კარასინმა შეაქო საქართველოს ხელისუფლება უკრაინის საკითხზე "გაწონასწორებული" პოზიციისთვის

კარასინის განცხადება საქართველოზე პოზიციაზე

რუსეთის ფედერაციის საბჭოს საერთაშორისო საქმეთა კომიტეტის თავმჯდომარემ, გრიგორი კარასინმა შეაქო საქართველოს ხელისუფლება უკრაინის საკითხზე პოზიციის გამო.

საქართველოს რეაქციას დასავლეთის ანტირუსულ სანქციებზე კარასინმა “გაწონასწორებული” უწოდა და ხაზგასმით აღნიშნა, რომ რუსეთში „ეს ფაქტი შეუმჩნეველი არ დარჩება“.

ეს განცხადება კარასინმა გორჩაკოვის ფონდში, ქართველ პოლიტოლოგებთან შეხვედრაზე ისაუბრა.

უკრაინაში ომის დაწყებიდან ზუსტად ერთი თვის თავზე, 24 მარტს, მოსკოვში, გორჩაკოვის ფონდში, საქართველო-რუსეთის ექსპერტთა კონფერენცია გაიხსნა, რომელსაც ორივე ქვეყნის 40-მდე ექსპერტი, პოლიტოლოგი, მეცნიერი დაესწრო. შეხვედრას ასევე ქართული დიასპორის წარმომადგენლები ესწრებოდნენ, წერია გორჩაკოვის ფონდის ვებ-გვერდზე. ფოტოზე, რომელსაც გორჩაკოვის ცენტრი ავრცელებს, ჩანს, რომ მოსკოვის შეხვედრას ყოფილი პარლამენტარი, პრომაკოვის ფონდის ხელმძღვანელი დიმიტრი ლორთქიფანიძე ესწრებოდა.

● აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები

● ამერიკის ელჩი: მთავრობისგან ველით, სანქციებს დაემორჩილონ. რუსეთმა ჯარი უნდა გაიყვანოს

● უნდა დადგეს თუ არა დღის წესრიგში საქართველოს დეოკუპაციის საკითხი

ღონისძიების ორგანიზატორები არიან სახალხო დიპლომატიის მხარდაჭერის გორჩაკოვი სახელობის ფონდი და პრომაკოვის სახელობის ქართულ-რუსული საზოგადოებრივი ცენტრი.

კარასინმა რუსეთ-საქართველოს ურთიერთობის ისტორია გააანალიზა. მან თქვა, რომ 2012 წლიდან, მას შემდეგ, რაც ხელისუფლებაში “ქართული ოცნება” მოვიდა და აბაშიძე-კარასინის ფორმატი ამოქმედდა, რუსეთი საქართველოს მეორე ყველაზე მნიშვნელოვანი სავაჭრო პარტნიორი გახდა. მისი თქმით, მოიხსნა ქართულ საქონელზე დაწესებული ყველა შეზღუდვა და რუსეთში ქართული ექსპორტი 14-ჯერ გაიზარდა.

კარასინმა ასევე გამოთქვა სურვილი, რომ განახლდეს ამჟამად გაყინული ჟენევის მოლაპარაკებების ფორმატი.

„თუ გვინდა, რომ რუსეთსა და საქართველოს შორის მოლაპარაკებამ ძირითად საკითხებზე შედეგი მოიტანოს, უნდა მოვხსნათ დღის წესირიგიდან უკიდურესი პოზიციები. ნებისმიერ დიპლომატიურ პრაქტიკაში ყველაზე ცუდი სტრატეგიაა – საბოლოო მიზნის უკომპრომისოდ და დაუყონებლივ დაყენება. უთანხმოების მოგვარება თუ გვინდა, უნდა წავიდეთ ეტაპობრივად,” – განაცხადა კარასინმა.

კარასინის განცხადებას უკრაინაზე საქართველოს პოზიციასთან დაკავშირებით უკვე გამოეხმაურნენ საქართველოს ხელისუფლების წარმომადგენლები. მმართველი პარტია „ქართული ოცნების“ ერთ-ერთმა ლიდერმა, პარლამენტის ვიცე-სპიკერმა არჩილ თალაკვაძემ განაცხადა:

“არც ერთი ასეთი შექება, არც ერთი ასეთი რევერანსი რუსეთის ფედერაციის მხრიდან საქართველოს ხელისუფლებისთვის არ ნიშნავს არაფერს. ჩვენ გვაქვს ჩვენი მკაფიოდ განსაზღვრული პოლიტიკა. საქართველოს ტერიტორიების 20 პროცენტი გახლავთ ოკუპირებული”.

თალაკვაძემ განაცხადა, რომ მოსკოვში გამართულ კონფერენციასთან საქართველოს ხელისუფლებას არანაირი კავშირი არ აქვს.

„თუ ჩვენი პოზიცია გაინტერესებთ, მაშინ ამ სიტუაციაში, როდესაც რუსეთი შეიჭრა უკრაინაში და მიმდინარეობს საომარი მოქმედებები, მიგვაჩნია, რომ საქართველოს მოქალაქეების მონაწილეობა ამ ფორმატში შეუსაბამო იყო“, – განაცხადა მან.

_________________________

საქართველო არ შეუერთდა უკრაინის მხარდასაჭერ სანქციებს, რომლებიც დასავლეთმა დააწესა რუსეთის წინააღმდეგ. პრემიერ-მინისტრმა ირაკლი ღარიბაშვილმა განაცხადა, რომ საქართველო არ შეუერთდება დასავლეთის სანქციებს რუსეთის წინააღმდეგ, რადგან ეს ეწინააღმდეგება ქვეყნის ეროვნულ ინტერესებს და სანქციებს არ შეუძლია შეაჩეროს საომარი მოქმედებები უკრაინაში.

განსხვავებული პოზიცია აქვს საქართველოს პრეზიდენტს სალომე ზურაბიშვილს, რომელიც რუსეთის წინააღმდეგ უფრო რადიკალური ნაბიჯების გადადგმის მომხრეა.

უკრაინის პრეზიდენტმა ვლადიმირ ზელენსკიმ საქართველოდან ელჩის კონსულტაციებისთვის გაიწვია. ამ გადაწყვეტილების ერთ-ერთ მიზეზად სანქციებთან დაკავშირებით საქართველოს მთავრობის პოზიცია დასახელდა.