ოთხი ადამიანი დაიღუპა და ათეულობით დაშავდა მას შემდეგ, რაც 6 იანვარს, შუადღეს, მოქმედი პრეზიდენტის, დონალდ ტრამპის ათასობით მხარდამჭერი კაპიტოლიუმის შენობაში შეიჭრა. ეს მოხდა იმ დროს, როდესაც კონგრესში მიდიოდა სხდომა, სადაც აშშ-ის არჩევნების შედეგები ოფიციალურად უნდა დაემტკიცებინათ.

პარალელურად, იმავე დღეს ვაშინგტონში მოქმედი პრეზიდენტის, დონალდ ტრამპის მომხრეები შეიკრიბნენ. აქციას “მარში ამერიკის გადასარჩენად” ერქვა.

„ჩვენ არასოდეს ვაღიარებთ დამარცხებას“, – მიმართა ტრამპმა შეკრებილებს და კაპიტოლიუმისკენ მარშით წასვლისკენ მოუწოდა.

რამდენიმე საათში, მას შემდეგ, რაც სპეცრაზმმა გაათავისუფლა კაპიტოლიუმის შენობა ტრამპის მომხრეებისგან, კონგრესმა განაახლა მუშაობა და ოფიციალურად გააფორმა აშშ-ის საპრეზიდენტო არჩევნებზე ჯოზეფ ბაიდენის გამარჯვება.

უკვე 7 იანვარს, კონგრესის ამ გადაწყვეტილების შემდეგ, ტრამპმა თქვა, რომ ის თანახმაა, მშვიდობიანად გადააბაროს მმართველობა ბაიდენს, თუმცა არჩევნებს კვლავაც გაყალბებულად მიიჩნევს.

რა მოხდა 6 იანვარს

ტრამპის მოწოდების შემდეგ, მისმა მხარდამჭერებმა მაშინვე ათასობით პოსტი დაწერეს სოციალურ ქსელებში, კაპიტოლიუმის შტურმისკენ მოწოდებით.

ბევრი წერდა, რომ თან მიჰქონდა იარაღი.

კაპიტოლიუმის შენობის პერიმეტრზე მყოფი ოფიცრები ხალხის ტალღამ ადვილად ჩამოიშორა – მათ ხელს ჰკრავდნენ და ასხამდნენ ქიმიურ სითხეებს.

კაპიტოლიუმის მარჯვენა მხარეს პროტესტის მონაწილეებმა პოლიციელების კორდონს გადაუარეს და ასე გაარღვიეს პერიმეტრი.

ასობით ადამიანი ძვრებოდა კედლებზე, მიცოცავდა სამშენებლო კონსტრუქციებზე, პოზირებდა ფოტოების გადასაღებად და ანადგურებდა ავეჯსა და ტექნიკას ოფისებში კაპიტოლიუმის შიგნით.

კონგრესმენების, ჟურნალისტებისა და კაპიტოლიუმის თანამშრომლების ევაკუირება მოახდინეს, მათ თან წაიღეს ამომრჩეველთა ხმებით სავსე ყუთებიც.

წესრიგის აღსადგენად ეროვნული გვარდია გაგზავნეს.

ვაშინგტონის მერის განკარგულებით, დედაქალაქში საგანგებო მდგომარეობა და კომენდანტის საათი გამოცხადდა.

მომიტინგეებსა და პოლიციას შორის შეტაკების შედეგად დაიღუპა ოთხი ადამიანი. დაკავებულია 50-ზე მეტი.

ბაიდენი აშშ-ის პრეზიდენტი ხდება. რატომ არის ტრამპი კვლავინდებურად ასეთი პოპულარული?

რეაქციები ვაშინგტონში

კაპიტოლიუმში მსგავსი რამ ბოლოს 1814 წელს, აშშ-ინგლისის ომის დროს მოხდა. მაშინ ინგლისელები კაპიტოლიუმში შეიჭრნენ და დაარბიეს.

„ასეთი რამ აშშ-ის კაპიტოლიუმში არ მომხდარა. ეს სრულიად უპრეცედენტო ფაქტია. ეს იმდენად ჰგავს 11 სექტემბრის თავდასხმას, რამდენადაც შეგიძლიათ წარმოიდგინოთ“, – განაცხადა ანალიტიკური ცენტრის „Police Executive Research Forum“ აღმასრულებელმა დირექტორმა ჩაკ ვეკსლერმა.

