ჯოზეფ ბორელი: კანდიდატის სტატუსი რეფორმებით უნდა დაიმსახურონ - ამ კუთხით ბევრი რამაა გასაკეთებელი
ჯოზეფ ბორელი რეფორმებზე
თბილისში ოფიციალური ვიზიტისას ევროკავშირის უმაღლესმა წარმომადგენელმა საგარეო საკითხებში ჯოზეფ ბორელმა განაცხადა, რომ კანდიდატის სტატუსი უნდა დაიმსახურონ სერიოზული რეფორმებითა და ევროკავშირის ღირებულებების პატივისცემით, თუმცა საქართველოს ამ მიმართულებით კიდევ ბევრი სამუშაო აქვს.
როგორც ბორელმა განმარტა, ევროკავშირის კარი საქართველოსთვის ღიაა, თუმცა ქვეყანამ დადგენილი 12 პრიორიტეტი უნდა შეასრულოს. მისივე თქმით, პუნქტების შესრულება საქართველოს მოქალაქეების ცხოვრების ხარისხს გააუმჯობესებს.
“საქართველო მნიშვნელოვანი ნაწილია ევროკავშირისთვის და ეს არის გადამწყვეტი პერიოდი თქვენი მომავლისთვის, რადგან რამდენიმე კვირაში ჩვენ განვიხილავთ შემდეგ ნაბიჯებს საქართველოს ევროკავშირში გაერთიანების შესახებ, ასევე პირველად წარადგენენ მოხსენებას საქართველოს პროგრესის თაობაზე – როგორც კანდიდატი ქვეყნის შესახებ.
კარი ღიაა და ამ გზაზე გვინდა რომ მხარი დაგიჭიროთ, მაგრამ, ამავდროულად უნდა ითქვას, რომ ევროკავშირის წევრობის აპლიკაცია სერიოზული ვალდებულებაა. კანდიდატის სტატუსი არ არის რაღაცა, რაც ქვეყნებს ეკუთვნით, ის უნდა დაიმსახურონ, დაიმსახურონ სერიოზული რეფორმებითა და ევროკავშირის ღირებულებების პატივისცემით. გულწრფელი რომ ვიყო, ამ მიმართულებით კიდევ ბევრი რამ არის გასაკეთებელი.” – განაცხადა ბორელმა.
მისივე თქმით, საქართველოს შემთხვევაში არსებობს 12 პრიორიტეტი, რომელიც უნდა შესრულდეს. ამ პრიორიტეტების შესრულება არ არის საჭირო იმისთვის, რომ “ბრიუსელი გააბედნიეროთ” ან ევროკავშირის წევრი ქვეყნები დააკმაყოფილოთ, ბორელმა ხაზი გაუსვა, რომ პრიორიტეტები უნდა შესრულდეს იმისთვის, რომ საქართველოს მოქალაქეების ცხოვრება გაუმჯობესდეს.
“თბილისში ძალიან ბევრი ევროკავშირის დროშა ვნახე და ვიცი, რომ საქართველოს მოქალაქეების 80% მხარს უჭერს ქვეყნის ევროკავშირში გაწევრიანებას. მადლობა მინდა გადავუხადო ყველას, ვინც მხარს უჭერს საქართველოს ევროპულ მომავალს. გაწევრიანება არის ეროვნული ამოცანა და აქტორებმა უნდა იმუშაონ ერთად, კონსტრუქციულად. ერთიანობა ახლა ისე მნიშვნელოვანია, როგორც არასდროს. საქართველომ უნდა გამოიყენოს დარჩენილი მოკლე დრო და მთავარი, მოთხოვნილი რეფორმები უნდა გაატაროს.” – აღნიშნა მან.
● პაატა ზაქარეიშვილის კომენტარი: ხელისუფლებაში ყველაფერს აკეთებენ, რათა კანდიდატის სტატუსის მიღების ყოველგვარი შანსი მოანგრიონ
● შარლ მიშელი: ევროკავშირი და წევრობის მსურველები 2030 წლისთვის მზად უნდა იყვნენ გაფართოებისთვის
● ზურაბ ბატიაშვილის მოსაზრება: ბორელი სიცხადის შეტანისთვის ჩამოდის, რათა საბოლოოდ გაირკვეს, სად არის საქართველოს ხელისუფლება
საქართველოში ვიზიტის წინ, ევროკავშირის უმაღლესმა წარმომადგენელმა Civil.ge-სთან მიცემულ ინტერვიუში საქართველო-ევროკავშირის ურთიერთობებზე ისაუბრა.
უმაღლესი წარმომადგენელი ბორელი შეეხო ისეთ საკითხებს, როგორებიცაა მიმდინარე წლის ბოლოს საქართველოსთვის ევროკავშირის წევრობის კანდიდატის სტატუსის მინიჭების პერსპექტივა, საქართველოს პრეზიდენტის იმპიჩმენტის პროცესი და საქართველოსა და ევროკავშირის საგარეო პოლიტიკის შესაბამისობა.
კანდიდატის სტატუსი
“ოქტომბერში ევროკომისიის მიერ წარდგენილი ფართო ანგარიში საქართველოს მიერ შესრულებული ვალდებულებების შესახებ იქნება ის საფუძველი, რომლის მიხედვითაც 2023 წლის ბოლოს ევროკავშირის წევრი სახელმწიფოების ლიდერები გადაწყვეტილებას მიიღებენ კანდიდატის სტატუსის მინიჭების თაობაზე.
