ბორელი: ევროკავშირს შევთავაზებთ, მთავრობისთვის გამოყოფილი €100 მლნ სამოქალაქო საზოგადოებას გადაეცეს
ჯოზეფ ბორელის განცხადება
საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის, ჯოზეფ ბორელის თქმით, დღევანდელ საბჭოს სხდომაზე დააყენებს წინადადებას, რომ საქართველოს მთავრობისთვის განკუთვნილი 100 მილიონი ევროს დახმარება სამოქალაქო საზოგადოებაზე გადამისამართდეს.
დღეს, ევროკავშირის საგარეო საქმეთა საბჭო 2024 წლის 26 ოქტომბერს გამართული საპარლამენტო არჩევნების ფონზე საქართველოში არსებულ ვითარებაზე იმსჯელებს. საქართველო უკრაინის შემდეგ დღის წესრიგში მეორე საკითხი იქნება.
როგორც ცნობილია, განიხილება დოკუმენტი, რომელიც საქართველოს მიმართ განსახორციელებელ ნაბიჯებს მოიცავს. მათ შორის, დაფინანსების შეწყვეტა და მაღალი დონის შეხვედრების შეჩერება. საბჭოს დღის წესრიგის თანახმად, ევროკავშირის საგარეო საქმეთა მინისტრები უკრაინის წინააღმდეგ რუსეთის აგრესიაზე იმსჯელებენ.
რა თქვა ჯოზეფ ბორელმა
“საქართველო არის საკითხი, რომელსაც დღეს განვიხილავთ. კონკრეტული გადაწყვეტილებები მიიღება. მე ვთავაზობ [საბჭოს] იმ მნიშვნელოვანი ნაწილის მხარდაჭერის შეწყვეტას, რომელიც მთავრობას მიემართება. 100 მილიონ ევროზე მეტი გაიყინება და მთავრობის ნაცვლად, სამოქალაქო საზოგადოების ორგანიზაციებზე გადამისამართდება.
ჩვენ ავიღებთ ამ თანხას, 100 მილიონზე მეტს და მივცემთ სამოქალაქო საზოგადოების ორგანიზაციებს, რათა მხარი დავუჭიროთ მათ ბრძოლას სამართლიანი არჩევნებისთვის
ქართველი ხალხის მხარდაჭერა ევროკავშირის მხრიდან გაგრძელდება. გაწევრიანების პროცესი შეჩერებულია იქამდე, სანამ საქართველოს მთავრობა არ დაუბრუნდება ევროინტეგრაციის გზას. ამ გზაზე დასაბრუნებლად ბევრი რამ უნდა შეიცვალოს. ამავდროულად, ჩვენ ფულს, რომელიც მთავრობისთვის იყო გამოყოფილი, გამოვიყენებთ იმ ხალხისთვის, ვინც იბრძვის თავისი თავისუფლებისთვის.”
4 პროდასავლური ოპოზიციური პარტია, რომლებმა 5%-იანი ბარიერი გადალახეს, 26 ოქტომბრის საპარლამენტო არჩევნების გაყალბების საკითხზე საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს, ჯოზეფ ბორელსა და ევროკავშირის წევრი სახელმწიფოების საგარეო საქმეთა მინისტრებს ერთობლივი წერილით მიმართავს და აცხადებს, რომ საპარლამენტო არჩევნებში ოთხმა ოპოზიციურმა ძალამ, ჯამში, ხმების 52% მიიღო, თუმცა “ქართულმა ოცნებამ” შედეგები გააყალბა.
გაყალბების მტკიცებულებად, ოპოზიციის წერილში მაგალითად მოყვანილია დამოუკიდებელი კვლევითი ორგანიზაციების, როგორიცაა Edison Research და HarrisX-ის მიერ ჩატარებული ეგზიტპოლების შედეგები, ამავდროულად, არასამთავრობო ორგანიზაციების ანგარიშები საარჩევნო დარღვევებთან დაკავშირებით.
