"ეს არის საზოგადოების პროტესტი ხელისუფლების წინააღმდეგ" - პოლიტოლოგი აფხაზეთში ბინების კანონის შესახებ

კანონი ბინების შესახებ აფხაზეთში

აფხაზეთის ხელისუფლება ცდილობს დაარწმუნოს საზოგადოება, რომ მის მიერ მოწოდებული სკანდალური ე.წ. ბინების კანონი ოპოზიციის მიერ იყო პოლიტიზირებული. ამის დამადასტურებლად ხელისუფლებამ არქივიდან მოიპოვა ინტერვიუები აფხაზეთის ყოფილ პრეზიდენტთან, რაულ ხაჯიმბასთან და ოპოზიციური ვეტერანთა ორგანიზაციის, “აარუას” ლიდერთან, თემურ გულიასთან, სადაც ისინი ამბობენ, რომ არ არიან წინააღმდეგი არსებული კანონის გაუქმების და უცხოელებზე უძრავი ქონების მიყიდვის აკრძალვის მოხსნის.

2016 წელს მიცემულ ინტერვიუში რაულ ხაჯიმბამ და თემურ გულიამ განაცხადეს, რომ მიზანშეწონილად მიიჩნევენ ამ აკრძალვის გადახედვას, რადგან ეს ქმნის საფუძველს “ჩრდილოვანი” სქემებით გარიგებების განსახორციელებლად, რის შედეგადაც მფლობელები უძრავ ქონებას მაინც ყიდიან უცხოელებზე – თუნდაც არაფორმალურად.

• ახალი „კანონი ბინების შესახებ“ აფხაზეთში – რას ნიშნავს და რა საფრთხეებს შეიცავს
• ეკონომისტის მოსაზრება: რატომ ლობირებს აფხაზეთის ხელისუფლება ბინების შესახებ კანონს?
• უფასო საცხოვრებელი აფხაზეთში: რატომ არ არის ყველასთვის საკმარისი

მაგრამ რაულ ხაჯიმბას მეფობის დროს კანონის გადახედვის იდეამ შემდგომი განვითარება ვეღარ მიიღო. და, ალბათ, ეს ინტერვიუები არქივშივე დარჩებოდა, ახლა ხაჯიმბაც და გულიაც რომ არ იყვნენ ბინების შესახებ კანონის მიღების კატეგორიული მოწინააღმდეგეები.

„ახლა რომ ყოფილიყვნენ ხელისუფლებაში, იგივეს გააკეთებდნენ, რასაც ჩვენ ახლა ვაკეთებთ“, – ასეთია მოქმედი პრეზიდენტის, ასლან ბჟანიას ადმინისტრაციის მესიჯი.

თუმცა, ცნობილი აფხაზი პოლიტიკოსი და ბლოგერი ახრა ბჟანია დარწმუნებულია, რომ ეს არგუმენტი უაზროა და არ ცვლის სიტუაციის არსს:

„თუ რაიმე საბოლოოდ დაარწმუნებდა ჩვენს საზოგადოებას, რომ ახალი კანონის ლობისტებს აქვთ არსებითი არგუმენტები, იქნებოდა ის, რომ მათ მიეღოთ პროექტის ზოგიერთი კრიტიკოსის შენიშვნა.

ყველგან არიან პოლიტიკოსები, რომლებიც შეხედულებებს იცვლიან. ეს შეიძლება მოხდეს სხვადასხვა მიზეზის გამო, მათ შორის ოპორტუნისტულით. მერე რა? ეს რას ცვლის? როგორ შეიძლება გავლენა იქონიოს ყოფილ და ამჟამინდელ თანამდებობის პირებს შორის ურთიერთობის გარკვევამ მოქმედი ხელისუფლების მიერ გადადგმულ ნაბიჯზე?

გაქრება თუ არა აშკარა საფრთხეები დემოგრაფიისთვის, ბიზნესისთვის, ეკოლოგიისთვის, თავად ჩვენი სახელმწიფოსთვის, რომ ვიღაც ორმაგი სტანდარტებით მოქმედებს?

კონკრეტულად რა შეგიძლიათ დაუპირისპიროთ კანონის მოწინააღმდეგეების არგუმენტებს? არაფერი!

როგორ აუხსნათ აფხაზეთის მოქალაქეებს, რომ ასი ათასი უცხოელის მუდმივი აქ ყოფნა მათთვის კარგი იქნება? ის, რომ ჩვენი რესურსები მათ უნდა მართონ, ვინც ამას ჩვენზე უკეთ ახერხებს?

გესმოდეთ, არ არსებობს ძალა, რომელიც 30 წლიანი დამოუკიდებლობის შემდეგ განაახლებს იმ პროცესს, რომელმაც მე-20 საუკუნის დასაწყისში მისი დაკარგვა გამოიწვია!

ამიტომ, არ უნდა ვეცადოთ საკითხის პოლიტიკურ კაბალად წარმოჩენას. ბინების შესახებ კანონის მიღების წინააღმდეგ პროტესტის მთავარი ძრავა არის არა ოპოზიცია, არამედ მთელი საზოგადოება, რომელმაც გააცნობიერა, რომ მისი გრძელვადიანი ინტერესები შეიძლება გაიყიდოს. ეს არ არის ოპოზიციის პროტესტი ხელისუფლების წინააღმდეგ, ეს არის საზოგადოების პროტესტი ხელისუფლების წინააღმდეგ. და ასეთი პროტესტი ჩვეულებრივ ბოლომდე მიდის.“

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო