცხადება შეთანხმებაზე პასუხისმგებელი თანამდებობის პირისთვის, ეკონომიკის მინისტრ ქრისტინა ოზგანისთვის. დეპუტატი მიიჩნევს, რომ აფხაზეთში შექმნილი პოლიტიკური კრიზისი ოზგანის წარუმატებელი მუშაობის შედეგია.
და მიუხედავად იმისა, რომ მანამდე ამ საკითხზე კენჭისყრა არ ჩატარებულა, სხდომის დასრულების შემდეგ ოპოზიციის წარმომადგენლები მოქმედ პრეზიდენტ ბადრა გუმბას შეხვდნენ და მოსთხოვეს, რომ ხელისუფლებამ ჩამოეშოროს ის ადამიანები, რომლებიც ღიად უჭერენ მხარს ექს-პრეზიდენტ ასლან ბჟანიას – ამ ადამიანებში შედის კრისტინა ოზგანიც.”
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
