პარლამენტმა ე.წ კარვების კანონპროექტი მესამე მოსმენით დაამტკიცა

კარვების კანონპროექტი

საქართველოს პარლამენტმა შეკრებებისა და მანიფესტაციების შესახებ კანონში შესატანი ცვლილება, ე.წ. კარვების კანონი დაჩქარებული წესით, მესამე მოსმენით დაამტკიცა. ცვლილებას მხარი დაუჭირა 76-მა დეპუტატმა, წინააღმდეგი იყო 20. 

საზოგადოებაში აღნიშნულ კანონს უკვე უწოდეს კიდევ ერთი “რუსული კანონი” და პარლამენტის უკანა ეზოსთან 5 ოქტომბერს აქცია დააანონსეს.

კანონპროექტის ერთ-ერთი ინიციატორის, განათლებისა და მეცნიერების კომიტეტის თავმჯდომარის გივი მიქანაძის მტკიცებით, კანონპროექტი შეკრებებისა და მანიფესტაციების უფლებას არ ზღუდავს.

კანონპროექტის თანახმად, შეკრების ან მანიფესტაციის მონაწილეებს ეკრძალებათ, მოაწყონ დროებითი კონსტრუქცია, “თუ მისი მოწყობა საფრთხეს უქმნის შეკრების ან მანიფესტაციის მონაწილეებს ან სხვა პირებს, ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას, იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას ან შეკრების  და  მანიფესტაციის ჩატარებას არ უკავშირდება”.

საქართველო: ახალი წესები მომიტინგეებისთვის – მანიფესტაციაზე კარვის გაშლა იკრძალება

მმართველი გუნდი შეკრებისა და მანიფესტაციის კანონის გამკაცრების ინიციატივით გამოდის

“ოცნების” დეპუტატები აცხადებენ, რომ ცვლილებების აუცილებლობა სახელმწიფო უსაფრთხოების სამსახურის მიერ, 18 სექტემბერს გავრცელებულმა ინფორმაციამ გამოიწვია, რომლის მიხედვით, ოქტომბერ-დეკემბერში საქართველოში „დესტაბილიზაციის და რევოლუციური პროცესების მოწყობა“ იგეგმება.

„ქართული ოცნების” თავმჯდომარემ, ირაკლი კობახიძემ კანონპროექტების მიღების დაჩქარება ასე ახსნა ჟურნალისტებთან:

„პირდაპირი ინფორმაციაა, რომ რევოლუციური პროცესები, რომლებზეც დეტალური ინფორმაცია დღესაც მოვისმინეთ, იგეგმება სწორედ ოქტომბრიდან, ნოემბერ-დეკემბრის ჩათვლით. აქედან გამომდინარე დაჩქარებას, რა თქმა უნდა, თავისი ლოგიკური საფუძველი აქვს. ბუნებრივია, ოპოზიცია სუსტია, მაგრამ ამ სისუსტის პირობებში პროვოკაციების რისკი, რა თქმა უნდა, მატულობს. ჩვენ გვჭირდება პრევენციული ზომების მიღება და ეს კანონპროექტიც ზუსტად ამას ემსახურება“.

● სუს: საქართველოში ევრომაიდნის გამეორება და ხელისუფლების დამხობა იგეგმება. პროცესები უკრაინიდან იმართება
● “ე.წ. მეორე ფრონტზე დეზინფორმაციის მიზანი საზოგადოების მოწამვლაა” – რა თქვა ბორელმა პრემიერთან შეხვედრაზე

კონკრეტულად რა იცვლება

დემონსტრანტებს აეკრძალებათ „დროებითი კონსტრუქციების” მოწყობა. ეს შეიძლება იყოს კარავი ან შეიძლება იყოს სცენაც, სადაც მიტინგზე გამომსვლელები გამოდიან. თუკი აქამდე კარვის გაშლა პროტესტის ერთ-ერთი ნებადართული ფორმა იყო, ცვლილებების მიღების შემდეგ კანონდარღვევად ჩაითვლება. პოლიციას უფლება აქვს კარვის და სცენის კონფისკაცია მოახდინოს. დამრღვევი ადმინისტრაციული წესით დაჯარიმება 500-დან 5000 ლარამდე ან პატიმრობით 15 დღემდე ვადით.

დროებითი კონსტრუქციის მოწყობა შემდეგ შემთხვევებში იკრძალება:

• საფრთხეს უქმნის შეკრების ან მანიფესტაციის მონაწილეებს ან სხვა პირებს;
• ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას;
• იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას;
• შეკრების ან მანიფესტაციის ჩატარებას არ უკავშირდება.

შეკრებებისა და მანიფესტაციების კანონის გამკაცრებას კრიტიკულად აფასებენ არასამთავრობო ორგანიზაციების წარმომადგენლები. ექსპერტები ამბობენ, რომ ამ ცვლილებებით საფრთხის წინაშე დგება გამოხატვის თავისუფლება.