კობახიძე: რომ არა EU-სთან უვიზო მიმოსვლა, მიგრაცია ნაკლები იქნებოდა. ექსპერტის პასუხი

კობახიძე მიგრაციაზე

მმართველი პარტიის, “ქართული ოცნების” თავმჯდომარე, ირაკლი კობახიძე მიიჩნევს, რომ საქართველოდან მოსახლეობის გადინების და გაზრდილი მიგრაციის მთავარი მიზეზი არა სიღარიბე და უმუშევრობაა, როგორც ამას ექსპერტები აღნიშნავენ, არამედ ევროინტეგრაციული პროცესები – კერძოდ კი, ევროკავშირთა უვიზო მიმოსვლის შემოღება.

“რომ არა ევროკავშირთან უვიზო მიმოსვლის რეჟიმი, დარწმუნებით შეიძლება ითქვას, რომ 2018-21 წლებში საქართველოს არა უარყოფითი, არამედ დადებითი მიგრაციული სალდო ექნებოდა” – აღნიშნა კობახიძემ.

მისი თქმით, დემოგრაფიული საკითხები სერიოზულ ყურადღებას საჭიროებს, თუმცა ხშირ შემთხვევაში სჭარბობს უტრირებული და სპეკულაციური განცხადებები.

“როდესაც ეკონომიკურად ძლიერი ქვეყანა ეკონომიკურად შედარებით სუსტი ქვეყნის მოსახლეობას სავიზო რეჟიმს უმარტივებს, ბუნებრივია, ეს ფაქტი მოსახლეობის გადინებას უწყობს ხელს”.

კობახიძეს თავის ფეისბუკ პოსტში ლიეტუვის და ლატვიის მაგალითები მოჰყავს:

“ევროკავშირში გაწევრიანებისა და უვიზო მიმოსვლის რეჟიმის შემოღების შემდეგ, ლიეტუვაში მოსახლეობა 600 ათასით – 3,4 მილიონიდან 2,8 მილიონამდე, ხოლო ლატვიაში 400 ათასით – 2,3 მილიონიდან 1,9 მილიონამდე შემცირდა. ამასთან, ქვეყნიდან გასული ლიეტუველებისა და ლატვიელების უდიდესი უმრავლესობა ახალგაზრდები იყვნენ”.

მმართველი პარტიის თავმჯდომარე აშშ-ის სავიზო პოლიტიკასაც მიმოიხილავს და მიუთითებს, რომ აშშ-ი უფრო მკაცრ სავიზო პოლიტიკას ატარებს საქართველოსთან მიმართებაში, ვიდრე რუსეთის მოქალაქეების მიმართ:

“2021 წელს აშშ-მ რუსეთის მოქალაქეების სავიზო განაცხადების 71 პროცენტი, ხოლო საქართველოს მოქალაქეების სავიზო განაცხადების მხოლოდ 37 პროცენტი დააკმაყოფილა”.

ეს “საქართველოს მოქალაქეებს სერიოზულ დისკომფორტს უქმნის, მათ შორის ადამიანების ნაწილს რისკზე წასვლას და აშშ-ში მექსიკის გავლით გადასვლას აიძულებს”, – წერს კობახიძე.

“თუმცა, მეორე მხრივ, – დასძენს იგი, – მკაცრი სავიზო პოლიტიკა საქართველოდან აშშ-ში ქართველების იმიგრაციას არსებითად აფერხებს, რასაც თავისი დადებითი ეფექტიც აქვს. აშშ-ს მიერ სავიზო რეჟიმის შერბილების პირობებში, ბუნებრივია, მიგრაციის სალდო გაუარესდებოდა,” – ამბობს კობახიძე.

მმართველი პარტიის ლიდერის განცხადებაში მიგრაციის მიზეზებზე საუბრისას არ არის აღნიშნული ქვეყანაში არსებული უმუშევრობა, სიღარიბე და ინფლაციის მაღალი დონე.