შედეგი სრულად არის დამოკიდებული საქართველოს მიღწევებზე. მე ვერ ვიწინასწარმეტყველებ, რა შეიძლება ეწეროს შემოდგომის ანგარიშში. მე მხოლოდ იმის თქმა შემიძლია, რომ ევროკავშირში გაწევრიანება ბევრ მუშაობას მოითხოვს და 12-ვე პუნქტის შესრულება ამ პროცესის მხოლოდ დასაწყისია.
ევროკავშირის გაფართოება უკანასკნელ პერიოდში აღარ არის მხოლოდ ოცნება და ის დღესდღეობით რეალობასთან უფრო და უფრო ახლოსაა, თუმცა, ნებისმიერ ქვეყანას, რომელსაც ექნება სურვილი გახდეს ევროკავშირის წევრი, მოუწევს პოლიტიკური და ეკონომიკური კრიტერიუმების დაკმაყოფილება.”
პრეზიდენტის იმპიჩმენტი
“ქვეყანაში სტაბილური ინსტიტუტების არსებობის მნიშვნელობა, უნდა იყოს მყარი დემოკრატიისა და კანონის უზენაესობის გარანტორი.
ერთიანობა ახლა მნიშვნელოვანია, როგორც არასდროს. საქართველოს მიერ გაწეული შრომა მხოლოდ იმ შემთხვევაში შეიძლება იყოს გრძელვადიანად მდგრადი, თუ ყველა პოლიტიკური ძალა გაერთიანდება რეფორმების გასატარებლად.”
საგარეო პოლიტიკის შესაბამისობა ევროკავშირთან
“ხელისუფლების ბოლო პერიოდში გადადგმული ნაბიჯები, წინააღმდეგობაში შეიძლება მოდიოდეს ევროკავშირის საგარეო პოლიტიკურ კურსთან. კერძოდ, რუსეთ-საქართველოს შორის პირდაპირი ფრენების აღდგენასა და საქართველო-ჩინეთს შორის სტრატეგიული პარტნიორობის გაფორმებას.
საქართველოს პრეროგატივაა, გააღრმაოს ურთიერთობები უცხო სახელმწიფოებთან, თუმცა, იმ პირობებში, როდესაც საქართველოს სურს გახდეს ევროკავშირის წევრი, მან უნდა უზრუნველყოს, რომ ყველა მისი სტრატეგიული თანამშრომლობები წინააღმდეგობაში არ იქნება ევროკავშირის პოლიტიკასთან.
რაც შეეხება რუსეთთან პირდაპირ ფრენებს, სამწუხაროა საქართველოს მხრიდან ამ ნაბიჯის გადადგმა და სანქცირებული პირებისთვის საქართველოში შესვლის შესაძლებლობის მიცემა.
როგორც ქვეყანა, რომელიც მიისწრაფვის ევროკავშირის წევრობისკენ, ჩვენ მოლოდინი გვაქვს, რომ საქართველო შესაბამისობაში იქნება ევროკავშირის საგარეო პოლიტიკურ გადაწყვეტილებებსა და ქმედებებთან.
შარშან, საქართველოს შესაბამისობის მაჩვენებელი უკვე დაბალი – 44% იყო, ამ მომენტში ეს მაჩვენებელი 43%-მდეა შემცირებული. ამას დიდი მნიშვნელობა აქვს ევროკავშირისთვის, ვინაიდან ჩვენი საგარეო პოლიტიკა კონსენსუსის შედეგად იმართება. 43%-იანი დაბალი შესაბამისობით, საქართველო აჩვენებს, რომ მას აქვს პოტენციალი, ზიანი მიაყენოს ამ კონსენსუსს. ეს არ არის ის, რასაც წევრი სახელმწიფოები მარტივად მიიღებენ.”
● შეძლებს თუ არა “ოცნება” პრეზიდენტის იმპიჩმენტს და რატომ წავიდა ამაზე მმართველი პარტია?
● ანალენა ბერბოკი: უკრაინა, მოლდოვა, ბალკანეთის ქვეყნები და გრძელ ვადაში საქართველო შევლენ ევროკავშირში
დღეს საქართველოში ევროკავშირის უმაღლესი წარმომადგენელი, ჯოზეფ ბორელი ოფიციალური ვიზიტით ჩამოვიდა. მისი ვიზიტი 7-8 სექტემბერს გაგრძელდება.
ვიზიტის ფარგლებში უმაღლეს წარმომადგენელს საქართველოს პრეზიდენტი სალომე ზურაბიშვილი მიიღებს. ასევე, ჯოზეფ ბორელი შეხვდება საქართველოს პრემიერ-მინისტრ ირაკლი ღარიბაშვილს.
გავრცელებული ინფორმაციის თანახმად, ევროკავშირის უმაღლესი წარმომადგენელი და ვიცე-პრეზიდენტი, ასევე გამოიყენებს შესაძლებლობას, შეხვდეს პარლამენტში მყოფ ყველა პოლიტიკური პარტიის წარმომადგენელს და გამართოს დისკუსიები სამოქალაქო საზოგადოების წარმომადგენლებთან.
ევროკავშირის საგარეო ქმედებათა სამსახურის ინფორმაციით, ქვეყანაში მისი პირველი ოფიციალური ვიზიტი ამჟამინდელი უფლებამოსილებით საშუალებას მისცემს განიხილოს საქართველოს ევროინტეგრაციის გზაზე პროგრესი, ასევე, გაცვალოს აზრები უფრო ფართო საგარეო პოლიტიკასა და რეგიონულ საკითხებზე.