აშშ-ის არჩეულმა პრეზიდენტმა ჯო ბაიდენმა მკაცრად დაგმო ძალადობა და მოუწოდა მოქმედ პრეზიდენტს, უკან გაიყვანოს თავისი მხარდამჭერები. 

შტურმი დაგმო რამდენიმე გამოჩენილმა რესპუბლიკელმა, მათ შორის, აშშ-ის ყოფილმა პრეზიდენტმა ჯორჯ ბუშმა და სენატორმა მით რომნიმ.

ყოფილმა დემოკრატმა პრეზიდენტებმა, ბარაკ ობამამ და ბილ კლინტონმა ტრამპი პირდაპირ დაადანაშაულეს ძალადობის წაქეზებაში.

ტრამპის რიტორიკა დაგმო აშშ-ის ყოფილმა თავდაცვის მდივანმა, ჯეიმს მეტისმა.

თეთრი სახლის რამდენიმე თანამშრომელმა თანამდებობა დატოვა.

სულ უფრო მეტი ადამიანი გამოდის ტრამპის იმპიჩმენტის მოთხოვნით. მათ შორის, ამ იდეის სათავეში თავად ტრამპის თანაგუნდელები, რესპუბლიკური პარტიის ლიდერები არიან.

მათი აზრით, ტრამპი 20 იანვარზე უფრო ადრე უნდა ჩამოშორდეს თანამდებობას. 20 იანვარს ჯოზეფ ბაიდენის ინაუგურაციაა და ტრამპმა, კანონით უნდა დატოვოს პოსტი. თუმცა, ბევრი ფიქრობს, რომ ტრამპი პრეზიდენტად ამ ორი კვირის განმავლობაშიც ვერ დარჩება და მან პასუხი უნდა აგოს მომხდარის გამო.

იმპიჩმენტის პროცედურის დასაწყებად, ვიცე-პრეზიდენტმა მაიკ პენსმა და კაბინეტის წევრების უმეტესობამ მხარი უნდა დაუჭირონ ტრამპის თანამდებობიდან ჩამოშორებას „იმის გამო, რომ მას არ შეუძლია უფლებამოსილების შესრულება“. ეს უპრეცედენტო ნაბიჯი იქნება.

შემდეგ, სენატმა კენჭი უნდა უყაროს ტრამპის დისკვალიფიკაციას, რითიც მას აეკრძალება ოდესმე რაიმე ფედერალური თანამდებობის დაკავება.

Facebook-მა, Twitter-მა და Instagram-მა ტრამპის გვერდები დაბლოკეს

ტრამპი 6 იანვარს აქტიურობდა სოციალურ ქსელებში.

მან საკმაოდ დაგვიანებით გამოაქვეყნა ვიდეო, რომელშიც ადამიანებს დაშლისკენ მოუწოდა. თუმცა, ამავე ვიდეოში ხაზგასმით იმეორებდა, რომ არჩევნები „მოიპარეს“ (მიუხედავად იმისა, რომ არანაირი მტკიცებულება არ არსებობს). დარბევაში მონაწილეებს მან „განსაკუთრებული ადამიანები“ უწოდა და განაცხადა: „ჩვენ თქვენ გვიყვარხართ“.

მოგვიანებით მან კიდევ ერთი ტვიტი გამოაქვეყნა იმის შესახებ, რომ მას გამარჯვება მოპარეს – ისევ, ყველანაირი მტკიცებულების გარეშე.

Twitter-მა თავდაპირველად ეს ჩანაწერები მონიშნა, როგორც სიმართლესთან შეუსაბამო, შემდეგ წაშალა ისინი.

მოგვიანებით კი ტრამპს 12 საათით ჩამოართვა თავის ანგარიშთან წვდომა.

იგივე გააკეთა Facebook-მაც. მან წაშალა პრეზიდენტის მიმართვა და მისი ანგარიში 24 საათით დაბლოკა. 24-საათიან ბლოკირებას შეუერთდა Instagram-იც.