"ამ ტიპის საჯარო განცხადება გამოძიების დაწყების საფუძველია" - სარალიძის საქმის მოსამართლე "ოცნების“ ბრალდებებს პასუხობს

ხორავას საქმის მოსამართლე

ხორავას ქუჩაზე 2017 წელს მოკლული დათუნა სარალიძის საქმის მოსამართლე, ეკა არეშიძე “ქართული ოცნების“ ბრალდებებს პასუხობს და აცხადებს, რომ ამ ტიპის საჯარო განცხადება გამოძიების დაწყების საფუძველია.

მმართველი პარტიის პოლიტსაბჭომ 20 აგვისტოს განცხადება გაავრცელა, რომელშიც “ქართული ოცნება“ ხორავას ქუჩაზე მომხდარი მკვლელობის საქმეზე პირველი ინსტანციის სასამართლოს გადაწყვეტილებას “საეჭვოს“ უწოდებს.

იმავე განცხადებაში მმართველი გუნდი თავს ესხმის იმ მოსამართლეს, რომელმაც იმ განაჩენით მიანიშნა, რომ მკვლელი ჯერაც თავისუფალი იყო და აცხადებს, რომ ეკა არეშიძე დღემდე საეჭვო პრივილეგიებით სარგებლობს უცხოელებისგან, ხოლო საპროტესტო აქციები, რომლებსაც მოქალაქეები დათუნა სარალიძის მამასთან, ზაზა სარალიძესთან ერთად მართავდნენ, ოცნების განცხადებით, “გადატრიალების მცდელობა” იყო.

“მაშინ საზოგადოებას გაუჭირდა იმის გააზრება, თუ ვის მიერ და რა მიზნით იყო შესაბამისი პროცესები დაგეგმილი და კოორდინირებული. საბედნიეროდ, ეს ყველაფერი არჩევნებამდე შედარებით დიდი ხნით ადრე და არა წინასაარჩევნო პერიოდში მოხდა. წინააღმდეგ შემთხვევაში, ყველაფერი ტრაგიკულად შეიძლება დასრულებულიყო და ხელოვნურად წარმართულ სცენარს ხელისუფლებაში აგენტურის დაბრუნება შეიძლებოდა მოჰყოლოდა. საზოგადოებას თვეები დასჭირდა იმის გასააზრებლად, რომ საქმეში ხელისუფლების არავითარი ბრალეულობა არ იყო” – წერია „ქართული ოცნების“ განცხადებაში.

"ქართული ოცნება“ ისტერიკაშია" – ექსპერტები მმართველი პარტიის განცხადებას აფასებენ

“ეს ყველაფერი მმართველ გუნდს მხოლოდ წინასაარჩევნო პიარისთვის სჭირდება”

ეკა არეშიძის თქმით, თავის მართლება “იმ აბსურდულ ბრალდებებზე”, რაც აღნიშნულ განცხადებაში გაჟღერდა, “უბრალოდ დამამცირებელი და ღირსების შემლახავია” და ყურადღებას კონსტიტუციის 63-ე მუხლზე ამახვილებს, რომლის მიხედვითაც, მოსამართლე თავის საქმიანობაში დამოუკიდებელია და ემორჩილება მხოლოდ კონსტიტუციასა და კანონს და რაიმე ზემოქმედება მოსამართლეზე ან ჩარევა მის საქმიანობაში გადაწყვეტილების მიღებაზე ზეგავლენის მიზნით, აკრძალულია და ისჯება კანონით.

მისივე განმარტებით, კონსტიტუციაში ხაზგასმულია, რომ არავის აქვს უფლება მოსთხოვოს მოსამართლეს ანგარიში კონკრეტულ საქმეზე და ბათილია ყველა აქტი, რომელიც ზღუდავს მოსამართლის დამოუკიდებლობას.

“აღნიშნულ საქმეზე, 6 წლის წინ, სპეციალურად შექმნილი პარლამენტის დროებითი საგამოძიებო კომისიის მიერ მიღებულია შესაბამისი დასკვნა. სასამართლო არ არის ვალდებული გაიზიაროს პროკურატურის მიერ წარდგენილი ბრალდება ან დაცვის მხარის პოზიცია.