• საქართველოში ყოველ მეხუთე ოჯახს საჭმლის სამყოფი ფული არ აქვს – NDI-ის ახალი კვლევა
• მექსიკის გავლით ამერიკაში – სად და რატომ გარბიან ქართველები
• დედა-შვილობა სკაიპით. ათასობით ემიგრანტი ქალი ვერ ხედავს, როგორ იზრდებიან მათი შვილები

ექსპერტის პასუხი

“საერთაშორისო გამჭვირვალობა-საქართველოს” ექსპერტი, ეკონომისტი ბესო ნამჩავაძე კობახიძის განცხადებას “ანტიდასავლურ მესიჯს” უწოდებს.

“კობახიძე რიცხვებით მანიპულირებს. შეარჩია ორი ისეთი ქვეყანა – ლატვია და ლიეტუვა, რომელთა მოსახლეობა ყველაზე მეტად შემცირდა ევროკავშირში გაწევრიანების შემდეგ. არაფერი თქვა, მათ მეზობელ ესტონეთზე, რომლის მოსახლეობა უმნიშვნელოდ შემცირდა ევროკავშირში გაწევრიანების შემდეგ. ჩეხეთის, სლოვაკეთის და სლოვენიის მოსახლეობა კი პირიქით, გაიზარდა ევროკავშირში შესვლის შემდეგ.

თეორიულად ის მართალს ამბობს, რომ “როდესაც ეკონომიკურად ძლიერი ქვეყანა ეკონომიკურად შედარებით სუსტი ქვეყნის მოსახლეობას სავიზო რეჟიმს უმარტივებს, ეს მოსახლეობის გადინებას უწყობს ხელს.“

თუმცა ან არ იცის, ან ისევ განგებ ატყუებს ამომრჩეველს, როდესაც არ ეუბნება, რომ ევროკავშირთან დაახლოება და საბოლოოდ გაწევრიანება ქვეყანას უამრავ პერსპექტივას უჩენს, რამაც, შესაძლოა, პირიქით, მიგრაცია შეანელოს.

სწორედ ეს მოხდა იგივე ლატვიაში და ლიეტუვაში – 2004 წლამდე (ლატვია და ლიეტუვა ევროკავშირის წევრები 2004-ში გახდნენ) ამ ქვეყნებს გაცილებით მეტი ადამიანი ტოვებდა წლიურად, ვიდრე გაწევრიანების შემდეგ. ევროკავშირმა ამ ქვეყნებში მიგრაცია კი არ დააჩქარა, პირიქით შეანელა…” – აღნიშნავს ნამჩავაძე.

მისი თქმით, მოსახლეობის შემცირებას და უარყოფით მიგრაციულ სალდოს ბევრი მიზეზი აქვს და “როცა ერთი მიზეზით ხსნი, უკვე მანიპულირებ”.

“საქართველოდან ემიგრაციის მთავარი მიზეზი სიღარიბეა და შემდეგ მოდის კანონის უზენაესობის არ ქონა, ძალადობა, უპერსპექტივობა და ა.შ. ,” – ამბობს ექსპერტი.

მისი თქმით, ევროკავშირის კანდიდატის სტატუსი და პერსპექტივაში ევროკავშირის წევრობა კი არ გაზრდის საქართველოდან ემიგრაციას, პირიქით შეამცირებს, რადგან ეს იძლევა უსაფრთხოების, ადამიანის უფლებების დაცვის და ეკონომიკური პრობლემების დაძლევის შესაძლებლობას.

“თუ რამე ამცირებს (ორივე გაებით, რაოდენობრივად და მორალურად) საქართველოს მოსახლეობას, ეს არის სიღარიბე და უსამართლობა! თორემ ვიზის გარეშეც, მექსიკის საზღვრის ტანჯვით გავლითაც შედიან აშშ-ში და კიდევ მეტი წავა მომავალში,” – აღნიშნავს ნამჩავაძე.

კობახიძე მიგრაციაზე