სასამართლოს განაჩენი ყველასთვის გასაგები და მისაღები ვერ იქნება. უსამართლობის განცდა იწვევს საზოგადოების აღშფოთებას. ორი უდანაშაულო არასრულწლოვანის მკვლელობის თემით სპეკულირება, ნებისმიერი მხრიდან, ნებისმიერ დროს, უზნეობაა! ამ ტიპის საჯარო განცხადება გამოძიების დაწყების საფუძველია,“ — აცხადებს მოსამართლე.

დათუნა სარალიძის საქმე

მკვლელობა, რომელმაც მთელი საქართველო შეძრა, თბილისის  ცენტრში, დღისით, უამრავი მოწმის თვალწინ მოხდა. სკოლაში დაწყებული კონფლიქტის შემდეგ მოზარდების ორმა ჯგუფმა საქმის გარჩევა ხორავას ქუჩაზე ერთ-ერთ ეზოში გააგრძელა. კონფლიქტი მოზარდებს შორის ჩხუბში გადაიზარდა, რომლის დროსაც ორი მოზარდი ცივი იარაღით დაჭრეს.

ერთი მოზარდი ადგილზე გარდაიცვალა, მეორე კი ექიმების მცდელობის მიუხედავად, 2 დეკემბერს საავადმყოფოში გარდაიცვალა. პოლიციამ ორი ეჭვმიტანილი დააკავა.

ხორავას ქუჩაზე მოზარდების მკვლელობის საქმის ოთხთვიანი სასამართლო განხილვა 2018 წლის 30 მაისს დასრულდა. თბილისის საქალაქო სასამართლოს მოსამართლემ, ეკა არეშიძემ ერთ – ერთი ბრალდებული დამნაშავედ ცნო ლევან დადუნაშვილის მკვლელობაში, თუმცა დავით სარალიძის მკვლელობის ნაწილში გაამართლა. ხოლო მეორე ბრალდებული არა  დავით სარალიძის განზრახ მკვლელობაში, არამედ მკვლელობის მცდელობაში ცნეს დამნაშავედ.

როგორ მივიდა საქართველოს სასამართლო სისტემა დასავლურ სანქციებამდე

ხელისუფლება არ არის მზად, დათმოს სასამართლო სისტემაზე გავლენა – ამბობენ ექსპერტები

სასამართლოს ამ გადაწყვეტილების შემდეგ აღმოჩნდა, რომ მოზარდების მკვლელობიდან ექვსი თვის თავზე  უცნობი იყო, ვინ არის დამნაშავე ერთ-ერთი დაღუპულის – დავით სარალიძის მკვლელობაში.

მოსამართლის ამ გადაწყვეტილების შემდეგ მოკლული დავით სარალიძის მამამ ზაზა სარალიძემ საზოგადოებას პროტესტისკენ მოუწოდა. თბილისში ათასობით ადამიანი ქუჩაში გამოვიდა, საპროტესტო აქციები რამდენიმე კვირა გაგრძელდა.

საქალაქო სასამართლოს გადაწყვეტილების შემდეგ თანამდებობა დატოვა მთავარმა პროკურორმა ირაკლი შოთაძემ. სამართალდამცველებმა კი პროკურატურის მაღალჩინოსანი მირზა სუბელიანი დააკავეს, რომელიც ჩხუბში მონაწილე ერთ-ერთი მოზარდის მამა და მეორეს – მიხეილ კალანდიას, ბიძაა. მას მოკლული მოზარდის მამა დანაშაულის დაფარვაში ადანაშაულებდა.

2018 წლის 31 მაისს სუბელიანს დანაშაულის შეუტყობინებლობისთვის 1 წლით და 1 თვით თავისუფლების აღკვეთა მიესაჯა.

მოწმე ბრალდებულის სტატუსით დააკავეს – გადამწყვეტი მომენტი გახმაურებული მკვლელობის გამოძიებაში

მიხეილ კალანდიას წინააღმდეგ გამოძიების დაწყებას საპარლამენტო კომისია და მოკლული მოზარდის მამა ითხოვდნენ